ޖީއެމްއާރަށް މާލޭ ބައިނަލްއަޤްވާމީ ވައިގެ ބަނދަރު ދީފައިވަނީ، އޭރުގެ ރައީސް މުހައްމަދު ނަޝީދު 78 މިލިޔަން ޑޮލަރު ބޭނުން ވުމުން ކަމުގައި އެމަނިކުފާނުގެ ކެބިނެޓްގައި ހިމެނި ވަޑައިގެންވި ޓުވަރިޒަމް މިނިސްޓަރ ޑރ.މަރިޔަމް ޒުލްފާ ވިދާޅުވެއްޖެއެވެ.

މާލޭ ބައިނަލްއަޤްވާމީ ވައިގެ ބަނދަރު، ކުއްޔަށް ދެއްވުމަށް 2010 ޖޫން 28 ވަނަ ދުވަހު، ޖީ.އެމް.އާރ،އެމް.އޭ.އެޗް.ބީ ކޮންސޯޓިއަމްއާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑާއި، ދިވެހި ސަރުކާރުން ވަނީ އެއްބަސްވެފައެވެ. މި އެއްބަސްވުމާއި އެއްގޮތަށް އޭރުވެސް ކަންކަން ނުހިނގާތީ ގިނަ ބައެއްގެ ފާޑުކިޔުން ވަނީ އަމާޒުވެފައެވެ. މިކަމާއި ގުޅިގެން އޭރުގެ ޓޫރިޒަމް މިނިސްޓަރ ޒުލްފާ ކްލަބް ހައުސްގައި ވިދާޅުވީ ރައީސް ނަޝީދު ކައިރީގައި އޭރުވެސް ބޮޑެތި ލޯޔަރުން ތިއްބެވިއިރު، ޖީއެމްއާރަށް އެއާޕޯޓް ދިނުމަށް އެހާ ފީކަޅާ އެގްރީމަންޓެއް ހެދީ ކީއްވެތޯ ސުވާލު ކުރެއްވިކަމަށެވެ. އަދިި މިކަން ކުރައްވާފައިވަނީ ރައީސް ނަޝީދު އެވަގުތު 78 މިލިޔަން ޑޮލަރު ބޭނުންވުމުންކަމަށް ޒުލްފާ ވަނީ ވިދާޅުވެފައެވެ.

ޖީއެމްއާރު އައުޓް ކުރަންވެސް އޭރު އަޅުގަނޑު އެމްޑީޕީގައި ހުއްޓަސް އަޅުގަނޑު ހިތާއި ހިތުން އެއްބަސްވިން އިގޭތޯ، އެހެންވީމާ އިންޑިއާގެ ދަށުވާކަށް ކޮންމެހެން. އޭރު 78 މިލިޔަން ޑޮލަރު ބޭނުން ވެގެން ރައީސް ނަޝީދު އިންޑިއާގެ ކުންފުޏަކަށް އެތަންދިނީ. ބިޑުކުރި ކުންފުނިތަކުގެ ތެރެއިން އިންޑިއާއިން އެންމެ ގިނައިން ލާރިދޭން ބުނީ. އިންޑިއާ ކަހަލަ ޤައުމަށް ވަރަށް ފަސޭހަވާނެ އަޅުގަނޑުމެން ކަހަލަ ކުޑަ ޤައުމަކަށް ފައިސާދޭން.

– ޒުލްފާ ވިދާޅުވިއެވެ.

ޒުލްފާ ވިދާޅުވީ ރާއްޖޭގެ މިނިވަންކަމާއި ސިޔާދަތަށް ބުރޫއަރާފަދަ ކަމެއް ކުރުމަކީ އެއްވެސް އިރެއްގައި ތާއީދު ކުރެއްވި ކަމެއް ނޫންކަމަށެވެ. ޖީއެމްއާރައަށް ރާއްޖޭގެ ބައިނަލް އަގުވާމީ ވައިގެ ބަދަރު ދިނުމުން އޭރު އެމްޑީޕީގައި އަދި ސަރުކާރުގެ މިނިސްޓަރަކަށް ހުންނެވިއިރުވެސް އެކަމާއި ދެކޮޅަށް ގިނަ ބަޔަކު ނިކުތުމުން އުފާވިކަމަށެވެ.

އެހެނޭ ކިޔާފަ ފައިސާ ދިނަސް ނުޖެހޭނެ ކޮންމެހެނެއް އަޅުގަނޑުމެންގެ ސިޔާދަތު ވިއްކާލަކަށް ކޮންމެހެނެއް. އެއީވެސް ވަރަށް ވަނދުކޮށް ކޮށްފަ އޮތްކަމެއް. އަޅުގަނޑު ވަރަށް އުފާވި ޖީއެމްއާރު އެގްރީމަންޓް މަދަނީ އަބްދުﷲ މެން ތިއްބަވައިގެން އެކަން ކުރެއްވީ. އަޅުގަނޑު މިއަދު ވަރަށް އުފަލާއިއެކީ ބުނާނަން ކިތަންމެ ބޮޑު އަގެއް ދީގެން ނަމަވެސް ދިވެހިންގެ އެއާޕޯޓް ދިވެހިންނަށް ހޯދުމަކީ ވަރަށް ރަނގަޅަށް ކުރެއްވި ކަމެކޭ.

– ޒުލްފާ ވިދާޅުވިއެވެ.

މާލޭ ބައިނަލްއަޤްވާމީ ވައިގެ ބަނދަރު، އިންޑިއާގެ ޖީއެމްއާރު ކުންފުންޏަށް ކުއްޔަށް ދެއްވުމަށް 2010 ވަނަ އަހަރުގެ ޖޫން މަހުގެ 28 ވަނަ ދުވަހު، ވެވިފައިވާ އެއްބަސްވުން ރޫޅާލައްވަން ދިވެހި ސަރުކާރުން ނިންމެވީ 2012 ވަނަ އަހަރުގެ ނޮވެމްބަރު މަހުގެ 27 ވަނަ ދުވަހުއެވެ.

މި އެއްބަސްވުން އުވާލެއްވީ ރައީސް ޑރ. މުޙައްމަދު ވަޙީދު ޙަސަންގެ ސަރުކާރުން ކަމަށްވީނަމަވެސް، މި މަސައްކަތުގައި އޭރު ރައްޔިތުންގެ މަޖިލީހުގެ މުލަކު ދާއިރާގެ މެމްބަރު، އަދި ކުރީގެ ރައީސްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ މުހިންމު ދައުރެއް އަދާކުރައްވާފައެވެ. އެމަނިކުފާނުގެ ޕާޓީ ޕީޕީއެމުންވެސް ވަނީ މިކަމުގައި މުހިންމު ދައުރެއް އަދާކޮށްފައެވެ. ރައީސް ޔާމީން 2013 ވަނަ އަހަރު ވެރިކަމަށް ވަޑައިގަތުމަށްފަހުވެސް ވަނީ މި މައްސަލަ ޙައްލުކުރެއްވުމަށް ގިނަ މަސައްކަތްޕުޅުތަކެއް ކުރައްވާފައެވެ.

އިބްރާހީމް ނާޞިރު އިންޓަރނޭޝަނަލް އެއަރޕޯޓަށް 50 އަހަރު ފުރުމުގެ މުނާސަބާ ފާހަގަކުރުމުގެ ގޮތުން 2016 ވަނަ އަހަރުގެ މެއިމަހުގެ 6 ވަނަދުވަހު ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ޔާމީން ވިދާޅުވެފައިވަނީ ރައީސް ނަޝީދުގެ ސަރުކާރުން އިބްރާހީމް ނާޞިރު އިންޓަރނޭޝަނަލް އެއަރޕޯޓް އިންޑިއާގެ ޖީއެމްއާރު ކުންފުންޏަށް ދެއްވި ދެއްވުމަކީ އިޤްތިޞާދީ ގޮތުން ހިންގެވި ބޮޑު ޖަރީމާއެއް ކަމަށެވެ. ރައީސް ވިދާޅުވީ އެއަރޕޯޓް ޖީއެމްއާރަށް ކުއްޔަށް ދެއްވިތާ އެއް އަހަރު ދުވަހުގެ ތެރޭގައި ސަރުކާރަށް ލިބިވަޑައިގަތީ އެންމެ 16 މިލިއަން ރުފިޔާ ކަމަށާއި، އެއީ އެންމެ އާދައިގެ ވިޔަފާރިއަކުންވެސް އަހަރު ދުވަހުގެ ތެރޭގައި ލިބޭނެ މިންވަރެއް ކަމަށެވެ.

އެއަރޕޯޓު ޖީއެމްއާރާ ޙަވާލުކުރެއްވުމުގެ ކުރިން ހަމައެކަނި 2000 ވަނަ އަހަރުން ފެށިގެން 2009 ވަނަ އަހަރަށް ބަލާއިރު ކޮންމެ އަހަރަކު އެވްރެޖްކޮށް 1.8 ބިލިއަން ރުފިޔާ ލިބޭކަމަށް ހިސާބުތަކުން ދައްކައެވެ. ޖީއެމްއާރާއި އެއަރޕޯޓު ޙަވާލުކުރެއްވުމުގެ ކުރިން އެއަރޕޯޓު ހިންގި ކުންފުންޏަށް މިވަރުގެ ޢާމްދަނީއަށް ލިބިފައިވާއިރު، ޖީއެމްއާރު އެއްބަސްވުން އުވާލެއްވުމަށްފަހުވެސް ގާތްގަނޑަކަށް މިހާވަރުގެ ޢާމްދަނީއެއް އެއަރޕޯޓުން ވަނީ ލިބިފައެވެ.

ޖީއެމްއާރު މައްސަލަ މުޅިން ނިމި، ބަދަލުގެ ގޮތުގައި ދިވެހި ދައުލަތުން ދައްކަންޖެހޭ ޢަދަދު ކަނޑައެޅިގެންދިޔައީ މިދިޔަ މަހުގެ 21 ވަނަ ދުވަހުއެވެ. ދިވެހި ދައުލަތުން ޖުމުލަ ދައްކަންޖެހުނު 271 މިލިއަން ޑޮލަރު، އެމްއޭސީއެލްއިން ދައްކައި ޚަލާޞްކުރީވެސް ރައީސް ޔާމީންގެ ވެރިކަމުގައެވެ.