ޢަރަބިއްޔާ ސްކޫލްގެ ދަރިވަރުން ކިޔެވުމަށް ވަގުތީ ސްކޫލެއް ނޭޅެންވީ ސަބަބަކީ ކޮބައިކަމަށް ވިދާޅުވެ ކުރީގެ އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދު ސުވާލުކުރައްވައިފިއެވެ.
ޢަރަބިއްޔާ ސްކޫލްގެ ޢިމަރާތުގައި ރެނދުލައި އެތަނަކީ ދަރިވަރުން ކިޔެވުމަށް ރާއްކާތެރި ތަނަކަށް ނުވާތ ީޢަރަބިއްޔާ ސްކޫލްގެ ދަރިވަރުންގެ ކިޔެވުން ވަގުތީ ގޮތުން ޢިއްޒުއްދީން ސްކޫލަށް ބަދަލުކުރުމަށް އެޑިއުކޭޝަން މިނިސްޓްރީން ނިންމުމާއި ގުޅިގެން ބެލެނިވެރިން އަންނަނީ ކަންބޮޑުވުން ފާޅުކުރަމުންނެވެ. އިއްޒުއްދީނަށް ޢަރަބިއްޔާ ދަރިވަރުން ބަދަލުކުރުމަކީ އެކުދިންގެ ހައްގުތަކަށް ހުރަސް އެޅި ޢަރަބި ތައުލީމް އުގެނުމަށް ދޭ އަހަމިއްޔަތު ކުޑަވާނެކަމެއްގެ ގޮތުގައ ބެލެނިވެރިން ވަނީ ސިފަކޮށްފައެވެ.
ޢިއްޒުއްދީނަށް ޢަރަބިއްޔާ ދަރިވަރުން ބަދަލުކުރުމަށް ސަރުކާރުން ނިންމި ނިންމުމާއި ގުޅިގެން ޑރ.ޝަހީމް ވިދާޅުވީ، ދަރުމަވަންތަ ސްކޫލް ޢިމާރާތް ބާވެ ހަލާކުވެ ނުރައްކަލަށް ހުށައެޅުމުން ކުޑަ މުއްދަތެއްގައި ވަގުތީ ސްކޫލެއް ހަދައި އެތަނައް ދަރިވަރުން ވަގުތީ ޢިމާރާތާކަށް ބަދަލުކުރިކަމަށެވެ. އަދި ވަގުތުން ބަޖެޓް ހަމަ ޖައްސައި ދާއިމީ ސްކޫލެއް އަޅަން ފެށިކަމަށްވެސް ޑރ.ޝަހީމް ވިދާޅުވިއެވެ. ދަރުމަވަންތަ ސްކޫލްގެ ދާއިމީ އައު ޢިމާރާތުގެ މަސައްކަތް މިހާރު ނިމެމުން އަންނަކަން ފާހަގަކުރައްވާ ޑރ.ޝަހީމް ވަނީ ޢަރަބިއްޔާ ސްކޫލާމެދު އެގޮތަށް ޢަމަލު ނުކުރެވެނީ ކީއްވެތޯ ސުވާލުކުރައްވާފައެވެ.
ދަރުމަވަންތަ ސްކޫލް ބޮަލަށް ވެއްޓޭތީ ކުޑަ މުއްދަތެއްގައި ވަގުތީ ސްކޫލެއް ހަދައި އެތަނައް ދަރިވަރުން ބަދަލުކޮށް، ވަގުތުން ބަޖެޓް ހަމަ ޖައްސައި ދާއިމީ ސްކޫލެއް އަޅަން ފެށި. މިހާރު އެތަން ނިމެމުން އެދަނީ ވިލާ ކޮލެޖް ކުރިމަތީގަ.. ޢަރަބިއްޔާ ސްކޫލާމެދު ކީއްވެ އެހެން ނުހަދަންވީ؟ pic.twitter.com/giOAO5jeKy
— Mohamed Shaheem Ali Saeed (@Mohamedshaheem1) December 18, 2021
ޢަރަބިއްޔާ ޢިމާރާތުގައި ރެނދުލައިގެން ބެލެނިވެރިން އަންނަނީ ކުދިންގެ ރައްކާތެރިކަމާމެދު ސުވާލު އުފައްދާ ކަންބޮޑުވުން ފާޅުކުރަމުންނެވެ. މިގޮތުން ޢަރަބިއްޔާގެ ބެލެނިވެރިން ވަނީ ބައްދަލުވުމެއް ބާއްވާފައެވެ. ޢަރަބިއްޔާގެ ބެލެނިވެރިން ބޭއްވި ބައްދަލުވުމުގައި ހުރިހާ ބެލެނިވެރިން އިއްތިފާޤުވެފައިވަނީ، ޝެއަރ ކުރާ ގޮތަށް ޢިއްޒުއްދީނުގެ އިމާރާތަށް ދަރިވަރުން ބަދަލުނުކުރުމަށެވެ. އެގޮތަށް ޝެއަރ ކުރުމުގެ ސަބަބުން ދަރިވަރުންގެ ކިޔެވުމާއި އުޅުމާއި އަޚްލާޤު އެއްކޮށް ހަލާކުވާނެ ކަމަށް ބެލެނިވެރިން ފާހަގަކުރެއެވެ.
ނަމަވެސް ޢަރަބިއްޔާ ސްކޫލްގެ ދަރިވަރުން ޢިއްޒުއްދީން ސްކޫލަށް ބަދަލުކުރުމަށް ނިންމާ އެޑިއުކޭޝަން މިނިސްޓްރީން ނެރުނު ނޫސްބަޔާނެއްގައި ވަނީ ޢަރަބިއްޔާ ސްކޫލް ޢިމާރާތަކީ ކުދިންނަށް ކިޔަވައިދިނުމަށް އެންމެ ރައްކާތެރިތަނަކަށްނުވާތީ ވަގުތީގޮތުން އެކަމަށް ޙައްލެއް ގެނައުމަށް އެމިނިސްޓްރީއިން ނިންމަވާފައިވާކަމަށެވެ.
އެޑިއުކޭޝަންގެ އެ ނިންމުން ކުށްވެރިކޮށް ޢަރަބިއްޔާ ސްކޫލްގެ ބެލެނިވެރިން ނެރުނު ބަޔާނުގައި ވަނީ، ޢަރަބިއްޔާ ސްކޫލުގެ ދަރިވަރުންގެ ކިޔެވުމުގެ ޙައްޤައް ހުރަސް އެޅި، އެކުދިންގެ ޢަރަބި އިސްލާމީ މަންޙަޖުގެ ތަޢުލީމު އެކީއެކަށް ފުނޑުފުނޑު ވެގެން ދާނެހެން އެޑިއުކޭޝަނުން ނިންމާފައިވާ ނިންމެވުން އެންމެ ހަރުކަށި ޢިބާރާތުން ކުށްވެރިކުރާކަމަށެވެ. އަދި އެއީ އެއްވެސް ޙާލެއްގައި ބަލައިގަނެވޭނެ ނިންމެވުމެއް ނޫންކަމަށާއި، އެފަދަ އަނިޔާވެރި، ބޭއިންސާފު ނިންމެވުމަކަށް ކިޔަމަންވެ ޅަދަރިންގެ ޢަރަބި އިސްލާމީ ތަޢުލީމު ފަނާވެ ދިއުމަށް ޖާގަ ދެވެން ނެތް ކަމަށާއި، އެނިންމެވުމާ އެއްގޮތަށް ޢަމަލު ކުރެވެން ނެތް ކަމުގައިވެސް ބަޔާނުގައިވެއެވެ.
