ކުރިޔަށް އޮތް ފުޓްބޯޅަ ސީޒަން ޕްރެޒިޑެންޓްސް ކަޕުން ފަށާގޮތަށް ހަމަޖައްސާ އަންނަ ސީޒަންގެ ފުޓްބޯޅަ ކަލަންޑަރު ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިޢުލާންކޮށްފިއެވެ.
އެފްއޭއެމުން އާންމުކުރި އައު ފުޓްބޯޅަ ސީޒަން ކަލަންޑަރުގައި ވާގޮތުން އަންނަ ޑިސެމްބަރ މަހުގެ 15 ގައި ޕްރެޒިޑެންޓްސް ކަޕް ފަށާނެއެވެ. ޕްރެޒިޑެންޓް ކަޕުގައި ވާދަކުރާނީ އެންމެ ފަހުން ލީގުގައި ވާދަކުރި 8 ޓީމެއެވެ. މުބާރާތް ކުރިޔަށް ގެންދިޔުމަށް ހަމަޖެހިފައިވަނީ ލީގު އުސޫލުން 1 ބުރު ކުޅޭ ގޮތަށެވެ. އެގޮތުން ކޮންމެ ޓީމެއް ކޮންމެ ޓީމަކާއި ދެކޮޅަށް ކުޅެ ނިމޭއިރު، 1 ވަނައިގައި އޮންނަ ޓީމަށް ޕްރެޒިޑެންޓް ކަޕުގެ ޗެމްޕިއަންކަން ލިބޭނެއެވެ.
އަންނަ އަހަރުގެ ފުޓްބޯޅަ ސީޒަން ޕްރެޒިޑެންޓް ކަޕުން ފަށާގޮތަށް ނިންމާފައިވާއިރު، ވޭތިވިދިޔަ 3 އަހަރުވެސް އެކި ސަބަބުތަކާއިހުރެ ޕްރެޒިޑެންޓް ކަޕް ބޭއްވޭ ގޮތްވަނީ ނުވެފައެވެ. އެންމެ ފަހުން ޕްރެޒިޑެންޓްސް ކަޕް ބާއްވާފައިވަނީ 2017 ވަނަ އަހަރުއެވެ. އެންމެ ފަހުން މިދިޔަ އަހަރުވެސް ޕްރެޒިޑެންޓްސް ކަޕް ބާއްވަން އެފްއޭއެމުން ޝެޑިއުލްކޮށްފައި އޮތްނަމަވެސް މުބާރާތް ކެންސަލް ކުރަން ޖެހުނީ ކޮވިޑް-19 އާ ގުޅިގެންނެވެ.
ޕްރެޒިޑެންޓް ކަޕަށް ފަހު ދެން އޮންނާނީ ޝެރިޓީ ޝީލްޑް މެޗެއެވެ. މި މެޗު ކުޅުމަށް އެފްއޭއެމުން ތާވަލްކޮށްފައިވަނީ ފެބްރުއަރީ މަހުގެ 7 ވަނަ ދުވަހަށެވެ. އަދި ދިވެހި ޕްރިމިއާ ލީގު ފަށަން ތާވަލްކޮށްފައި އޮތީ ފެބްރުއަރީ މަހުގެ 11 ވަނަ ދުވަހުއެވެ.
ކޮމެންޓު ފޮނުވާ