ރޭ އަވަހާރަވި ކޮމަންޑޫ ދާއިރާގެ މެންބަރު މަރްހޫމް ޙުސައިން ވަހީދަކީ ރާއްޖެ ޑިމޮކްރަސީއަށް ކުރި ދަތުރުގައި މުހިންމު ދައުރެއް އަދާކުރެއްވި އިޚްލާސްތެރި ބޭފުޅެއްކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލިހުގެ އެމްޑީޕީއަށް ނިސްބަތްވާ މެމްބަރު، ހުސައިން ވަހީދު އަވަހާރަވީ ކެންސަރުގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް ރޭ މެންދަމު 1:30 ހާއިރުއެވެ. ހުސެއިންވަނީދު ވަނީ ގިނަ ދުވަސްތަނެއް ވަންދެން ކެންސަރުގެ އާލާސްކަންފުޅަށް ފަރުވާ ހޯއްދަވަމުން ގެންދަވާތާފައެވެ.
މެންބަރު ޙުސައިން ވަޙީދު އަވަހާރަ ވުމާއި ގުޅިގެން އެކަމުގެ ހިތާމަ ފާޅުކުރައްވާ އާއިލާއަށް ތަޢުޒިޔާ ވިދާޅުވެ ރައީސް ނަޝީދު ކުރެއްވި ޓްވީޓްގައި ވަނީ، މެންބަރު ޙުސައިން ވަޙީދަކީ ރާއްޖޭގައި ގިނަ ޕާޓީތައް އެކުލެވޭ ޑިމޮކްރަސީއަށް އަނބުރާލުމުގައި ބޮޑު ދައުރެއް އަދާކުރެއްވި އިޚްލާސްތެރި ބައިވެރިއެއްކަމަށެވެ. އެމްޑީޕީގެ ވަރުގަދަ ތަނބެއްކަމަށް ރައީސް ނަޝީދު ސިފަކުރެއްވިއެވެ.
MP Hussain Waheed akee Dhivehi Raajjeyga gina party ekulevey democracy ah anburaalumuga bodu dhaureh adhaa kurevvi ihlaastheri baiverieh. MDP ge varugadha than’beh. Maaiy Allah marhoom ah suvaruge minvaru kuravva, aailaa ah kehtherikan dhevvashi. Aameen pic.twitter.com/WXLQAZs86c
— Mohamed Nasheed (@MohamedNasheed) December 14, 2021
ހުސައިން އަވަހާރަވުމާއި ގުޅިގެން ރައްޔިތުންގެ މަޖިލީހުގެ މެންބަރުންނާއި ސިޔާސީ ގޮތުން އެކުގައި މަސައްކަތް ކުރެއްވި ބޭފުޅުންނާއި ސަރުކާރުގެ އިސްވެެރިން ގެންދަވަނީ ތައުޒިޔާ ވިދާޅުވަމުންނެވެ.
ހުސައިން ވަހީދުގެ ދުނިޔޭގައި ތިއްބެވީ ތިން ބޭފުޅެކެވެ. އެއީ ފިރިހެން ބޭފުޅަކާއި ދެ އަންހެން ބޭފުޅެކެވެ. ހުސެއިން ވަހީދުގެ އަނބިކަނބަލުންވެސް ދުނިޔޭގައި އެބަ ހުންނެވިއެވެ.
ހުސެއިން ވަހީދުވަނީ 17 ވަނަ ރައްޔިތުންގެ މަޖިލީހަށްވެސް އިންތިޚާބު ވެވަޑައިގެންފައެވެ.
އަޅުގަނޑު އެންމެ ފުރަތަމަވެސް ވަރަށް ގިނަ ދުވަސް ރާއްޖެއިން ބޭރުން ބޭސްފަރުވާއެއް ކުރުމަށްފަހު މިއަދު އަނެއްކާވެސް މިހިސާބަށް އައިސް ތިޔަ އެންމެބޭފުޅުންނާއި ބައްދަލުވެ އެއްޗެއް ބުނެލަން ލިބުމުން މާތްﷲ ސުބުހާނަހޫ ވަތަޢާލާގެ ހަޒުރަތަށް ޝުކުރު ކުރަން. އަދި ހަމައެއާއިއެކު އަޅުގަނޑު ބޭރުގައި ހޭދަކުރި ދުވަސްތަކުގައި އަޅުގަނޑުގެ ވަރަށް ގާތް ރައްޓެހިންނާއި، ދާއިރާގެ އެކިއެކި ރައްޔިތުންނާއި، ހެޔޮއެދޭ އެތައް މެމްބަރުންނެއް އަޅުގަނޑަށް ގުޅައި ހާލުބަލަމުން ދިޔަ ކަމަށްޓަކައި އުފާކޮށް އެންމެ ބޭފުޅުންނަށް ޝުކުރު ދަންނަވަން. އަދި އަޅުގަނޑަށް ހެޔޮ ދުޢާ ކޮށްދެއްވި އަދި ހެޔޮ ދުޢާކޮށްދެއްވަމުންދާ ހުރިހާ އަހުންނާއި އުހުތުންނަށް ހިތުގެ އެންމެ އަޑިން ޝުކުރު ދަންނަވަން.
– މާރިޗު 29 ގެ ޖަލްސާގައި ހުސެއިން ވަހީދު ވިދާޅުވިއެވެ.
