ރައްޔިތުންގެ މަޖިލީހަކީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އަމިއްލަ ކުންފުންޏެއް ނޫންކަމަށް ވިދާޅުވެ އިސްތިއުފާދެއްވުމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު ޢަބްދުއްލަޠީފް މުޙައްމަދު (ފުނަމާ ލަޠީފް) ގޮވާލައްވައިފިއެވެ.
ލަތީފް މިކަމަށް ގޮވާލައްވާފައިމިވަނީ، މިއަހަރުގެ މެއި މަހުގެ 6 ވަނަ ދުވަހު ރައީސް މުހައްމަދު ނަޝީދަށް ދިން ނުރައްކާތެރި ޓެރަރިސްޓް ހަމަލާއަށްފަހު ރާއްޖޭގައި ބޭރުގައި ކުރެއްވި ބޭސްފަރުވާއަށް 1.6 މިލިޔަން ރުފިޔާ ދައުލަތުގެ ބަޖެޓުން ޚަރަދުކޮށް، ނަޝީދު ރާއްޖޭގައި ޖެން ހޮޓެލްގައި ހުންނެވުމަށް ކޮންމެ ދުވަހަކަށް ދައުލަތުގެ ބަޖެޓުން 33،000އަށް ވުރެ ގިނަ ރުފިޔާ ދައުލަތުން ޚަރަދުކުރާކަން ހާމަވުމާއި ގުޅިގެންނެވެ.
ލަޠީފް ކުރެއްވި ޓްވީޓެއްގައި ވިދާޅުވީ، ރައްޔިތުން ހަވާލުކުރި ޒިންމާ އަދާނުކޮށް، ރައްޔިތުންގެ ފައިސާއިން އިނާޔަތާ މުސާރަ ނަގަމުން، ރާއްޖެއިން ބޭރުގެ ޖަމިއްޔާއެއް ތަމްސީލުކުރަން ނަޝީދަށް ރާއްޖެއިން ބޭރުގަ ހުރެވިގެން ނުވާނެކަމަށެވެ.
ރ. މަޖިލިހަކީ ނަޝީދުގެ އަމިއްލަ ކުންފުންޏެއް ނޫން.
ރައްޔިތުން ހަވާލުކުރި ޒިންމާ އަދާނުކޮށް، ރައްޔިތުންގެ ފައިސާއިން އިނާޔަތާ މުސާރަ ނަގަމުން، ރާއްޖެއިން ބޭރުގެ ޖަމިއްޔާއެއް ތަމްސީލުކުރަން ނަޝީދަށް ރާއްޖެއިން ބޭރުގަ އެގޮތަށް ހުރެވިގެން ނުވާނެ.
އިސްތިއުފާ ދެއްވާ!
— Abdul Latheef (@funamalatheef) November 11, 2021
ލަޠީފް މިހެން ވިދާޅުވެފައިވާއިރު، ކޮޕް26 ސަމިޓްގައި ބައިވެރވެވަޑައިގަތުމަށް ރައީސް ނަޝީދު މިދިޔަ މަހުގެ 29ގައި އިނގިރޭސިވިލާތަށް ވަޑައިގަތްގޮތަށް އަދި ރާއްޖެ ވަޑައިގެންފައެއް ނުވެއެވެ.
ރައީސް ނަޝީދަށް ދައުލަތުން ބޮޑު ޚަރަދުތަކެއް ކުރާތީ ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
ފިނޭންސް މިނިސްޓްރީން އާންމުކުރި ހިސާބުތަކަށް ބަލާއިރު ހަމަލާގައި ލިބުނު ޒަހަމްތަކަށް ރާއްޖެ އިން ބޭރުން ފަރުވާ ހޯއްދެވުމަށް 1.6 މިލިއަން ރުފިޔާ ހޭދަވެފައިވެއެވެ. މި ޚަރަދުތަކުގެ ތެރެއިން އިނގިރޭސިވިލާތުގެ ފަރުވާ އަށް 1.5 މިލިއަން ރުފިޔާ ޚަރަދު ވެފައިވާއިރު، ޖަރުމަން ވިލާތުން ފަރުވާ އަށް 164،601 ރުފިޔާ ވަނީޚަރަދު ވެފައެވެ.
ރައްޔިތުންގެ މަޖިލީހުގެ ރައީސަށް ވާތީ ޖެންގައި ހުންނެވުމުގެ ހަރަދު ހަމަޖައްސަން ޖެހޭނީ ރައްޔިތުންގެ މަޖިލީހުންނެވެ. އެކަމަކު ބޭސްފަރުވާ އާއި މާލޭގައި ހުންނެވުމުގެ ހަރަދު މިހާރު ކުރަނީ ފިނޭންސް މިނިސްޓްރީގެ ބަޖެޓުންނެވެ.
މީގެ އިތުރުން ރައީސް ނަޝީދު ޖެންގައި 21 ދުވަހު (ތިން ހަފުތާ) ގައި ނަޝީދު ހުންނެވުމަށް މިހާތަނަށް 698،168ރ. ވަނީ ހޭދަވެފައިވެއެވެ. މިއީ ބޭސްފަރުވާއަށް ފަހު އެމަނިކުފާނު ރާއްޖެ އިން ބޭރުން ވަޑައިގެންނެވި ފަހުން މިހާތަނަށް ހިނގާފައިވާ ހަރަދެވެ. ޖެންގައި އެމަނިކުފާނު ހުންނަވާ ގޮތަށް ހަމަޖައްސާފައި ވަނީ އަވަހާރަކޮށްލަން ދިން ބޮމުގެ ހަމަލާއާ ގުޅިގެން ސަލާމަތީ ސަބަބުތަކަކަށްޓަކަ އެވެ. މި ހޭދައިގެ ތެރޭގައި އެމަނިކުފާނުގެ ސެކިއުރިޓީ ބަލަހައްޓާ ސިފައިން ޖެންގައި ތިބުމުގެ ހޭދަ ހިމެނޭ ކަމެއް އަދި ޔަގީނެއް ނުވެއެވެ.
ސިފައިންގެ ބެލުމުގެ ދަށުން ޖެންގައި ނަޝީދު ހުންނަވާ ގޮތަށް ސަރުކާރުން ހަމަޖެއްސީ މިދިޔަ މެއި މަހުގެ ތެރޭގައި އެމަނިކުފާނު އަވަހާރަކޮށްލަން ދިން ބޮމުގެ ހަމަލާ އަށް ފަހު ބޭރުގައި އުޅުއްވައި ރާއްޖެ ވަޑައިގަތުމުންނެވެ. މިދިޔަ މަހުގެ ތެރޭގައި ނަޝީދު މާލެ ވަޑައިގަތީ ފަރުވާ އަށް ފަސް މަސް ވަންދެން ބޭރުގައި ހުންނެވުމަށް ފަހުއެވެ.
މިދިޔަ މަހުގެ 11 ވަނަ ދުވަހު ނަޝީދު ރާއްޖެ އެނބުރި ވަޑައިގެންނެވިއިރު، އޭގެ ފަހުން އެމަނިކުފާނު ޖެންގައި ހުންނަވަނީ އެމަނިކުފާނު ހުންނެވުމަށް ދައުލަތުން ކަނޑައެޅި ވަގުތީ ގެކޮޅުގެ މަސައްކަތް ނުނިމޭތީއެވެ.
ނަޝީދުގެ ވަގުތީ ގެކޮޅުގެ ގޮތުގައި ހަމަޖެހިފައިވާ މުރައިދޫގޭގެ މަރާމާތުގެ މަސައްކަތްތައް ގެންދަނީ ސިފައިންގެ ކުންފުނި، ސިކްފޯއާ ހަވާލުކޮށްގެންނެވެ. ރައީސް ނަޝީދުގެ އިތުރުން އުއްތަމަ ފަނޑިޔާރަށްވެސް ރަސްމީ ގެކޮޅު ބިނާ ކުރަން ދެ ބިމެއް ސަރުކާރުން ހަމަޖެއްސިއެވެ. އެކަމަކު އެ ދެ ބިމުގެ މަސައްކަތް ލަސްވާނެތީވެ، ސަރުކާރުން ވަނީ މަޖިލީހުގެ ރައީސަށް މުރައިދޫގެ އަދި އުއްތަމަ ފަނޑިޔާރަށް ރެހެންދި ފްލެޓެއް ހަމަޖައްސައިފައެވެ.
