ވެެލެންސިއާ އިން ފަހަތުން އަރައި ޓީސީ ބަލިކޮށްފި

މިހާރު ކުރިޔަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތުގައި ޓީސީގެ މައްޗަށް ވެލެންސިއާ ކުރިހޯދައިފިއެވެ.

ރަސްމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު ވެލެންސިއާއިން ކާމިޔާބުކުރީ، ޓީސީ ލަނޑެއް ޖަހާފައިވަނިކޮށް ފަހަތުން އަރައި 2 ލަނޑު ޖަަހައި 1-2 ގެ ނަތީޖާއަކުންނެވެ.

ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑު ޖަހާ ލީޑު ނެގީ ޓީސީންނެވެ. މި ލަނޑު މެޗުގެ 38 ވަނަ މިނެޓުަގައެވެ. މިލަނޑު ޓީސީއަށް ކާމިޔާބުކޮށްދިނީ، ޒަޔާން ނަސީރުއެވެ. ޓީސީ ލަނޑެއް ޖަހާ ލީޑުގައި އޮވެ ފުރަތަމަ ހާފް ނިންމާލަން ދަނިކޮށް ވެލެންސިއާއިން ވަނީ މެޗުގެނަތީޖާ ހަމަހަމަކޮށްފައެވެ. މި ލަނޑު ފުރަތަމަ ހާފްގެ އިތުރު ވަގުތުގެ ތެރޭގައި ކާމިޔާބުކޮށްދިނީ، ހުސައިން ހަނާންއެވެ.

މެޗުގެ ދެވަނަ ހާފުގައި ޓީސީއަށް ލަނޑެއް ޖަހާނެ މާ ރަނގަޅު ފުރުޞަތެއް ލިބިފައެއް ނުވެއެވެ. ނަމަވެސް ވެލެންސިއާއިން ވަނީ ލަނޑު ޖަހާނެ ގިނަފުރުޞަތުތަކެއް ތަނަވަސްކޮށްފައެވެ. އޭގެ ނަތީޖާއެއްގެ ގޮތުން މެޗުގެ 70 ވަނަ މިނެޓުގައި ވެލެންސިއާގެ ބިދޭސީ ކުޅުންތެރިޔާ ބޯހަސް މާޓިން ވަނީ ލަނޑެއް ޖަހާ ވެލެންސިއާއަށް ލީޑު ނަގައިދީފައެވެ. މި ލަނޑަށްފަހުވެސް ވެލެންސިއާގެ ކެޕްޓަން އަލީ ފާސިރަށް ވަނީ ލީޑު އިތުރަށް ފުޅާ ކުރުމަށް ލަނޑު ޖެހުމަށްހުސް ފުރުޞަތުތަކެއް ލިބިފައެވެ.

މި ނަތީޖާއާ އެކު ޕްރެޒިޑެންޓްސް ކަޕްގެ  އެއް ވަނައިގައި އޮތީ ރޭ ގްރާންޑޭ އަތުން މޮޅުވި މާޒިޔާއެވެ. އެއީ ދެ ވަނައިގައި އޮތް ވެލެންސިއާއާ އެއްވަރަށް ހަތަރުމެޗުން 12 ޕޮއިންޓް ލިބިފައިވާއިރު، ލަނޑުގެ ތަފާތުން މާޒިޔާ އަށް ކުރި ލިބޭތީއެވެ.