ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ހައްގުތަކަށް އުނިކަން އަންނަ ގޮތަކަށް މާލެ ސިޓީ ކައުންސިލުން ތަކުރާރުކޮށް އަމަލުތައް ބަހައްޓަމުންދާތީ އެކަން އެގޮތަށް ނުކުރުމަށް އެޗްޑީސީން އިލްތިމާސްކޮށްފިއެވެ.

ހުޅުމާލެ ދެވަނަ ފިޔަވަހިން ގޯތި ވިއްކުމަށް މިކޯޕަރޭޝަނުން ކުރި އިޢުލާނާއި ގުޅޭ ގޮތުން މާލެ ސިޓީ ކައުންސިލުން ނެރެފައިވާ ނޫސްބަޔާނާއި ގުޅޭގޮތުން ނެރުނު ބަޔާނުގައި ބުނެފައިވަނީ، ހުޅުމާލޭގެ ދެވަނަ ފިޔަވަހިން ގޯތި ވިއްކުމަށްޓަކައި ކުރި އިޢުލާނުގެ ދަށުން ބީލަމަށް ހުޅުވާލެވޭ 60 ބިމުގެ ޤާނޫނީ މިލްކުވެރިފަރާތަކީ އެޗްޑީސީ ކަމުގައި ވީހިނދު އެބިމުގެ މިލްކުވެރި ފަރާތުގެ ހައިޞިއްޔަތުން އެބިމުން ތަޞައްރުފް ކުރުމުގެ ފުރިހަމަ ބާރާއި އިޚްތިޔާރު ލިބިދީފައިވާކަމަށެވެ.

އަދި، އެޗްޑީސީއަކީ ކުންފުންޏާއި ބެހޭ ޤާނޫނުގެ ދަށުން ރަޖިސްޓަރީ ވެފައިވާ، އުފުލޭ މުދަލާއި ނުއުފުލޭ މުދާ ގާނޫނު ހުއްދަ ކުރާ ގޮތުގެ މަތިން ހޯދުމާއި ލިބިގަތުމާއި، ދެމިގެންވާ ގޮތަށް މުދާ ލިބިގަތުމުގެ ޤާނޫނީ ހައްޤު ލިބިދީފައިވާ ވަކި ޤާނޫނީ ޝަޚްސަކަށް ވީހިނދު، މިކުންފުނީގެ މުދަލެއް ކަމުގައިވާ ހުޅުމާލޭގެ ދެވަނަފިޔަވަހީގެ ބިން ވިއްކުމުގެ ފުރިހަމަ އިޚްތިޔާރު ލިބިދީފައިވާކަމަށެވެ.

އެހެން ކަމުން، ދިވެހިރާއްޖޭގައި ހެދިފައިވާ ޤާނޫތަކާއި ޤަވާއިދު ތަކުގެ ދަށުން އެޗްޑީސީއަށް ލިބިފައިވާ ޤާނޫނީ ޙައްޤަކަށް އުނިކަން އަންނާނެ، އަދި އިންވެސްޓަރުންގެ މެދުގައާއި ޢާންމު ފަރުދުންގެ މެދުގައި އެޗްޑީސީގެ އިތުބާރުގެ ގެއްލޭ ގޮތަށް މާލެ ސިޓީ ކައުންސިލުން ނެރެފައިވާ ބަޔާނަކީ އޭގައި ޙަޤީޤަތާއި ޚިލާފު އޮޅުވާލުންތަކެއް ހިމެނޭ ބަޔާނަކަށްވާތީ، އެކަން އެންމެ ހަރުކަށި އިބާރާތުން އެޗްޑީސީން ވަނީ ކުށްވެރިކޮށްފައެވެ.

ހުޅުމާލޭގެ ދެވަނަ ފިޔަވަހިން ގޯތި ވިއްކަން އެޗްޑީސީން ނިންމި ނިންމުމަކީ ޤާނޫނާއި ޚިލާފް ނިންމުމެއްކަން މާލެ ސިޓީ ކައުންސިލުން ބުނެފައިވާ ބުނުމަކީ، އެކުންފުނީގެ ފަރާތުން މާލެ ސިޓީ ކައުންސިލްގެ މައްޗަށް ދިވެހިރާއްޖޭގެ ސިވިލް ކޯޓަށް ހުށަހަޅާފައިވާ ސިވިލްކޯޓުން ނެރެފައިވާ ވަގުތީ ޢަމުރުގައި ބަޔާންކޮށްފައިވާ ކަންކަމާއި ޚިލާފު ބަޔާނެއް ކަމަށް އެޗްޑީސީން ވަނީ ބުނެފައެވެ.

އަދި ޝަރީޢަތުން ވަކިގޮތެއް ކަނޑައަޅުއްވަންދެން، ހުޅުމާލޭގެ ބިމުގެ މިލްކުވެރިފަރާތުގެ ހައިސިއްޔަތުން އެޗްޑީސީއަށް ލިބިދިފައިވާ އެންމެހައި ޤާނޫނީ ހައްޤުތަކާއި، ހުޅުމާލޭގެ ބިމާއި ގުޅިގެން އެކޯޕަރޭޝަނުން ކުރަމުން އައި އެންމެހައި ކަންކަމާއި، ހުޅުމާލެ ތަރައްޤީކުރުމާއި ބެލެހެއްޓުމުގެ ގޮތުން މިކޯޕަރޭޝަނުން ކުރަމުން އައި ކަންކަން، މިމައްސަލަ ވަކިގޮތަކަށް ނިމެންދެން ކުރުން މަތީ ދެމިހުރުމުގެ ހައްޤު މިކޯޕަރޭޝަނަށް ކޯޓުގެ އަމުރުން ލިބިދީފައިވީ ހިނދު، ދިވެހިރާއްޖޭގެ ކޯޓަކުން މިކަން އެނޫން ގޮތަކަށް ކަނޑަނާޅާ ހިނދަކު މިއެންމެހައި ހައްޤުތައް ޤާނޫނީ ގޮތުން އެޗްޑީސީއަށް ލިބިގެންވާކަމަށެވެ.

މީގެ އިތުރުން، މާލޭ ސިޓީ ކައުންސިލުން މިފަހަކަށް އައިސް، އެޗްޑީސީގެ ޙައްޤުތަކަށް އުނިކަން ލިބޭފަދަ ގޮތަކަށް މިފަދަ ބަޔާންތައް ނެރެމުންދިއުމުގެ ސަބަބުން، އެކޯޕަރޭޝަނަށް ނުހަނު ގެއްލުން ލިބެމުންދާތީވެ، މިފަދަ ކަންކަން ތަކުރާރު ނުކުރެއްވުމަށް މާލޭ ސިޓީ ކައުންސިލަށް އެޗްޑީސީން ވަނީ އިލްތިމާސް ކޮށްފައެވެ.