އިޓާލިއަން ލީގުގައި ޔުވެންޓަސް ރޭ ވެރޯނާ އަތުން ބަލިވެ، ލީގު ތާވަލްގެ ނުވަ ވަނައަށް ވެއްޓިއްޖެއެވެ.
ވެރޯނާގެ ދަނޑުގައި ކުޅުނު މި މެޗުން ޔުވެންޓަސް ބަލިވީ 1-2 ގެ ނަތީޖާއަކުންނެވެ.
މި ނަތީޖާއާއެކު ޔުވެންޓަސް އޮތީ 11 މެޗުން ލިބުނު 15 ޕޮއިންޓާއެކު ނުވަ ވަނައިގައެވެ. އަދި ޔުވެންޓަސްގެ މައްޗަށް ކުރިހޯދި ވެރޯނާއަށްވެސް ލިބެނީ 11 މެޗުން 15 ޕޮއިންޓެއެވެ. ލަނޑުގެ ތަފާތުން ކުރި ލިބޭތީ ވެރޯނާ އޮތީ 8 ވަނައިގައެވެ.
ވެރޯނާ އާއި ޔުވެންޓަސް ބައްދަލުކުރި މެޗު ފަށައިގެން 10 ވަނަ މިނެޓުގައި އެޓީމުން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ، ޖިއޮވާނީ ސިމިއޯނީއެވެ. އަދި އޭގެ 4 މިނެޓު ފަހުން ސިމިއޯނީ ވަނީ އިތުރު ލަނޑެއް ވެރޯނާއަށް ކާމިޔާބުކޮށްދީ ލީޑު ފުޅާކޮށްފައެވެ.
މެޗުގެ ފުރަތަމަ ހާފުގައި ވެރޯނާއިން 2 ލަނޑުގެ ލީޑެއް ނަގާފައިވާއިރު، ޔުވެންޓަސްއިން މި މެޗުގައި ޖެހި ހަމައެކަނި ލަނޑު މެޗު ނިމެން 10 މިނެޓަށް ވެފައިވަނިކޮށް އެޓީމަށް ކާމިޔާބުކޮށްދިނީ، ވެސްޓަން މެކެނީއެވެ.
ޔުވެންޓަސްއަށް ދެން ކުރިޔަށް އޮތް މެޗަކީ ޔުއެފާ ޗެމްޕިއަންސް ލީގުގައި އަމިއްލަ ދަނޑުގައި ޒެނިތް އާއި ދެކޮޅަށް ކުޅެން ޖެހޭ މެޗެއެވެ. މި މެޗު ކުޅޭނީ އަންނަ އަންގާރަ ދުވަހުގެރޭ ދަންވަރު ރާއްޖެ ގަޑިން 1:00 ގައެވެ. ވެރޯނާއަށް ކުރިޔަށް އޮތީ އަންނަ މަހުގެ 11 ވަނަ ދުވަހު އިޓާލިއަން ލީގުގައި ނަޕޯލީ އާއި ދެކޮޅަށް ކުޅެން ޖެހޭ މެޗެއެވެ.
