ރައީސް އިބްރާހީމް މުޙައްމަދު ޞާލިހްގެ ސަރުކާރަކީ، ބަހުން ބަދަލު ގެންނަ ސަރުކާރެއް ނޫންކަމަށާއި، މިއީ އަމަލުން ތަރައްޤީ ގެންނަ ސަރުކާރެއްކަމަށް ދުވާފަރު ދާއިރާގެ އެމްޑީޕީ މެންބަރު އިސްމާޢީލް އަޙްމަދު ވިދާޅުވެއްޖެއެވެ. އޭނާ މިހެން ވިދާޅުވީ، ބޭރަށް މަސް އެކްސްޕޯޓްކުރެވޭ މިންވަރު އިތުރުކުރުމަށް މިފްކޯއިން 2500 ޓަނުގެ މަސް ފިނިކޮށް ރައްކާ ކުރެވޭ ބޯޓެއް އެކުންފުނީގެ ފްލީޓަށް އިތުރުކޮށްފައިވާތީ، އެ ބޯޓުގެ ފޮޓޯއާއެކު ކުރެއްވި ޓްވީޓެއްގައެވެ.
މެންބަރު ވިދާޅުވީ، މީ ބަހުން ބަދަލު ގެންނަ ސަރުކާރެއް ނޫންކަމަށާއި، ގެންނަ ބަދަލަކީ ދެމެހެއްޓެނިވި ބަދަލެއްކަން ސާފުވާނެކަމަށެވެ. އަދި އަތްލެވޭ ޢަމަލީ މުހިއްމު އެތަށް ކަމެއް ފެންނާން ހުންނާނެކަމަށާއި، ފާއިތުވި 30 އަހަރު އަޅާނުލާ ބާކޮށް އޮތް މަސްވެރިކަމުގެ ސިނާއަތަށް ހެޔޮ ބަދަލު އަންނަތަން ފެންނަން ފަށައިފިކަމަށްވެސް ދުވާފަރު ދާއިރާގެ މެންބަރު ވިދާޅުވިއެވެ.
މީ ބަހުން ބަދަލު ގެންނަ ސަރުކާރެއް ނޫނެވެ!
ގެންނަ ބަދަލަކީ ދެމެހެއްޓެނިވި ބަދަލެއްކަން ސާފުވާނެ!
އަދި އަތްލެވޭ ޢަމަލީ މުހިއްމު އެތަށް ކަމެއް ފެންނާން ހުންނާނެ!
ފާއިތުވި 30 އަހަރު އަޅާނުލާ ބާކޮށް އޮތް މަސްވެރިކަމުގެ ސިނާއަތަށް ހެޔޮ ބަދަލު އަންނަތަން ފެންނަން ފަށައިފި @ibusolih ???? pic.twitter.com/JEEcmun939— Ismail Ahmed (@N4Isse11) November 12, 2021
ތައިލެންޑްގެ ކުންފުންޏަކުން އޮޕަރޭޓްކުރަމުން ދިޔަ، ދިގުމިނުގައި 98 މީޓަރު، ފުޅާމިނުގައި 13.6 މީޓަރުގެ މި ބޯޓު މާލެ ގެނެސްފައިވަނީ ޖުލައި މަހުގެ ތެރޭގައެވެ. ބޯޓަށް ދީފައިވާ ނަމަކީ "ޖަޒީރާ ރީފާ" އެވެ. މި ބޯޓު ގަތުމަށް ގާތްގަނޑަކަށް 27.8 މިލިއަން ރުފިޔާ ހޭދަވެފައިވާ ކަމަށް މިފްކޯއިން ބުނެއެވެ.
މި ބޯޓުގެ ބޭނުމަކީ، މަސްވެރިކަން ރަނގަޅުވެގެންދާއިރު މިފްކޯގެ ކެޕޭސިޓީ މިހާރު ހުރިވަރަށް ވުރެ އިތުރު ކުރުން ކަމަށް މިފްކޯއިން ބުނެއެވެ.
