ކުރިއަށް އޮތް 2 އަހަރުގެ ތެރޭގައި، ސަރުކާރުގެ މައިގަނޑު ފޯކަސް ސީދާ ކުރަންޖެހެނީ މިފަސްއަހަރަށްވީ ވަޢުދުތަށް ފުއްދާ ނިންމުމަށް ކަމަށާއި، ކޯވިޑް-19 އިން ގެއްލުނު ދިގުމުއްދަތަކީ ބަހަނާ އެއްގެ ގޮތުގައި ބެލޭކަށް ނެތްކަމުގައި ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ވިދާޅުވެއްޖެ އެވެ.
ރައީސުލްޖުމްހޫރިއްޔާ މިފަދައިން ވިދާޅުވީ ދިވެހިރާއްޖޭގެ 54 ވަނަ ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި ގައުމާ މުޚާތަބު ކުރައްވާ މިރޭ ވާހަކަފުޅު ދައްކަވަމުންނެވެ.
މިޖަލްސާގައި ގައުމާ މުޚާތަބު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ، 2022 ވަނަ އަހަރުގެ ބަޖެޓް ސަރުކާރުން ހުށަހަޅާފައިވަނީ ކޯވިޑް-19 އިން ގެއްލުނު ދިގުމުއްދަތަކީ ބަހަނާ އެއްގެ ގޮތުގައި ނުބައްލަވާ، ހިގަމުންދާ 5 އަހަރުގެ ދައުރަށް ވީ ވައުދުތައް ފުދުމަށް އަމާޒުކޮށް އެމިސްރާބަށް ވާޞިލްވުމުގެ އަޒުމުގައި ކަމަށެވެ.
އަދި މި ޖަލްސާގައި ވާހަކަ ދައްކަވަމުން ރައީސްވަނީ، ސަރުކާރުން މިހާރު މަޖިލިހަށް ހުށަހަޅުއްވާފައިވާ ބަޖެޓުން އަންނަ އަހަރު ހާސިލް ކުރައްވަން ގަސްތު ކުރައްވާފައި ގިނަ ކަންކަމަށް އަލި އަޅުއްވާލައްވާފައެވެ.
މީގެތެރޭގައި، އަންނަ އަހަރު، އިޖްތިމާޢީ ދާއިރާއަށް ޚާއްޞަ އިސްކަމެއް ބަޖެޓްގައި ދެވިފައިވާނެ ކަމަށާއި، ސިއްޚީ ދާއިރާގެ ޚިދުމަތްތައް ފުޅާކުރުމަށް އިތުރު ޑޮކްޓަރުންނާ، ނަރުހުން، ހޯދުމަށް ބަޖެޓްކުރެވިފައި ވާނެކަމަށް ރައީސް ވިދާޅުވިއެވެ.
އަދި އޭގެ އިތުރުން، އައިޖީއެމްއެޗްއިން އެޕޮއިންޓްމެންޓެއް ހަދައިގެން ޑޮކްޓަރަށް ދެއްކުމަށް ކުރަން ޖެހޭ އިންތިޒާރު ދިގު ކަމަށާއި، މި މުއްދަތު ކުރުކޮށް، ރައްޔިތުންނާ ގާތުން މިޚިދުމަތް ވެސް ފޯރުކޮށްދިނުމަށް ކުރަންޖެހޭ މަސައްކަތް މިހާރު ކުރިޔަށް ދާކަމަށްވެސް ރައީސް ވިދާޅުވިއެވެ.
މީގެ އިތުރުންވެސް، މާލޭގެ އިތުރުން، އަތޮޅުތެރޭގައި ރީޖަނަލް މެންޓަލް ހެލްތު ޕްރޮގްރާމް އަންނަ އަހަރު ފެށޭނެ ކަމަށާއި، ޓާޝަރީ ހޮސްޕިޓަލްތަކުގައި މެންޓަލް ހެލްތް ޔުނިޓްތައް ތަރައްޤީކުރެވޭނެ ކަމަށްވެސް މި ޖަލްސާގައި ވާހަކަ ދައްކަވަމުން ރައީސްވަނީ ވިދާޅުވެފައެވެ. އަދި ކުރިއަށްއޮތް ތަނުގައި މިފަދަ އިޖުތިމާޢީ ބަލިމަޑުކަމުން އަރައިގަތުމަށް ބޭނުންވާ ވަސީލަތްތަކާއި، ޤާބިލްކަން އިތުރުކުރުމަށް ސަރުކާރުން ޚާއްސަ އިސްކަމެއްދޭނެ ކަމަށްވެސް، އަންނަ އަހަރުގެ ބަޖެޓަށް އަލި އަޅުއްވާލަވަމުން ރައީސް ވިދާޅުވެފައި ވެއެވެ.
އަދި ސަރުކާރުގެ އިދާރާތަކުން ރައްޔިތުންނަށް ދޭ ޚިދުމަތް މާބޮޑަށްވެސް އަވަސްކުރަން އެބަޖެހޭ ކަމަށް ގަބޫލުކުރައްވާކަމަށް ވިދާޅުވަމުން، އަންނަ އަހަރު ސަރުކާރުން އިސްކަންދޭނެ އަނެއް ކަމަކީ ޚިދުމަތްތައް، އެކުވެނި، އެއް ފުރާޅެއްގެ ދަށުން، ފޯރުކޮށްދިނުމުގެ މަސައްކަތް ފެށުމަށް ކަމަށްވެސް ރައީސް ވިދާޅުވިއެވެ. އަދި ޚިދުމަތްތައް ޑިޖިޓަލައިޒްކުރުމަށް އަންނަ އަހަރަށް ވަރަށްބޮޑު އިސްކަމެއްދީގެން ބަޖެޓްކުރެވިފައި ވާނެކަމަސްވެސް މިޖަލްސާގައި ރައީސްވަނީ ވިދާޅުވެފައެވެ.
ކޮމެންޓު ފޮނުވާ