ހަމަސް ދުވަހަށްފަހު ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ރާއްޖެ ވަޑައިގެންފިއެވެ.
ރައީސް ނަޝީދަށް އެއާޕޯޓުން މަރުހަބާ ދެންނެވީ ރައީސް އިބްރާހިމް މުހައްމަދު ޞާލިހުއެވެ. އެމަނިކުފާނު ފްލައިޓުން ފޭބުމާއިއެކު ރައީސް ޞާލިހާއި ސަލާނ ްކުރެއްވުމަށްފަހު ވަނީ ދެބޭފުޅުން ކާރަށް އަރާ ވަޑައިގެންފައެވެ. އަދި ކާރުގައި ވީއައިޕީ ލައުޖަށް ވަނީ ވަޑައިގެންފައެވެ.
ރައީސް ނަޝީދަށް އެއާޕޯޓް ވީއައިޕީގައި ދައުލަތުގެ ވަޒީރުންނާއި، މަޖިލިސް މެމްބަރުންވެސް ވަނީ މަރުހަބާ ދަންނަވާފައެވެ. ރައީސް ނަޝީދު ރާއްޖެއަށް 3 ދުވަހަށް ކުރައްވާ ދަތުރުފުޅާއި ގުޅިގެން ސެކިއުރިޓީ ވަނީ ވަރަށް ވަރުގަދަކޮށްފައެވެ. އެއާޕޯޓުގައިވެސް ގިނަ އަދަދެއްގެ ސެކިއުރިޓީން ވަނީ ހަރަކާތްތެރިވެފައެވެ.
ރައީސް ނަޝީދު ރާއްޖެ ވަޑައި ނުގަނެ މިހާ ދުވަހު މަޑު ކުރެއްވީ އެމަނިކުފާނުގެ އާއިލާއިންނާއި، އެކުރިންގެ އެދުމަށްކަމަށް ރައީސް ނަޝީދު ވަނީ ވިދާޅުވެފައެވެ. އަދި އެމަނިކުފާނުވަނީ މަޖިލިސްގެ ޗުއްޓީ އިތުރު ކުރައްވައި، ސަލާމަތީ ކަންކަން ހުރި ގޮތުން ރާއްޖެއަށް ވަޑައި ގެންނެވުމަށް އުޒުރުވެރިވާކަމަށް ވިދާޅުވެފައެވެ. ނަޝީދަށް ހަމަލާދިން ކަމަށް ތުހުމަތުކުރެވޭ މީހުން ހައްޔަރުކޮށް، އެ މީހުންގެ މައްޗަށް ދައުވާ އުފުލައި ޝަރީއަތް ވެސް ވަނީ ފަށައިފައެވެ. މި ހަމަލާގެ ފަހަތުގައި ވަނީ ހައްދުފަހަނާއެޅި ފިކުރުގެ ބައެއް ކަމަށް ތަހުގީގަށް އެނގިފައިވާ ކަމަށް ފުލުހުން ބުނެފައިވެއެވެ.
މޭއިމަހުގެ 6 ވަނަ ދުވަހުގެ ރޭ އެމަނިކުފާނު ދިރިއުޅުއްވާ ގ.ކެނެރީގެއިން ނިކުމެވަޑައިގެން ހިންގަވާފައި މަޖީދީމަގުގައި ޕާކުކޮށްފައިއޮތް ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައިގެން ދިން ޙަމަލާގައި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިވަޑައިގެންފައެވެ. އެމަނިކުފާނަށް އެންމެ ފުރަތަމަ ފަރުވާދެއްވި އޭޑީކޭގެ ސްޕެޝަލިސްޓުންގެ ޓީމުންވެސް ވަނީ އެކަން ހާމަކުރައްވާފައެވެ.
