ސިވިލް ކޯޓާއި ޑްރަގް ކޯޓް ރިސެސްއަށް ނުދާން ނިންމައިފިއެވެ.
އަހަރަކު ދެފަހަރު ކޯޓްތައް ރިސެސްއަށް ދެއެވެ. އެގޮތުން ޑިސެމްބަރު މަހަކީ ކޯޓްތައް ދެވަނަ ފަހަރަށް ރިސެސްއާދާ މުއްދަތެވެ. ނަމަވެސް މިއަހަރުގެ ދެވަނަ ރިސެސްއަށް ނުދިއުމަށް ސިވިލް ކޯޓާއި ޑްރަގް ކޯޓް ރިސެސްއަށް ނުދިއުމަށް ނިންމާފައިވާތީ އެކޯޓަށް މައްސަލަތައް ބަލައިގަނެ ޝަރިޢަތްތައް ކުރިއަށް ގެންދާނެއެވެ.
ސިވިލް ކޯޓުން ބުނީ، ކޮންމެ އަހަރެއް ޑިސެމްބަރު 1އިން 20އަށް އެކޯޓް ރިސެސްގައި އޮންނަ މުއްދުގައި މިއަހަރު ރިސެސްއަށް ނުދިއުމަށް އެކޯޓްގެ ޤާޟީންގެ ޢާންމު މަޖިލީހުން ނިންމާފައިވާކަމަށެވެ.
ޑްރަގް ކޯޓުން ބުނީ މި މަހުގެ 9 ން 31 އަށް ރިސެސްއަށް ދިއުމަށް އަހަރީ ކަލަންޑަރުގައި ކުރިން ތާވަލު ކުރެވިފައި ވީނަމަވެސް، މި މުއްދަތުގައި ރިސެސްއަށް ނުދާން އެ ކޯޓުން ކަނޑައަޅާފައިވާކަމަށެވެ. އެގޮތުން އެ ކޯޓުގެ ފަނޑިޔާރުންގެ މަޖިލީހުގައި މި ކަމާ މެދު މަޝްވަރާ ކުރެއްވުމަށް ފަހު، ހުރިހާ ފަނޑިޔާރުންގެ އިއްތިފާޤުން މި ގޮތަށް ނިންމަވާފައި ވަނީ ޞިއްޙީ ކުއްލި ނުރައްކަލުގެ ޙާލަތު އަދިވެސް ދެމިއޮތުމުން ހަލުވިމިނެއްގައި މައްސަލަތައް ކުރިއަށް ގެންދިއުމަށް ދަތިތައް ކުރިމަތިވެފައިވާތީ، މިވަގުތު ރިސެސްއަށް ހިނގައްޖެނަމަ ޝަރީޢަތްތައް އިތުރަށް ލަސްވެދާނެކަމަށް ފެނިވަޑައިގަންނަވާތީ، އެކަމަށް ރިޢާޔަތްކޮށް ކަމަށެވެ.
ޑްރަގް ކޯޓުން މިދިަޔަ އަހަރުވެސް ރިސެސްއަށް ގޮސްފައެއް ނުވެއެވެ.
ޑްރަގް ކޯޓާއި ސިވިލް ކޯޓް ރިސެސްއަށް ނުދިއުމަށް ނިންމާފައިވާއިރު، ސުޕްރީމް ކޯޓު މިހާރު އޮތީ ރިސެސްގައެވެ. ސުޕްރީމް ރިސެސްއަށް ދިޔައީ މިމަހުގެ 30ގައެވެ. އަދި ފެމިލީ ކޯޓުވެސް މިމަހުގެ 16 އިން 31 އޮންނާނީ ރިސެސްގައިކަމަށް އެކޯޓުން ބުންޏެވެ. ފެމިލީ ކޯޓުން ބުނީ، ރިސެސްގެ މުއްދަތުގެތެރޭގައި މައްސަލަތަކުގެ ޝަރީޢަތްތައް ހިންގުން މަދުކުރެވޭނެކަމަށެވެ.
