މުސްތަފާބެއެވެ. ރާއްޖޭގެ ތާރީޚުގައި އެއީ ކަޅު ދުވަހެކެވެ. އެދުވަސްމަތިން މުސްތަފާބެ ހަނދާން ނެތަސް އަހަރެމެން އެންމެންގެ ހިތުން އެދުވަހުގެ ހަނދާންތައް ފިލައިގެން ދިއުމަކީ ނާދިރު ކަމެކެވެ.

ބުނަން ހެއްޔެވެ. އެއީ ގާނޫނުއަސާސީ މައްޗަށް ފައިން އެރިދުވަހެވެ. ބައެއް މީހުންނަށް މިކަންތައް ގޯސްކަމެއްގެ ގޮތުގައި ފަހަރުގައި ނުވެދާނެއެވެ. އެކަމަކު އެއީ ވަރަށް ހަޑިމުޑުދާރު ގޯސް ޢަމަލެކެވެ. ހުތުރުކަންބޮޑު ޢަމަލެކެވެ. އެކަން ހުތުރު ކަމަކަށްވަނީ ރައްޔިތުން އެއަށް ޢަމަލުކުރަން ލާޒިމްވާ އެއްޗަކަށް އިހްތިރާމް ގެއްލޭގޮތަށް ވަކިން ޚާއްސަކޮށް، ގާނޫނުހަދާ މަޖިލީހުގެ މެމްބަރަކު އެއާމެދު ނިކަމެތި ގޮތަކަށް ޢަމަލުކުރުމުންނެވެ. ދިވެހި ޖުމްހޫރިއްޔާގެ ގާނޫނުއަސާސީގެ މައްޗަށް ފައިން އަރައި އޭގެ ހުރުމަތް ކެޑިޢަމަލަކީ ހުތުރުކަމެއްގެ ގޮތުގައި ދިވެހި ތާރީހުގައި ލިޔެވިގެންދާނެ ކަމެއްކަމަށް މުސްތަފާބޭ އެއްބަސް ނުވަންތޯއެވެ. ހަމަ ޔަގީނުންވެސް އަހަރެން މުސްތަފާބޭއަށް އެކަމުގެ މައްޗަށް މާފުކުރާކަށް ނެތީމެވެ.

މުސްތަފާބޭމެން އިދިކޮޅުގައި ތިބިއިރު، ނުވަތަ ވެރިކަމުގައި ނެތްއިރު ގައުމުދެކެ ހާދަހާ ލޯބިވިއެވެ. ގައުމާ ރައްޔިތުން ދެކެ ލޯބިވުމުގައި ހައްދުން ނެއްޓިފައިވިއެވެ. އެވަރެއްނެތެވެ. މީހެއްގެ އަތެއް ފައެއްގައި ރިއްސާލިޔަސް ސިއްހީ ހިދުމަތުގެ ފެންވަރު ދެރަކަމަށް ގޮވާ ނަގައެވެ. މުޒާހަރާ ބާއްވާ، ބޭރުގެ ފަރާތްތަކުގެ ގާތަށް ދެއިރު ދެދަޅައަށް ހިނގައެވެ. ކަނޑު ގަދަވެ އޮޑިއެއްގެ ދިޔަހަލުވާލިޔަސް ސިފައިންނަކީ ބޭނުންބައެއް ނޫނެވެ. އެމީހުންނަކީ ކައިގެން މީދާމަރަން ތިބޭ  ފިޑި ބަޔަކަށް ހަދާލައެވެ. ޢިމާރާތަކުން ކަރަންޓް ކެނޑުނަސް ހަމަ މިފަދައެވެ.

މިއީ، މުސްތަފާބޭމެންގެ ދެކޮޅުނުޖެހޭ ވިސްނުން ހުރިގޮތް ނޫންތޯއެވެ. އެކަމަކު އެއީ ހައްގު ތެދުކަމަށް ގަބޫލުކުރާ ބަޔަކުވެސް އުޅުނެވެ. ރައްޔިތުންދެކެވެސް ހަމަ އެހާމެ ލޯބިވެގެންނެވެ. އެއިރު މުސްތަފާބޭވެސް ވަކާލާތުކުރީ ސީއެމްބިއުލާންސް ނުދުއްވިފައި އޮވެގެން ނުވާނެ ކަމުގައެވެ. މަޖިލީހުގަޔާއި އެކިއެކި ޕޯޑިއަންތަކުގައި ގޮވަމުން ގެންދިޔައީ، ރައްޔިތުންގެ ޓެކްސް ފައިސާއިން ރައްޔިތުން ބޭނުންވާ ކަންކަން ކުރެވެންވާނޭ ކަމަށް ނޫންތޯއެވެ.

ޝައްކައްނެތެވެ. އެކަންވާންޖެހޭނީ ހަމައެގޮތަށެވެ. އެއިރު ސަރުކާރުގެ ތެރެއިން ކިރިޔާވެސް ކަމެއްގޯސްކޮށް ދާކަމަށް ހީވާއިރަށް ވަޒީރުން މަޖީލިހަށް ގެނަސް ބުރިން ހަންނަގައެވެ. އިންޒާރު ދެއެވެ. ހަބަޑަށް ބަވައެވެ. ރައްޔިތުންގެ ކުރިމަތީގައި ވަޒީރުންގެ ސޯޓް ބާލުވާ ދިހަބާރަ ސުވާލުކޮށް، ޖެހިގެން އަންނަ ދުވަހު ވަޒީރުގެ އިތުބާނެތްކަމުގެ ވޯޓް ނުނަގަންތޯއެވެ. މިއީވެސް މުސްތަފާބޭމެން ގެންގުޅުނު ހަމައެއް ނޫންތޯއެވެ.

ޗައިނާގެ ލޭބަރުން ރާއްޖޭގައި ފްލެޓްތައް ހެދުމުގެ މަސައްކަތްކުރަމުން ދިޔައިރު މުސްތަފާބޭމެން ބުނަމުން ގެންދިޔައީ އެހާ ގިނަބަޔަކު ރާއްޖޭގެ ކަންކޮޅުތަކުގައި ހަރަކާތްތެރިވަމުން ދިއުމަކީ ރާއްޖޭގެ ސަލާމަތަށް ހުރި ނުރައްކަލެއްގެ ގޮތުގައެވެ. ވެރިކަން ލިބުމުން އެކަން ހުއްޓުވާނެ ކަމަށެވެ. އެހާވެސް މުސްތަފާބޭމެންގެ ވިސްނުންތޫނެވެ. ގައުމުދެކެ ލޯބިވެއެވެ.

މުސްތަފާބޭއެވެ. ހަމަ ހަގީގަތުގައި މުސްތަފާބޭމެންގެ މިސިޔާސަތު ވިއްކުނެވެ. މިނިވަން ކަމުގެ ދިފާއުގައި ނުކުންނާނެ ކަމަށް ރައްޔިތުން ގަބޫލުކުރިއެވެ. ޚުދު އަހަރެންނަކީވެސް މީ މުސްތަފާބޭ މެންގެ އެސިޔާސަތު ގަބޫލުކޮށް ގޮބޯ ހެއްދުނު މީހަކީމެވެ. އެހެންނަމަވެސް އެވާހަކަ މިއަދު މިދައްކަނީ އެކަމަށްޓަކާ ފަޚުރުވެރި ވަމުންނެއް ނޫނެނެވެ. އިންތިހާއަށް ހިތާމަކުރާ ހާލުއެވެ.

މުސްތަފާބޭއެވެ. ދުވަސްތައް ފުރޮޅެމުން، އަހަރުތައް ފާއިތުވަމުން، ޒަމާންތައް ބަދަލުވަމުން އައިސް، ވެރިކަން މިއަދު މިއޮތީ މުސްތަފާބޭމެންގެ އަތުގައައި ނޫންތޯއެވެ. މިއަދު ރާއްޖޭގެ ދިފާޢީ ހުރިހާ ކަމެއްގެ ޒިންމާއޮތީ މުސްތަފާބޭގެ ކޮނޑުގައި އެޅިފައި ނޫންތޯއެވެ. ރާއްޖޭގެ އެއާޕޯޓްތަކުގައި ބޭރުގައުމެއް ސިފައިން ތިބިކަމަށް ރައްޔިތުންގެ ކުރިމަތީގައި މުސްތަފާބޭ އިޢުތިރާފް ނުވަމުތޯއެވެ. އެވާހަކަވެސް ތިޔަ ބުނެ ލެވުނީ ރައްޔިތުންގެ އެތައްބަޔަކު، އެތައް ދުވަހަކު މަގުތަކަށް ނުކުމެ "އިންޑިޔާ މިލިޓިރީ އައުޓް" ގޮވައިގެން ނޫންތޯއެވެ. މިއީ، މުސްތަފާބޭގެ މިއަދުގެ ޙާލަތު ނޫންތޯއެވެ. އިދިކޮޅުގައި ތިބިއިރު ބޮޑެތި ކާށިތައް ބިދެ، މޮޅު ބައިސާތައް ކެޑިއެވެ. ޕާޓީގެ މަންމަ ކަމަށްބުނެ، އަޔަން ލޭޑީ ހެދިގެންވެސް މުސްތަފާބޭ އުޅުނީމު ނޫންހެއްޔެވެ. އެއިރު ހަމަ ތިޔަވަރެއް ނެތެވެ. ބަޔަކަށް ލައްކައެކޭ ހީވިޔަސް ރައްޔިތުންނަށް ހަމަސުމެކެވެ. އަޑިނޭގޭ އެއްބަސްވުންތައް ހަދަނީއެވެ. މިގައުމުގެ ސަލާމަތަށް ރަގަޅުވާނީ ބޭރުގަމުތަކުގެ މިލިޓަރީން ތިބެގެންކަމަށް މުސްތަފާބޭ ތިޔަ ބުނަނީ ހަމަ ހަގީގަތުގައިވެސް މުސްތަފާބޭގެ ހިތުގައި ގައުމަށް އޮތް ލޯތްބެއްގެ ބޮޑުކަމުން ތޯއެވެ.

މުސްތަފާބޭ ވިސްނާށެވެ. މުސްތަފާބޭގެ ބައްޕާފުޅަކީ، ގައުމީ ޚިދުމަތުގައި ލާމަސީލްބޭފުޅެކެވެ. ޙާއްޞަކޮށް މަސްވެރިކަމުގެ ދާއިރާގައި އަގުހުރި ޚިދުމަތްތަކެއްކުރެއްވި ވަރުގަދަ ޝަޚްސިއްޔަތެކެވެ. ގައުމަށް ވަފާތެރި ތެދުވެރި އިޚްލާޞްތެރިއެކެވެ. ގައުމުދެކެ ނުހަނު ލޯބިވާ ދިވެހި ދަރިއެކެވެ. އެފަދަ މީހެއްގެ ތަރުބިއްޔަތުގެ ހިޔާވަހިކަމުގެ ތެރެއިން ނިކުތް މުސްތަފާބެއަކީ، ގައުމުދެކެ ލޯބިވާ ތެދުވެރި އިޚްލާޞްތެރިއެކޭ މިއަދު ބުނެވެން އެބައޮތްތޯއެވެ.

ޢަމަލުތަކުން ފެންނަމުންދަނީ މިލޮބުވެތި ގައުމު ކާޅަށްދޭ ޓީމުގެ ބައިވެރިއަކަށް ވެގެން މުސްތަފާބޭ ހުންނެވިތަން ނޫންތޯއެވެ. މުސްތަފާބޭމެން ދެކޭގޮތުގައި މިގައުމަކީ، ކަޑަށް އެއްލާ ލާފައިވާ ދަނޑިބުރިއެއްފަދަ އެއްޗެކެވެ. އޮތާދާ ފުޅިމަދު އުނގުރިއެއްފަދަ އެއްޗެކެވެ. އެއަތަށްދިޔަސް ހެޔޮ މިއަތަށްދިޔަސް ހެޔޮ ބޮޑުވަރިހަމަ ގައުމެއްގެ ގޮތުގައެވެ. ފެންނަމުންދަނީ، ބޭރުގެ ނުފޫޒުތަކުގެ ދަށުވެ ހަފުސްވެގެން ދިޔަޔަސް ހެޔޮކަމުގައި ހިތާ ވަރިހަމަ ކޮށްގެން މުސްތަފާބޭ ބޮޑުމަގާމުގައި ހުންނަ ތަނެވެ. އުތުރު ތިލަފަޅުގެ އެއްބަސްވުން އެހާބޮޑަށް ސިއްރުކޮށްގެން ތިޔައުޅުއްވަނީ މުސްތަފާބެއަށް އޭގެއިން ކިހާބޮޑު މަންފާއެއް އޮތީމާ ހެއްޔެވެ.

މުސްތަފާބެއެވެ. ގައުމުގެ މިނވަންކަން މަސްކާށިކޮޅަކަށް ނުވަތަ ހިލަބާޖަކަށް ނުވަތަ ވެލި ބާޖަކަށް ދޫކޮށްލާކަށް ގައުމުގެ ޒުވާނުން ތަނެއް ނުދޭނެއެވެ. އެއީ ޝައްކެއް އޮތްކަމެއް ނޫނެވެ. މިގައުމުދެކެ ލޯބި މީހުންނަކީ ފިސާރިބައެއްކަން ދައްކަންޖެހޭ މަގާމުތަކުގަ އާއި ވަގުތު ތަކުގައި އެކަން ދައްކަމުން ދާނެއެވެ. ބަސްބުނަން ކެރޭނެއެވެ. މާއްދާ ހަތާވީހުގެ ބޭނުން ހިފާނެއެވެ. އެކަން އެންމެ ރަގަޅަށް ދަންނާނޭ އެކަކީވެސް ހަމަ މުސްތަފާބޭ ކަންވެސް އަހަރެން ދަންނަމެވެ.

އެހެންނަމަވެސް އަހަރެން އަންތަރީސްވާ އެއްކަމެއް އެބައޮތެވެ. މުސްތަފާބޭމެންގެ ވިސްނުން ތިޔަބަހައްޓަނީ ފައިގެ ބޮޑުވައި އިނގިއްޔާ ހަމައަށެވެ. މީގެ އަހަރުތަކެއް ކުރިން ރާއްޖޭން ގެންގުޅެފައިވަނީ ހަމަހަމަކަން މިންކުރާ މެދުމިނުގެ ސިޔާސަތެކެވެ. ވަކި ގައުމަކަށް ބަރޯސާނުވެ އޮންނަ އޮތުމެއްގެ މައްޗަށް ނޫންތޯއެވެ. ކިހާ ސަޅިތޯއެވެ. މިއަދު އެހެންތޯއެވެ. މުސްތަފާބޭމެންނަށް ވެރިކަންލިބޭ ކޮންމެ ފަހަރަކުވެސް ގައުމުގެ މިނިވަންކަމާ އިސްތިގުލާލަށް ލޮޅުން އަރުވާލާފަދަ އެތައްކަމެއް ކުރަނީއެވެ. މާތްވެގެންވާ އިސްލާމްދީނަށް ފުރައްސާރަކުރާ މަދުބަޔަކަށް ހިތްވަރުދޭ ކަހަލައެވެ. މުސްތަފާބޭމެން ތިޔަ ތިބެނީ، ރުހޭ ގައުމަކުން ގެންނަ ފުރުޓް ބާސްކެޓްތައް ކަރުބުޑަށް ކައިގެން ރާޖާ ނޫޓުން ޖީބުތައް ފުރާލައިގެން ނޫންތޯއެވެ. ހަމަނޭވާލާނެ ތަނެއްނެތެވެ. ކިޔޭ ނުކިޔޭއެއް ނޭގެއެވެ. ބައެއްފަހަރު ބަޖެޓް ތަނެއްނުދޭ އަނެއްބައިފަހަރު ހިލޭ އެހީއޭ ކިޔައެވެ.

މުސްތަފާބޭއެވެ. މިއީ ކިހާބޮޑު އޮޅުވާލުމެއްތޯއެވެ. މިހިރީ ދެރަވަރުކަންކަތެވެ. މިއީ ގައުމަށް ހެޔޮއެދޭ، ރައްޔިތުންދެކެ ލޯބިވާ މީހުން ދުވަހަކުވެސް ކުރާނެ ކަންތައްތަކެއް ނޫނެވެ. ޞާލިހުންގެ ތެރެއިން މުސްތަފާބެމެން ވާނީ ކޮންއިރަކުންތޯއެވެ. ވަޒީފާގެ ބިރެއް، ނޯންނާނެ ކަމަށްބުނަމުން ވެރިކަމަށް އައީއެވެ. މިހާރުވެސް ރާއްޖޭގެ ސަގާފަތެއްގެ ގޮތުގައި ވަޒީފާގެ ބިރު އެބައޮތްކަން މުސްތަފާބޭއަށް ހަމަ ރަގަޅަށް އިގޭނެއެވެ. މުސްތަފާބޭ ތިޔައުޅޭ ތަނުގައިވެސް އެކަންއޮތީ އެގޮތަށް ނޫންތޯއެވެ. މުސްތަފާބެ މިއަދު ތިޔަހުރީ ޒިންމާބޮޑު މަގާމެއްގައެވެ. މުސްތަފާބޭ ތިޔައީ ރާއްޖޭގެ ސަލާމަތާ ރައްކާތެރިކަން ރައްޔިތުންނަށް ކަށަވަރުކޮށްދޭނެ އެއްމުވައްސަސާގެ ވެރިޔާކަން މުސްތަފާބޭ ދަންނަން ވާނެއެވެ.

މަގާމުގެ މަސްއޫލިއްޔަތު އުފުލުމުގައި މާތްﷲ ގަންދީ ކޮށްފައިވާ ހުވައާއި ޚިލާފަށް، މުސްތަފާބޭވެސް ތިޔަ މަސައްކަތްކުރަނީ ގައުމުގެ މިނިވަންކަން ވިއްކާލައި، ކުޑަ ވަގުތުކޮޅެއްގެ އުފާވެރިކަން ހާސިލްކުރަން ނޫންތޯއެވެ. ކުރިމަތީގައި ހިނގާ ކަންކަމުގައި ޗުއްޕުވެސް ބުނެލަން ނުކެރި، އައްޔަކަސް އަދިރިއަކަސް ވާނީ އެއްވަރޭ ބުނެ، ގައުމުގެ މިނިވަންކަމަށް އަރައިގަންނަ ފަރާތްތަކަށް ދޯސްތީގެ އަތް މުސްތަފާބޭ ތިޔަ ދިއްކުރަނީ މަގާމުގެ ޖާހުގައި ނޫންތޯއެވެ. މިއީ އަޅެފަހެ ދޮގެއްތޯއެވެ.