ފުލުހުންގެ ބޮޑު އޮޕަރޭޝަނެއްގައި 215 ކިލޯގެ ޑްރަގްސް އަތުލައިގެންފި އެވެ.
މިއީ، މި ފަހުގެ ތާރީހެއްގައި އެއް ފަހަރާ އަތުލައިގެން އެންމެ ގިނަ މަސްތުވާތަކެއްޗެވެ. ކޮމިޝަނަރ އޮފް ޕޮލިސް މުހައްމަދު ހަމީދު ދެންމެ ކުރެއްވި ޓްވީޓެއްގައި ވިދާޅުވީ ބުދަ ދުވަހު ފުލުހުން ފެށި އޮޕަރޭޝަނެއްގައި ފުލުހުންގެ ޑްރަންޑް އެންފޯސްމަންޓް ޑިޕާޓްމަންޓާއި މެރިން ޕޮލިހާއި ފޮރެންސިކާއި ރ.އަތޮޅު ފުލުހުންނާއި އިންޓެލިޖެންސް ޓީމްތައް ގުޅިގެން ހިންގި އޮޕަރޭޝަންގައި ދެމީހަކު ހައްޔަރުކޮށް ގާތްގަނޑަކަށް 215 ކިލޯގެ ހެރޮއިން އަތުލައިގެންފައިވާ ކަމަށެވެ.
In a second successful counter narcotics operation that began on Wednesday, DED, Marine Police, Forensics, Raa Atoll Police & Intelligence teams have arrested two individuals and seized approximately 215 kgs of heroin. We thank Govt. of #india & @MNDF_Official for the inputs. pic.twitter.com/OvtOfrWQYA
— Mohamed Hameed (@M_Hameedh) October 15, 2021
އޮޕަރޭޝަންގެ ތަފްސީލް ހާމަނުކޮށް ޕޮލިސް ކޮމިޝަނަރު ވަނީ މިއޮޕަރޭޝަނަށް އިންޑިއާ ސަރުކާރުންނާއި އެމްއެންޑީއެފް އިން ވެދެއްވި އެހީތެރިކަމަށް ޝުކުރު އަދާކުރައްވާފައެވެ. ނަމަވެސް އިންޑިއާ ސަރުކާރުން އޮޕަރޭޝަންގައި ބައިވެރިވި ގޮތުގެ ތަފްސީލެއް ޕޮލިސް ކޮމިޝަނަރު އަދި ހާމައެއް ނުކުރައްވައެވެ.
މި ހަފްތާގައި ފުލުހުން ހިންގި ބޮޑު އެހެން އޮޕަރޭޝަނަކުން ވެސް 100 ކިލޯގެ މަސްތުވާތަކެތި އަތުލައިގެންފައިވެ އެވެ. އެ މައްސަލައާ ގުޅުންހުރި ކަމަށް ތުހުމަތުކުރާ 10 މީހަކު ހައްޔަރުކޮށްފައިވެ އެވެ. ނަމަވެސް ބަންދުގެ މުއްދަތު އިތުރުކުރަން ކޯޓަށް ހާޒިރުކުރުމުން، އެ އެއްޗެހި ގެނައުމުގައި އިސްކޮށް އުޅުނުކަމަށް ތުހުމަތުކުރާ ދެ މީހަކު ވަނީ ދޫކޮށްލައިފައެވެ.
