ފަސޭހަކަމާއެކު ވެލެންސިއާ ބަލިކޮށް މާޒިޔާއިން ޝީލްޑް އުފުލާލައިފި

އައު ސީޒަން ފެށުމުގެ ގޮތުން ކުޅުނު އެފްއޭއެމް ޗެރިޓީ ޝީލްޑް މެޗު ފަސޭހަކަމާއެކު މާޒިޔާއިން ކާމިޔާބުކޮށް ރެކޯޑެއް ހަދައިފިއެވެ.

ރަސްމީ ފުޓްބޯޅަ ދަނޑުގައި މިރޭ ކުޅުނު ޗެރިޓީ ޝީލްޑް މެޗު މާޒިޔާއިން ކާމިޔާބުކުރީ 0-5 ގެ ނަތީޖާއަކުންނެވެ. މި ނަތީޖާއާއެކު މާޒިޔާ ވެގެންގޮސްފައިވަނީ އެންމެ ގިނަ ފަހަރު ޝީލްޑް މެޗު ކާމިޔާބުކުރި ޓީމަށެވެ. އެއީ ހަތަރު ފަހަރު ޝީލްޑް މެޗު ކާމިޔާބުކޮށްގެންނެވެ. ދެވަނައަށް އެންމެ ގިނަ ފަހަރު މިމުބާރާތް ކާމިޔާބުކުރީ ވީބީ އައްޑޫ އެފްސީއެވެ. އެއީ ތިން ފަަހަރު ޝީލްޑް މެޗު ކާމިޔާބުކޮށްގެންނެވެ.

މާޒިޔާ އާއި ވެލެންސިއާ ބައްދަލުކުރި މެޗު ފަށައިގެން މާ ގިނައިރުތަކެއް ނުވަނީސް އެޓީމުން ވަނީ ލަނޑު ޖަހާ ލީޑު ނަގާފައެވެ. މި ލަނޑު މެޗުގެ ހަތަރު ވަނަމިނެޓުގައި ކާމިޔާބުކޮށްދިނީ، އިބްރާހިމް އައިސަމްއެވެ. މާޒިޔާގެ ދެވަނަ ލަނޑު މެޗުގެ ފަނަރަ ވަނަ މިނެޓުގައި ކާމިޔާބުކޮށްދިނީ، އިބްރާހިމް ވަހީދުހަސަންއެވެ. މާޒިޔާއިން ވަނީ ފުރަތަމަ ހާފް ނިމުމުގެ ކުރިން ތިންވަނަ ލަނޑު ޖަހާ ލީޑު އިތުރަށް ފުޅާކޮށްފައެވެ. މި ލަނޑު މެޗުގެ 39 ވަނަ މިނެޓުގައިކާމިޔާބުކޮށްދިނީ ކޯނޭއެވެ.

މެޗުގެ ދެވަނަ ހާފް ފަށައިގެން ޕެނަލްޓީ އޭރިޔާ ތެރެއިން ކޯނޭއަަށް ކުރި ފައިލަކާއި ގުޅިގެން މާޒިޔާއަށް ވަނީ ޕެނަލްޓީއެއް ލިބިފައެވެ. 56 ވަނަ މިނެޓުގައިހަމްޒާ މުހައްމަދު ވަނީ މި ޕެނަލްޓި ކާމިޔާބުކޮށް 0-4 އަކަށް މެޗުގެ ނަތީޖާ ބަދަލުކޮށްލާފައެވެ. މާޒިޔާގެ ފަސް ވަނަ ލަނޑު 59 ވަނަ މިނެޓުގައިކާމިޔާބުކޮށްދިނީ، ހުސައިން ނިހާންއެވެ.

5-0 ގެ ނަތީޖާއަކުން މާޒިޔާއިން ހަތަރު ވަނަ ފަހަރަށް ޝީލްޑް މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިޔާގެ މަގާމް ހޯދީ އިބްރާހިމް އައިސަމްއެވެ.

ޗެރިޓީ ޝީލްޑް މެޗުން ރާއްޖޭގެ ފުޓްބޯޅަ ސީޒަން މިރޭ ފެށިއިރު، ފުރަތަމަ ބާއްވާ މުބާރާތަކީ ޕްރެޒިޑެންޓްސް ކަޕް ފުޓްބޯޅަ މުބާރާތެއެވެ. ޕްރެޒިޑެންޓްސް ކަޕްގެމެޗުތައް ފަށާނީ އަންނަ އާދީއްތަ ދުވަހުއެވެ.