ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް ދައުލަތުން އުފުލާފައިވާ މަނީ ލޯންޑަރިންނާއި ރިޝްވަތު ގަބޫލުކުރުމުގެ ކުށުގެ ދަޢުވާގެ އަޑުއެހު މާދަމާ ބޭއްވުމަށް ތާވަލް ކޮށްފިއެވެ.
މާދަމާ ކްރިމިނަލް ކޯޓުގައި މިއަޑުއެހުން ތާވަލްކޮށްފައިވަނީ މާދަމާ ހެދުނު 9 ޖަހާއިރަށެވެ. މާދަމާގެ އަޑު އެހުމަކީ ރ. ފުއްގިރި ވިއްކައިގެން ލިބުނު މިލިއަނަކަށްވުރެ ގިނަ ޑޮލަރު އަމިއްލަފުޅު އެކައުންޓަކަށް ޖަމާކުރި މައްސަލައިގެ އަޑު އެހުމެކެވެ.
މަނީލޯންޑަރިންގެ މައްސަލައިގައި ރައީސް ޔާމީން 5 އަހަރު ދުވަހަށް ޖަލަށް ލުމަށް ކޮށްފައިވާ ހުކުމް މިދިޔަ ހަފްތާގެ އަންގާރަ ދުވަހު ސްޕްރީމް ކޯޓުން ބާލިކޮށްފައިވާއިރު، އިތުރު މައްސަލަތަކެއްގެ ޝަރީއަތް ކޯޓުތަކުގައި ހިނގާތީ އެމަނިކުފާނު ފުރުން މަނާކޮށް 7 ދުވަހުގެ އަމުރެއްވެސް ވަނީ ނެރެފައެވެ.
މަނީ ލޯންޑްރިންގއާއި ރިޝްވަތު ޤަބޫލުކުރުމުގެ ކުށުގެ ދައުވާ ރައީސް ޔާމީންގެ މައްޗަށް އުފުލާފައިވަނީ ރިސޯޓެއްގެ ގޮތުގައި ރ.ފުއްގިރި ތަރައްގީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯއްދަވައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކުރުމަށް ފަށަލަކޮށްފައިވާ މައްސަލާގައެވެ. ޔާމީންގެ އިތުރުން މިމައްސަލައިގައި މއ.ކުރިކީލަހިޔާ އަހްމަދު ކްރިކް ރިޒާއާއި ސަން ކޮންސްޓްރަކްޝަނާއި ސަން އިންވެސްޓްމެންޓްގެ މައްޗަށްވެސް ވަނީ ދައުވާ އުފުލާފައެވެ.
މިހާރު އުފުލާފައިވާ ދައުވާތައް ސާބިތުވެއްޖެ ނަމަ، މަދުވެގެން ފަސް އަހަރުގެ ޖަލު ހުކުމާއެކު، ޖޫރިމަނާގެ ހުކުމެއް އަންނާނެއެވެ.
