ވެރިކަން ކުރާ މައި ޕާޓީ އެމްޑީޕީގެ މާލެ ސިޓީގެ މެމްބަރުންނާއި ރައީސް ނަޝީދު ބައްދަލު ކުރުމަށް ހަމަޖެހިއްޖެއެވެ.
އެމްޑީޕީން މާލޭގައި ސިޔާސީ ހަރަކާތްތައް ނުބާއްވާތާ ގިނަ ދުވަސްތަކަށްފަހު މިއަދު ހަވީރު ބާއްވާ ބާއްދަލުވުން ޚާއްސަކޮށްފައިވަނީ މާލެ ސިޓީގެ ރައްޔިތުންނަށެވެ. މިއަދު ހަވީރު 4 ޖަހާއިރު ސަލްޓަމްޕާކުގައި އޮންނަ މިބައްދަލުވުމުގައި އެމްޑީޕީގެ ރައީސް މުހައްމަދު ނަޝީދު ބައިވެރިވެ ވަޑައިގަންނަވާ ގޮތަށް ވަނީ ހަމަޖެހިފައެވެ.
Party ge Raees, Raees @MohamedNasheed baiverive vadainnavaa MDP Malé City ge bahdhaluvun
maadhamaa (21/12) haveeru 4:00 ga Sultan Park ga onnaane.— MDP Secretariat (@MDPSecretariat) December 20, 2021
މިއަހަރުގެ މެއި މަހުގެ 6 ވަނަ ދުވަހު ރައީސް ނަޝީދަށް ދިން ނުރައްކާތެރި ޓެރިސްޓް ހަމަލާއަށްފަހު، އެމަނިކުފާނު އެނބުރި ރާއްޖެ ވަޑައިގަތުމަށްފަހު ވަނީ ސެކިއުރިޓީ ވަރަށް ވަރުގަދަކޮށްފައެވެ. ސެކިއުރިޓީގެ ކަންކަން ހުރި ގޮތުން ރައީސް ނަޝީދަށް ކުރިން އުޅުއްވި ގޮތަށް އުޅުމަށް ވަނީ ދަތިތަކާއި ކުރިމަތިވެފައެވެ. އެމްޑީޕީގެ މާލެ ސިޓީ ރައްޔިތުންނާއި ރައީސް ނަޝީދު މިއަދު ބައްދަލު ކުރާއިރު، މާލެ ސިޓީގައި އެމްޑީޕީގެ ތާއީދު ވަރަށް ބޮޑަށް ކުޑަވެފައިވާކަމަށް ބައެއް ފަރާތްތަކުން ދަނީ ބުނަމުންނެވެ.
ޚާއްސަކޮށް، ނިމިދިޔަ ކައުންސިލް އިންތިޚާބުގައި މާލެ ސިޓީ ކައުންސިލްގެ ސާފު އައުލަބިއްޔަތު އިދިކޮޅު ޕީޕީއެމްއިން ނަގާފައިވުމަކީ އެމްޑީޕީގެ ތާއިދު ނެތްކަން ހާމަވާ ކަމެއްކަމަށް ގިނަ ބަޔަކު ދެކެވެއެވެ. ވެރިކަމަށް ބާކީ ދެ އަހަރު އޮތްއިރު މާލޭ ރައްޔިތުންނަށް އެމްޑީޕީން ވެފައިވާ ވައުދުތަކުގެ ތެރެއިން ކުޑަ މިންވަރެއްވެސް ފުއްދިފައި ނުވާކަމީ މާލޭ ރައްޔިތުންގެ އެންމެ ބޮޑު ޝަކުވާއެވެ.
ޚާއްސަކޮށް ބޯހިޔާވަހިކަމުގެ މައްސަލައަކީ މާލޭ ރައްޔިތުންގެ އެންމެ ބޮޑު ޝަކުވާއެވެ. މިހާރު އޮތް ސަރުކާރަށް ވެރިކަން ކުރުމަށް ބާކީ ދެ އަހަރު އޮތްއިރު، މި ދެ އަހަރުގެ ތެރޭގައި މިކަންކަން ހާސިލް ކުރެވިދާނެ ކަމާއިމެދު ގިނަ ބަޔަކު ދަނީ ސުވާލު އުފައްދަމުންނެވެ.
