މާފުށީ ޕިކްނިކް އައިލެންޑް "ވަށްމާފުށި" ވަގުތީގޮތުން ބޭނުންކުރުމަށް ހުޅުވާލައިފި

މާފުށީ ޕިކްނިކް އައިލެންޑް ވަށްމާފުށި ވަގުތީގޮތުން ބޭނުންކުރުމަށް ހުޅުވާލައިފިއެވެ.

މާފުށި ކައިރީގައި ބިމެއް ހިއްކައިގެން އެމްޓީސީސީން ހަދާފައިވާ ޕިކްނިކް އައިލެންޑް މާފުށީ ކައުންސިލާއި ހަވާލުކޮށްފައިވަނީ ބުދަ ދުވަހު ރައީސުލްޖުމްހޫރިއްޔާ މާފުއްޓަށް ކުރެއްވި ދަތުފުޅުގައެވެ. މާފުށީ ކައުންސިލުން ވަގުތީ ގޮތުން ޕިކްނިކް އައިލެންޑް "ވަށް މާފުށި" ބޭނުންކުރާނެ އުސޫލުތަކެއް ހެދި ރަސްމީކޮށް ހުޅުވާލެވެންދެން ކައުންސިލުގެ ހުއްދައެއް ހޯދައިގެން ވައްމާފުށްޓަށް އެރުމަށް ފުރުސަތު ހުޅުވާލާފައެވެ.

ވައްމާފުށްޓަށް ވަގުތީގޮތުން އެރުމަށް ހުއްދަ ދެވޭނީ ހަފްތާގެ ކޮންމެ ދުވަހަކުވެސް ހެންދުނު 6:00 އިން ހަވީރު 6:00 އަށެވެ. ހަފްތާގެ ކޮންމެ ދުވަހަކުވެސް މާފުށީގެ ރައްޔިތުންނަށާއި، ދިވެހިންނަށް ވައްމާފުއްޓަށް ޒިޔާރަތް ކުރުމުގެ ހުއްދަ ދިނުމަށް ކައުންސިލުން ވަނީ ނިންމާފައެވެ. އަދި ހުކުރު، ހޮނިހިރު ދެ ދުވަހު ޙާއްޞަ ކުރެވިފައިވާނީ މާފުށީގެ ރައްޔިތުންނަށާއި ދިވެހިންނަށެވެ. މި ދެދުވަހު ގެސްޓު ހައުސްތަކުގެ ގެސްޓުންނަށް ވައްމާފުށްޓަށް އެރުމުގެ ފުރުޞަތު ނޯންނާނެވާހަކަމަށް މާފުށީ ކައުންސިލުން ވިދާޅުވެއެވެ.

ގެސްޓުންނަށް ވަށްމާފުށްޓަށް ޒިޔާރަތްކުރުމަށް ހުއްދަ ދެވޭނީ އާދިއްތަ އިން ބުރާސްފަތި ދުވަހަށެވެ. ވައްމަފުއްޓަށް ޒިޔާރަތް ކުރާ ފަރާތްތަކަން އެރަށުގެ ސާފުކަމާއި ރީތިކަން ދެމެހެއްޓުމަށް ކުނި މެނޭޖް ކުރެވޭނެ އިންތިޒާމުތަކެއްވެސް ވަނީ ހަމަޖައްސާފައެވެ.

ވައްމާފުށި ފެހި ކުރުމުގެ ގޮތުން ގަސްއިންދުމަށް ރަށުގެ ރައްޔިތުންނަށާއި، މާފުށީގައި ދިރިއުޅޭ އާއިލާތަކަށާއި، މުއައްސަސާ، ކުންފުނި، ކްލަބް ޖަމްޢިއްޔާތަކަށާއި، ވިޔަފާރިތަކަށްވެސް މިހާރުވަނީ ހުޅުވާލާފައެވެ.

ވައްމަފުއްޓަށް އެރުމަށް ހުއްދަ ހޯދުމަށް ގުޅޭނެ ނަންބަރުތައް:

1. 9993344 (ކައުންސިލް މެންބަރު ނަސީޙް މުޙައްމަދު)
2. 9656002 (ކައުންސިލް މެންބަރ މަރްޔަމް ޝިފާނާ)

މާފުށީ ޕިކްނިކް އައިލެންޑަކީ ރައްޔިތުން ދަތުރުގޮސްލާ، ހިތްހަމަޖެހޭ މާޙައުލެއް ހޯދައިދިނުމަށް ސަރުކާރުން ކުރިއަށްގެންދިޔަ މަޝްރޫޢެކެވެ. އަރޓިފިޝަލް ރަށެއްގެ ގޮތުގައި ހަދި މާފުށީ ޕިކްނިކް އައިލެންޑަކީ ރަށް ކައިރި ފަޅުތެރެއިން 2 ހެކްޓަރުގެ ބިން ހިއްކައިގެން ތަރައްޤީކުރި ރަށެކެވެ.