ކޯވިޑް19 އާއި ދެކޮޅަށް އަޅާފައިވާ ފިޔަވަޅުތަކާއި ޚިލާފްވެގެން، އަސްކަރީ ބަޢާވާތެއްގައި މަގާމުން ދުރު ކޮށްފައިވާ މިޔަންމާގެ އިދިކޮޅު ލީޑަރު އަންސަންގ ސޫކީގެ މައްޗަށް ކޮށްފައިވާ 4 އަހަރުގެ ޖަލުހުކުމް 2 އަހަރަށް އެގައުމުގެ އަސްކަރިއްޔާއިން ކުޑަ ކޮށްފިއެވެ.
އަދި މީގެ އިތުރުން ހަމަ އެއް ދައުވާއެއްގައި ހުކުމް ކޮށްފައިވާ، މިޔަންމާގެ ކުރީގެ ރައީސް ވިން މިންޓްގެ މައްޗަށް އިއްވާފައިވާ 4 އަހަރުގެ ޖަލުހުމުމްވެސް ވަނީ 2 އަހަރަށް ކުޑަ ކޮށްފައެވެ.
މިޔަންމާރގެ ދައުލަތުގެ މީޑިއާއިން ހާމަ ކޮށްފައިވާ ގޮތުގައި، މި ދެބޭފުޅުންގެ ހުކުމް ކުޑަ ކޮށްދީގައިވަނީ، އެގައުމުގެ އަސްކަރީ ޗީފް މިން އައުންގ ލައިންގ ދެއްވި އަފޫ އާންމެއްގައި ކަމުގައެވެ.
"އެމީހުންގެ މައްޗަށް ކުރެވިފައިވާ އެހެން ދައުވާތަކާއި އެމީހުން ކުރިމަތި ލާން ޖެހޭނީ އެމީހުން ތިބި ތަނުގައި ތިބެގެން،" މިޔަންމާގެ ޖުންޓާގެ ތަރުޖަމާން ޒަވު މިން ޓުން ވިދާޅުވެފައި ވެއެވެ.
މިއީ، 1 ފެބްރުއަރީގެ ބަޢާވާތަށްފަހު، އަންގ ސަން ސޫކީގެ މައްޗަށް ކުރެވިފައިވާ އެތަކެއް ދައުވާތަކުގެ ތެރޭގައި ހިމެނޭ ފުރަތަމަ ދައުވާއެވެ.
ސުލްހައިގެ ނޯބަލްގެ އިނާމު ލިބިވަޑައިގެންފައިވާ، އަންގ ސަން ސޫކީގެ މައްޗަށް ހުރިހާ ދައުވާތަކެއް ސާބިތު ވެއްޖެނަމަ، އޭނާ އުމުރު ދުވަސް ޖަލުގައި ހޭދަކުރަން ޖެހޭނެއެވެ.
މިޔަންމާގެ އަސްކަރިއްޔާއިން ސޫކީގެ މައްޗަށް އިއްވި ހުކުމް ދުނިޔޭ ގައުމުތަކުންނާއި އަދި ޖަމިއްޔާ ޖަމާއަތްތަކުންވަނީ ވަރަށް ބޮޑަށް ކުށްވެރި ކޮށްފައެވެ. މިގޮތުން އީޔޫގެ ޑިޕްލޮމޭޓް ޖޯސެފް ބޮރެލް ވިދާޅުވެފައިވަނީ މިއީ ސިޔާސީ ހުކުމެއް ކަމުގައެވެ.
އަދި ޔޫއެންގެ ޗީފް މައިކަލް ބެޗެލެޓް ސޫކީއަށް ހުކުމް ކޮށްފައިވާ ކޯޓުން ކުރިޔަށް ގެންގޮސްފައިވަނީ ލަދުވެތިވާން ޖެހޭފަދަ ޝަރީޢަތެއް ކަމުގައެވެ.
އުމުރުން 76 އަހަރުގެ އަންސަންގ ސޫކީއާއި ދެކޮޅަށް އުފުލާފައިވާ ގިނަ ދައުވާތަކުގެ ސަބަބުން، މިޔަންމާގެ ތަފާތު 3 ސިޓީއެއްގައި އަންގްސަން ސޫކީގެ ޝަރީއަތްތަށް ކުރިޔަށް ދެއެވެ. މިޔަންމާގެ އިންތިޚާބީ ލީޑަރު، އެގައުމުގެ އަސްކަރިއްޔާއިން ގެނައި ބަޢާވާތެއްގައި ވެރިކަމުން ދުރުކޮށް، މި އަހަރުގެ ފެބްރުއަރީ މަހުގެ 1 ވަނަ ދުވަހުން ފެށިގެން ވަނީ ހައްޔަރު ކުރެވިފައެވެ.
އަދި އޭނާގެ މައްޗަށް ވަނީ، ވޯކީ ޓޯކީ ރޭޑިއޯ ގާނޫނާ ޚިލާފަށް މިޔަންމާއަށް އެތެރެކޮށް ގެންގުޅުމުގެ ދައުވާ އުފުލާފައިވާއިރު، ކޯވިޑާދެކޮޅަށް އަލާފައިވާ ފިޔަވަޅުތަކާއި ޚިލާފްވި ކަމުގައި ދައުވާ، ޑިސާސްޓަރ މެނޭޖްމަންޓް ގާނޫނުގެ ދަށުން ކޮށްފައެވެ. މި ދައުވާތައް ކޮށްފައިވަނީ، ވެރިރަށް ނައިޕިޓޯގައެވެ.
އަދި ހަމަ އެއާއެކު، ޔަންގޮން ކޯޓުގައި، އޭނާގެ މައްޗަށްވަނީ، މިޔަންމާގެ އޮފިޝަލް ސީކްރެޓް ގާނޫނާއި ޚިލާފުވުމުގެ ދައުވާވެސް ކޮށްފައެވެ. މި ދައުވާ ސާބިތު ވެއްޖެނަމަ އެނާގެ މައްޗަށް 14 އަހަރުދުވަހުގެ ޖަލު ހުކުމެއް އަންނާނެއެވެ. އަންސަންގ ސޫކީގެ ގާނޫނީ ވަކީލުންގެ ޓީމުންވަނީ މިހުރިހާ ދައުވާތަކަށްވެސް އިންކާރު ކޮށްފައެވެ.
ސޫކީގެ ދަރިންނާއި އަދި އަވަހާރަވެފައިވާ ފިރިކަލުންނަކީ، ގައުމުން ބޭރުގެ ރައްޔުތުކަން އޮންނަ ބަޔަކަށް ވާތީ އޭނާއަށް އެގައުމުގެ ރައީސްކަމަށް ވާދު ކުރުމުގެ ފުރުސަތުވަނީ ގެއްލިފައެވެ. ބަޢާވާތަކުން ވެރިކަން ބަދަލު ކޮށްލުމުގެ ކުރިން އޭނާވަނީ މިޔަންމާގެ ސްޓޭޓް ކައުންސިލަރުކަން އަދާ ކުރައްވާފައެވެ.
