ދަ ގްރާންޑޭ އަތުން މާޒިޔާ އަށް ބޮޑު މޮޅެއް

މިހާރު ކުރިޔަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތުގައި ދަ ގްރާންޑޭ ސްޕޯޓްސް ކްލަބުގެ މައްޗަށް މާޒިޔާ އިން ބޮޑު މޮޅެއް ހޯދައިފިއެވެ.

ރަސްމީ ފުޓްބޯޅަ ދަނޑުގައި މިރޭ ކުޅުނު މެޗުން މާޒިޔާ މޮޅުވީ 1-6 ގެ ތަފާތު ބޮަޑު ނަތީޖާއަކުންނެވެ.

މި މެޗު ފަށައިގެން މާ ގިނައިރުތަކެއް ނުވަނީސް މާޒިޔާއިން ވަނީ ލަނޑު ޖަހާ ލީޑު ނަގާފައެވެ. މި ލަނޑު މެޗުގެ 10 ވަނަ މިނެޓުގައި ކާމިޔާބުކޮށްދިނީކޯނޭއެވެ. މެޗުގެ ފުރަތަމަ ހާފް ނިމުނީ ކޯނޭ ޖެހި ލަނޑާއެކު މާޒިޔާ ކުރީގައި އޮވެގެންނެވެ.

ދެވަނަ ހާފް ފަށައިގެން 65 ވަނަ މިނެޓުގައި ހަމްޒާ މުހައްމަދު ވަނީ މާޒިޔާގެ ދެވަނަ ލަނޑު ޖަހާ ލީޑު ފުޅާކޮށްދީފައެވެ. މާޒިޔާގެ ތިންވަނަ ލަނޑަކީ ދަ ގްރާންޑޭކުަޅުންތެރިއެއްގެ ގައިގައި ޖެހިފައި ބައިކޮޅަށް ވަން ލަނޑެކެވެ. މި މެޗުގައި ގްރާންޑޭއިން ޖެހި ހަމައެކަނި ލަނޑު 73 ވަނަ މިނެޓުގައި ކާމިޔާބުކޮށްދިނީމުހައްމަދު ލަޔާން އަހުމަދެއެވެ.

މާޒިޔާއިން މި މެޗުގައި ޖެހި ފަހު 3 ލަނޑު ޖަހާފައިވަނީ މެޗުގެ ފަހު 10 މިނެޓުގެ ތެރޭގައެވެ. އެގޮތުން 4 ވަނަ ލަނޑު 82 ވަނަ މިނެޓުގައި އިބްރާހިމް ވަހީދުހަސަން ކާމިޔާބުކޮށްދިންއިރު، 5 ވަނަ ލަނޑު ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި މުހައްމަދު އުމައިރުއެވެ. މާޒިޔާގެ ފަހު ލަނޑު މެޗުގެ އެންމެ ފަހު މިނެޓުގެ ތެރޭގައި ކާމިޔާބުކޮށްދިނީ، މެޗުގެ މޮޅު ކުޅުންތެރިޔާގެ މަގާމްވެސް ހޯދި ހަމްޒާ މުހައްމަދެެވެ.

މި ނަތީޖާއާއެކު އެއް ވަނައިގައި މާޒިޔާ އޮތީ ހަތަރު މެޗުން 12 ޕޮއިންޓާ އެކު އެވެ. ދެ ވަނައިގައި އޮތް ވެލެންސިއާ އަށް ވަނީ ތިން މެޗުން 9 ޕޮއިންޓް ލިބިފައެވެ. މާދަމާ ހަވީރު ޓީސީ އަތުން މޮޅުވެގެން ވެލެންސިއާ އަށް އަލުން އެއް ވަނަ އަށް އެރޭނެއެވެ.