ޕްރެޒިޑެންޓްސް ކަޕް: އީގަލްސް އަތުން މާޒިޔާ އަށް ހަނި މޮޅެއް

ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިރޭ ކްލަބް އީގަލްސް ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން މުބާރާތުގެ ދެވަނަ މޮޅު ހޯދައިފިއެވެ.

ރަސްމީ ފުޓްބޯޅަ ދަނޑުގައި ކުޅުނު މި މެޗު މާޒިޔާ އިން ކާމިޔާބުކުރީ 1-2 ގެ ނަތީޖާއަކުންނެވެ.

މާޒިޔާ އަތުން މިރޭ އީގަލްސް ބަލިވުމާއެކު މިއީ، މި މުބާރާތުގައި އީގަލްސް ބަލިވި ދެވަނަ މެޗެއެވެ. މުބާރާތުގައި ކުޅުނު ފުރަތަމަ މެޗުގައި ޓީސީ ސްޕޯޓްސް ކްލަބް އަތުންވެސް އީގަލްސް ވަނީ ބަލިވެފައެވެ.

މާޒިޔާ އާއި އީގަލްސް ބައްދަލުކުރި މެޗު ފަށައިގެން ފުރަތަމަ ހާފުގައި ލަނޑު ޖަހާނެ ގިނަ ފުރުޞަތުތަކެއް މާޒިޔާއިން ވަނީ ތަނަވަސްކޮށްފައެވެ. އެގޮތުން ހަމްޒާ މުޙައްމަދު އަދި ކޮނޭލިއަސް ސްޓެވާޓް (ކޯނޭ) އަށް ލިބުނު ފުރުޞަތުތައް ފާހަގަކޮށްލެވެއެވެ. މެޗުގައި މާޒިޔާއިން ލީޑު ނެގީ ފުރަތަމަ ހާފުގެ އިތުރު ވަގުތުގެ ތެރޭގައެވެ. މި ލަނޑު ހަމްޒާ މުހައްމަދު ކާމިޔާބުކޮށްދިނީ އީގަލްސްގެ ކީޕަރ ބޯ މަތިން ފޮނުވާލައިގެންނެވެ.

މެޗުގެ ދެވަނަ ހާފުގައިވެސް މާޒިޔާއިން ވަނީ ރަނގަޅު ކުޅުމެއް ދައްކާފައެވެ. މާޒިޔާގެ ދެވަނަ ލަނޑު 71 ވަނަ މިނެޓުގައި ހަމްޒާ މުހައްމަދުގެ އެހީތެރިކަމާއެކު ކާމިޔާބުކޮށްދިނީ، މެޗުގެ މޮޅު ކުޅުންތެރިޔާގެ މަގާމް ހޯދި ޙުސައިން ނިހާންއެވެ. މި މެޗުގައި އީގަލްސް އިން ކާމިޔާބުކުރި ހަމައެކަނި ލަނޑު 85 ވަނަ މިނެޓުގައި ކާމިޔާބުކޮށްދިނީ، ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް އަލީ އަޒްވާން އަބްދުލް އަޒީޒްއެވެ. މިއީ އީގަލްސް އަށް އޭނާ ކުޅެދިން ފުރަތަމަ މެޗެއެވެ.

ޕްރެޒިޑެންޓްސް ކަޕް ފުޓްބޯޅަ މުބާރާތުގައި މާދަމާވެސް 2 މެޗެއް ކުޅުމަށް ވަނީ ހަމަޖެހިފައެވެ. ފުރަތަމަ މެޗުގައި މާދަމާ ހަވީރު ޔުނައިޓެޑް ވިކްޓްރީ ނުކުންނަނީ ދަ ގްރާންޑޭ އާއި ދެކޮޅަށެވެ. މާދަމާ ރޭ ކުޅޭ މެޗުގައި ބައްދަލުކުރާނީ ކްލަބް ވެލެންސިއާ އާއި ކްލަބް ގްރީން ސްޓްރީޓްސް އެވެ.