މި ސަރުކާރުން އިންޑިއާއެކީ ހަދާފައިވާ އެއްބަސްވުންތަކުގައި ގައުމީ ސަލާމަތަށް ނުރައްކާވާ އެއްވެސް ކަމެއް ހިމެނިފައި ނުވާކަމަށް 241 ކޮމިޓީން ނިންމި ބައްދަލުވުމަށް އިދިކޮޅު މެންބަރުން ވަޑައިނުގަތީ ރަށުގައި ނެތުމުންކަމަށް ބުނެފިއެވެ.
އެމްޑީޕީހގެ މެޖޯރިޓީ އޮންނަ ސަލާމަތީ ޚިދުަތްތަކުގެ ކޮމިޓީގައި އިދިކޮޅު މެންބަރުންނަށް ތިއްބަވަނީ ޕީޕީއެމްގެ ނާއިބު ރައީސް އަދި ގުރައިދޫ ދާއިރާގެ މެންބަރު މުޙައްމަދު ޣައްސާން މައުމޫނާއި، ރައީސް ޔާމީން ސަރުކާރުގެ ޑިފެންސް މިނިސްޓަރ، ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރެވެ.
އިންޑިއާއި އެކު ހަދާފައިވާ އެއްބަސްވުންތަކާ ގުޅޭގޮތުން ގޮތް ނިންމި ކޮމިޓީ ބައްދަލުވުމުގައި ޕީޕީއެމްއިން ބައިވެރިވެފައި ނުވާއިރު، އިންޑިއާއެކު މިސަރުކާރުން ހަދާފައިވާ އެއްބަސްވުންތަކާ ގުޅޭގޮތުން ޕީޕީއެމް އިސްވެ އޮވެ މާލޭގެ މަގުތަކުގައި ކޮންމެ ހަފްތާ ބަންދެއްގައި ދަނީ މުޒާހިރާ ކުރަމުންނެވެ. ނަމަވެސް އިންޑިއާއެކު ހަދާފައިވާ އެއްބަސްވުން ފާސްކުރުމަށް ބޭއްވި ބައްދަލުވުމަށް ޙާޒިރުވެވަޑައި ނުގަނެވުނީ މާލޭގައި ނެތުުންކަމަށް އާދަމް ޝަރީފް ވަނީ ވިދާޅުވެފައެވެ.
އިދިކޮޅުން ހިންގާ މިނިވަން ކަމުގެ ދިފާޢުގެ ސުލްހަވެރި ހިނގާލުމަށް އިދިކޮޅު ލީޑާޝިޕްގެ ބޭފުޅުން ތިއްބެވީ ފުވައްމުލަކުގައެވެ. އެހެންކަމުން ކޮމިޓިގެ ބައްދަލުވުން ބޭއްވީ އެބޭފުޅުން ރަށުގައި ނޫޅުއްވާ ވަގުތެއްގައެވެ. އާދަމް ޝަރީފް ވިދާޅުވީ، ރަށުން ބޭރަށް ވަޑައިގަންނަވާކަން މަޖިލީހަސް އަންގާފައިވާނެކަމަށެވެ.
އިންޑިއާއެކު މިސަރުކާރުން ހަދާފައިވާ އެއްބަސްވުންތަކުގެ ސަބަބުން ގައުމުގެ ސަލާމަތަށާއި އަދި މިނިވަންކަމަށް ބުރޫ އަރާމުންދާކަމަށް އެންމެ ބޮޑަށް ވަކާލާތު ކުރަމުންދާ ޕީޕީއެމް/ޕީއެންސީ ކޯލިޝަންގެ މެމްބަރުން 241 ކޮމިޓީގެ ނިންމުން ނިންމި ބައްދަލުވުމަށް ހާޒިރުވެފައި ނުވާތީ ކޮމިޓީގައި ހިމެނިވަަޑައިގަންނަވާ އެމްއެންޕީގެ މެމްބަރު، ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެފައި ވަނީ އެއީ "ޒިންމާދާރުކަން ކުޑަ ކަމެއް" ކަމުގައެވެ. އުޝާމް ވިދާޅުވި ގޮތުގައި ބަހާ އަމަލާ ދިމާނުވުމަކީ ކަންބޮޑުވާން ޖެހޭ މައްސަލައެކެވެ.
އުޝާމް ވިދާޅުވީ ކޮމިޓީ ބައްދަލުވުން އޮންނަކަން 3 ދުވަސް ކުރިން މެމްބަރުންނަށް އަންގާފައިވާ ކަމަށާއި، އަދި އޮންލައިކޮށް ބައިވެރިވުމުގެ ފުރުސަތުވެސް ކޮމިޓީން މެމްބަރުންނަށް ދީފައިވާ ކަމުގައެވެ.
ބޭއްވުނު ކޮމިޓީގެ ބައްދަލު ވުމުގައި އެމްޑީޕީގެ މެޖޯރިޓީ އޮންނަ ސަލާމަތީ ހިދުމަތްތަކާ ބެހޭ ކޮމިޓީގައި ނެގި ވޯޓުގައި، އިންޑިއާއާ އެކު ހަދާފައި އޮތް ތިން އެއްބަސްވުމުގައިވެސް، ގައުމީ ސަލާމަތަށް ނުރައްކާވާ އެއްވެސް ކަމެއް ނެތްކަމަށް ވޯޓު ދެއްވީ ހަމައެކަނި އެމްޑީޕީގެ މެމްބަރުންނެވެ.
ކޮމިޓީގެ ބައްދަލުވުގައި އެމްޑީޕީގެ މެމްބަރުން ފިޔަވާ ދެން ހާޒިރުވެ ވަޑައިގެންނެވި، ދެ މެމްބަރުން ކަމަށްވާ އެމްއެންޕީގެ އުޝާމް އާއި ޖޭޕީގެ އަލީ ހުސެއިން ވޯޓު ދެއްވީ ރިޕޯޓް ފާސްކުރުމާ ދެކޮޅަށެވެ.
މަޖިލިހުގައި ބާއްވާ ކޮމިޓީ ބައްދަލުވުންތަކުގައި އޮންލައިންކޮށްވެސް ބައިވެރިވުމުގެ ފުރުސަތު އޮންނައިރު، ޕީޕީއެމް ޕީއެންސީގެ މެމްބަރުން މިއަދުގެ ބައްދަލުވުމުގައި އޮންލައިންކޮށްވެސް ބައިވެރިވެފައި ނުވާކަން ފާހަގަ ކޮށްލެވެއެވެ.
