ހިޔާ ފްލެޓްގެ ކުލީގެ ގޮތުގައި ކުރީގެ ރައީސް އަބްދުﷲ ޔާމީންގެ ސަރުކާރުން ކަނޑައަޅާފައިވާ އަގަށް ކުލި ކުޑަކުރަންޖެހޭ ކަމުގައި ސަރުކާރު ކޯލިޝަންގައި ހިމެނޭ އަދާލާތު ޕާޓީގެ އިލްމުވެރިންގެ މަޖިލީހުގެ މެމްބަރު ޝައިޚު އަލީ ޒައިދު ވިދާޅުވެއްޖެއެވެ.
ޝައިޚު ޒައިދު މިފަދައިން ވިދާޅުވީ ހިޔާ މަޝްރޫޢުގެ ފްލެޓްތަކަށް މަހަކު ދައްކަންޖެހޭ ޢަދަދު 5600އަށްވުރެ ކުޑަކޮށްދެއްވުމަށް އެދި 3 ވަނަ ފަހަރަށް ރައީސް އޮފީހަށް ހުށައަޅުއްވާފައިވާކަމަށް މާލޭގެ މޭޔަރު ޑރ.މުޙައްމަދު މުޢިއްޒު މިއަދު ވިދާޅުވެފައި ވަނިކޮށެވެ.
ޝައިޚު ޒައިދު ވިދާޅުވީ ކުރީގެ ސަރުކާރުން ރައްޔިތުންނަށް ޔަގީންކަން ދީފައިވާ އަގު މިސަރުކާރުންވެސް ހިފަހައްޓަން ޖެހޭކަމަށެވެ. ހިޔާ ފްލެޓުގެ ކުއްޔަކީ 5،600 ރުފިޔާކަމަށް ކަނޑައަޅާފައިވާއިރު އެގުގައި ހިފެހެއްޓުމަކީ މިސަރުކާރުން ފައިސާ ލައިގައިގެންވެސް ކުރަންޖެހޭ ކަމެއްކަމަށް ޒައިދު ވިދާޅުވިއެވެ. މިފަދަ ރައްޔިތުންނާއި ގުޅުންހުރި އަސާސީ ޚިދުމަތްތަކަކީ ކުޅި ކުޅިވަރަށް ހަދައިގެން ނުވާނެކަމަށް ޝައިޚު ވިދާޅުވިއެވެ.
ކުރީ ސަރުކާރުން ހިޔާ ފްލެޓްގެ އަގަކީ 5600 ރުފިޔާކަމަށް ރައްޔިތުންނަށް ކޮމިޓްމަންޓް ދިނުމުން އެ އަގު މިސަރުކާރުން ހިފަހައްޓަންޖެހޭނެ ކަމުގައި ދެކެން! އެއީ ސަރުކާރުން އިތުރު ފައިސާ ލައިގެން ކަމަށްވިޔަސް! ސަރުކާރުތަކަކީ މިކަހަލަ ކަންކަމުގައި ކުޅިވަރު ކުޅޭބަޔަކަށް ވެގެން ނުވާނެ!
– ޝައިޚު ޒައިދު ވިދާޅުވިއެވެ.
ހިޔާ ފެލެޓް މަހުކުލީގެ ގޮތުގައި 7500 ރުފިޔާ އަދި މެއިންޓަނެސް ފީގެ ގޮތުގައިނަގާ 1000 ރުފިޔާ ހިމެނޭހެން ޖުމްލަ 8500 ރުފިޔާ ނެގުމަށް އެޗްޑީސީން ވަނީ ނިންމާފައެވެ. ހިޔާ ފްލެޓްތަކުގެ ކުލީގެ ގޮތުގައި ނެގުމަށް ނިންމި ފީ ބޮޑުކަމަށް ބުނެ ފްލެޓް ލިބު ބައެއް މީހުން ވަނީ ކަންބޮޑުވުން ފާޅުކޮށްފައެވެ. އަދި އެކަމާއި ގުޅިގެން މުޒާހަރާވެސް ކޮށްފައިވެއެވެ. ފްލެޓް ލިބުނު މީހުން އެދެނީ ކުލި 5600އަށް ކުޑަކުރުމަށެވެ.
ހިޔާ ފްލެޓްތައް ލިބުނު މީހުންނާއެކު އެއްބަސްވުން އެކުލަވާލާ ތަޅުދަނޑި މިހާރު ހަވާލުކޮށްފައިވާއިރު ފިނިޝިންގެ މަސައްކަތްތައްވެސް މިވަގުތު އަންނަނީ ކުރަމުންނެވެ. އަދި މަގުބޫލު ސަބަބެއް ނެތި އެއްބަސްވުމުގައި ސޮއި ނުކޮށް އޮތް ނަމަ ފިނިޝިން މަސައްކަތަށް ކުއްޔާ ނުލައި އިތުރު މުއްދަތެއް ނުދެވޭނެކަމަށް ވަނީ ބުނެފައެވެ. ހިޔާ މަޝްރޫގެ ފްލެޓުތަކުން ނެގުމަށް ކަނޑައަޅަފައިވާ އަގަށް ބަދަލެއް ގެނައުމަށް ނިންމާފައިނުވާކަމަށްވެސް އެޗްޑީސީން ބުނެއެވެ.
