މިހާރު ކުރިޔަށްދާ ކްލަބް މޯލްޑިވްސް ކަޕްގެ ސެމީ ފައިނަލުގެ ފުރަތަމަ ދެ ޖާގަ ޕްރިޒަން ކްލަބް އަދި އެފް.އެސް.އެމް އިން ހޯދައިފިއެވެ.
މުބާރާތުގެ ކުއާޓާ ފައިނަލުގެ ފުރަތަމަ މެޗުގައި ރޭ ޕްރިޒަން ކްލަބް ނުކުތީ އެމްއޭސީއެލް އާއި ދެކޮޅަށެވެ. މި މެޗުގެ ފުރިހަމަ ވަގުތު ހަމަވިއިރު، ދެ ޓީމުވެސް ވަނީ 2-2 ގެ ނަތީޖާއަކުން އެއްވަރުވެފައެވެ. އެހެންކަމުން މެޗުގެ ނަތީޖާ ނެރުމަށް ޖެހުނީ ޕެނަލްޓީ ޖަހާށެވެ. ޕެނަލްޓީގައި އެމްއޭސީއެލްގެ މައްޗަށް ޕްރިޒަން ކްލަބުން ކުރިހޯދީ 7-6 ގެ ނަތީޖާއަކުންނެވެ.
މުބާރާތުގައި ރޭ ކުޅުނު ކުއާޓާ ފައިނަލުގެ ދެވަނަ މެޗުގައި އެފްއެސްއެމް ނުކުތީ ވަރުގަދަ އެޗްޑީސީ އާއި ދެކޮޅަށެވެ. މި މެޗުގައި ފުރަތަމަ ލަނޑު ޖަހާ ލީޑު ނެގީ އެފްއެސްއެމް އިންނެވެ. ނަމަވެސް ފުރަތަމަ ހާފްގެ އެންމެ ފަހު ވަގުތުގައި އެޗްޑީސީން ވަނީ ފަހަތުން އަރައި ދެ ލަނޑު ޖަހައި މެޗުގެ ނަތީޖާ އެޗްޑީސީ ކޮޅަށް އަނބުރާލާފައެވެ. އެޗްޑީސީއަށް ލީޑުގައި މާގިނައިރު އޮތުމުގެ ފުރުޞަތު ނުދީ އެފްއެސްއެމްއިން ވަނީ އެޓީމަށް ލިބުނު ހިލޭ ޖެހުމަކުން ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ. މި މެޗުގެ ފުރިހަމަ ވަގުތު ހަމަވިއިރު 2-2 ގެ ނަތީޖާއަކުން އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީގައި ވަރުގަދަ އެޗްޑީސީގެ މައްޗަށް އެފް.އެސް.އެމް އިން ކުރިހޯދީ، 7-6 ގެ ނަތީޖާއަކުންނެވެ.
މި މުބާރާތުގެ ސެމީ ފައިނަލުގައި އެފްއެސްއެމް ނުކުންނާނީ ޕްރިޒަން ކްލަބާ ދެކޮޅަށެވެ.
މުބާރާތުގެ ކުއާޓާ ފައިނަލުގެ ފަހު މެޗުތައް މިރޭ އޮންނާނެއެވެ. އެގޮތުން އާރްއާރްސީ ނުކުންނާނީ އެމްޕީއެލްއާ ދެކޮޅަށެވެ. އަދި އެސްޓީއޯ ބައްދަލުކުރާނީ ޓީމު ފެނަކައާއެވެ.
ކޮމެންޓު ފޮނުވާ