ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމުގެ މަސައްކަތް މިހާރު ކުރިޔަށް ގެންދަވަނީ، ރައީސް ސާލިހުއާއި މަޝްވަރާ ކުރައްވައިގެން، އެމަނިކްފާނުގެ މަޝްވަރާގެމަތިން ކަމުގައި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
6 މޭގެ ޓެރަރިސްޓް ހަމަލާއަށްފަހު، ފަރުވާއަށް ރާއްޖެއިން ބޭރުގައި ހުންނެވުމަށްފަހު ރާއްޖެ އެބުރިވަޑައިގެން، މަޖިލިހުގެ އިދާރާގައި ބޭއްވި ފުރަތަމަ ނޫސްވެރިންގެ ބައްދަލުވުމުގައި، ބަރުލަމާނީ ނިޒާމެއް ރާއްޖެއަށް ގެނައުމަށް ކުރައްވަމުން ގެންދަވާ މަސްކަތްތަކުގެ ތަފްސީލު ހޯއްދެވުމަށް ނޫސްވެރިއަކު ކުރި ސުވާލެއްގެ ޖަވާބުގައި ނަޝީދު ވިދާޅުވީ، މިހާރު ކުރައްވަމުން ގެންދަވާ ބަރުލަމާނީ ނިޒާމުގެ މަސައްކަތަކީ ރައީސުލްޖުމްހޫރިއްޔާއާއި މަޝްވަރާ ކުރައްވައިގެން ކުރިޔަށް ގެންދަވާ މަސައްކަތެއް ކަމުގައެވެ. އަދި މަސައްކަތާ ގުޅޭ އިތުރު މައުލޫމާތެއް ދެއްވާނީ އިތުރަށް ރައީސުލްޖުމޫރިއްޔާ އިބުރާހިމް މުހައްމަދު ސާލިހާއި މަޝްވަރާ ކުރެއްވުމަށް ފަހުގައި ކަމުގައެވެ.
ދެން މިމަސައްކަތަކީ އަޅުގަޑު ރައީސުލްޖުމްހުރިއްޔާއާއި މަޝްވަރާ ކޮށްގެން ކުރިޔަށް ގެންދާ މަސައްކަތެއް. އެހެންވީމަ މި މައުޟޫއުގަ އަޅުގަޑު އެއްޗެއް އިތުރަށް ދަންނަވާނީ ރައީސުލްޖުމްހޫރިއްޔާއާއި އެކަމާ ގުޅޭގޮތުން ފުރިހަމަޔަށް ކުރެވުނީމަ.
– ނަޝީދު ވިދާޅުވިއެވެ.
އަދި މި ނޫސްވެރިންގެ ބައްދަލުވުމުގައި ނަޝީދު ވިދާޅުވީ، ބަރުލަމާނީ ނިޒާމަށް ތާއީދު ހޯދުމަށް ކުރައްވަމުން ގެންދަވާ މަސައްކަތްތަކާ ގުޅޭގޮތުން އިތުރަށް އެހެން ނޫސްވެރިޔަކު އިތުރަށް ސުވާލުކުރެއްވިޔަސް ތަކުރާރު ކުރައްވާނީ ހަމަ މިޖަވާބު ކަމުގައި ވިދާޅުވެ، އިތުރަށް އެމައުޝޫއުގައި ވާހަކަ ދެއްކުމުގެ މަގު ނަޝީދު ވަނީ ނޫސްކޮންފަރެންސް ފެށިގެން ދިއުމާއެކުހެން ކަހަލަ ގޮތަކަށް ބަންދު ކުރައްވާފައެވެ.
ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމަށް ނަޝީދު އިސްވެ ހުންނަވައިގެން ކުރައްވާ މަސައްކަތްތައް ކުރައްވަމުން ގެންދަވަނީ ރައީސް ސާލިހުގެ މަޝްވަރާގެ މަތިންކަމަށް މިއަދު ނަޝީދު ވިދާޅުވި ނަމަވެސް މީގެ ކުރިން ރައީސް ސާލިހު ވިދާޅުވެފައިވަނީ، ބަރުލަމާނީ ނިޒާމެއް ގައުމާމެެދު ވިސްނެވުމަށްވުރެ އެމްނިކްފާނު އިސްކަން ދެއްވަނީ ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް ފުއްދެވުމަށް ކަމަށެވެ. އަދި ރައީސް ސާލިހު ވިދާޅުވެފައިވަނި، ބަރުލަމާނީ ނިޒާމަމަށް އަލުން ދިޔަޔަސް ދެވެން އޮންނާނީ ރައްޔިތުންގެ އާންމު ފެންނަ ނުފެންނަ ވޯޓަކުން އެގޮތައް ނިންމައި ހާލަތެއްގައި އެކަނި ކަމަށެވެ.
އަދި ރައީސް ނަޝީދުގެ ބަރުލަމާނީ މަސައްކަތްތަކާ ގުޅޭގޮތު މީގެ ކުރިން ރައީސް އޮފީހުގެ ތަރުޖަމާން ވިދާޅުވެފައިވަނީ، ރައީސް ސާލިހު ދެކެވަޑައިގަންނަވާ ގޮތުގައި ވެރިކަމަށް ވަޑައޮގެންނެވުމަށް އެކުލަވާލެއްވި މެނިފެސްޓޯގައި ނިޒާމު ބަދަލުކުރާ ވާހަކަ ނެތްކަމަށާއި، އެހެންކަމުން، އެއީ މިސަރުކާރުގެ ސިޔާސަތު ނޫންކަމުގައެވެ.
ނަޝީދު އިސްވެ ހުންނަވާ، ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލު ކޮށްކުމަށް މިހާރު ގެންދަވަނީ ޕެޓިޝަނެއްގައި ސޮއިކުރަމުންނެވެ. އަދި މިޕެޓިޝަނަށް ތާއީދު ހޯދުމަށް މިމަސައްކަތުގައި އުޅުއްވާ ފަރާރްތަކުން މިހާރުވަނީ ރާއްޖެތެރޭގެ ދަތުރުތައް ވެސް ފަށާާފައެވެ.
