މިއަދު ފެށި ޕްރެޒިޑެންޓްސް ކަޕް ފުޓްބޯޅަ މުބާރާތުގައި ދަ ގްރާންޑޭ ސްޕޯޓްސް ކްލަބް ފަސޭހަކަމާއެކު ބަލިކޮށް ކްލަބް ގްރީން ސްޓްރީޓްސް އިން ފެށުން ރަނގަޅުކޮށްފިއެވެ.
ރަސްމީ ފުޓްބޯޅަ ދަނޑުގައި ކުޅުނު މި މެޗު ގްރީން ސްޓްރީޓްސް އިން ކާމިޔާބުކުރީ 0-5 ގެ ނަތީޖާއަކުންނެވެ.
ހަތަރު އަހަރުގެ މެދުކެނޑުކަމަކަށް ފަހު ޕްރެޒިޑެންޓްސް ކަޕުން 2022-2021 އަހަރުގެ ފުޓްބޯޅަ ސީޒަން މިހާރު ވަނީ ފަށާފައެވެ. މިއަހަރުގެ ފްރެޒިޑެންޓްސް ކަޕް ފުޓްބޯޅަ މުބާރާތުގައި ވާދަކުރަނީ އެންމެ ފަހުން ނިމުނު ދިވެހި ޕްރިމިއާ ލީގުުގައި ވާދަކުރި 8 ޓީމެއެވެ. މުބާރާތް ކުރިޔަށްދާނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި ކުޅެ، އެންމެ ގިނަ ޕޮއިންޓް ހޯދާ ދެ ޓީމު ފައިނަލަށް ދަތުރުކުރާ ގޮތަށެވެ.
ގްރީން ސްޓްރީޓްސް އާއި ދަ ގްރާންޑޭ ބައްދަލުކުރި މެޗުގައި ފެނިގެންދިޔަ ފުރަތަމަ ލަނޑަކީ ދަ ގްރާންޑޭގެ އަހުމަދު ނައުފަލް ބޮލުގައި ޖެހިފައި ބައިކޮޅަށް ވަން ލަނޑެކެއެވެ. މެޗުގެ ފުރަތަމަ ހާފް ނިމުނީ 0-1 ގެ ނަތީޖާއަކުންނެވެ.
ދެވަނަ ހާފް ފަށައިގެން ގްރީން ސްޓްރީޓްސްގެ ދެވަނަ ލަނޑު 59 ވަނަ މިނެޓުގައި ކާމިޔާބުކޮށްދިނީ، އަންސަރު އިބްރާހިމްއެވެ. އަދި 68 ވަނަ މިނެޓުގައި ޢަބްދުﷲ ޔާމިން ވަނީ އިތުރު ލަނޑެއް ޖަހާ ލީޑު ފުޅާކޮށްދީފައެވެ. މި ލަނޑު ޖެހިތާ އިރުކޮޅެއް ފަހުން ގްރީންއަށް ލިބުނު ހިލޭ ޖެހުމަކުން މުހައްމަދު ސާއިފް ވަނީ ގްރީންގެ ހަތަރު ވަނަ ލަނޑު ކާމިޔާބުކޮށްދީފައެވެ. ގްރީންއިން މި މެޗުގައި ޖެހި ފަސްވަނަ ލަނޑު 75 ވަނަ މިނެޓުގައި ކާމިޔާބުކޮށްދިނީ، އެޓީމުގެ ކެޕްޓަން ރިލްވާން ވަހީދުއެވެ.
ޕްރެޒިޑެންޓްސް ކަޕުގައި މިރޭ ކުޅޭ މެޗުގައި ޔުނައިޓެޑް ވިކްޓްރީ (ޔޫވީ) ބައްދަލުކުރާނީ ކްލަބް ވެލެންސިއާއެވެ.
ކޮމެންޓު ފޮނުވާ