އުދަ އަރައިގެން ޅ.ކުރެންދޫއަށް ލިބުނު ގެއްލުން ހަތަރު މިލިއަނަށް އަރާނެކަމަށް އެރަށު ކައުންސިލުން ބުނެފިއެވެ.
ކުރެންދޫ ކައުންސިލުން ބުނީ އުދަރައިގެން އެރަށަށް ވަރަށް ބޮޑު ގެއްލުމެއް ވެފައިވާކަމަށެވެ. ޚާއްޞަކޮށް ރައްޔިތުންގެ ބުރަ މަސައްކަތުން ބިނާކުރި އަދިރައްޔިތުންގެ އުއްމީދާއި ގުޅިފައިވާ ފެންވަރު ރަނގަޅު ޓާފް ދަނޑު ބޭނުން ނުކުރެވޭވަރަށް ހަލާކުވެފައިވާކަމަށާއި، އޭގެ ގެއްލުން އެކަނިވެސް 3.5 މިލިއަނަށް އަރާނެކަމަށް ކައުންސިލުން ބުންޏެވެ. އަދި އެނޫން ގެއްލުންތަކާއެކު އެރަށަށް ލިބުނު ގެއްލުން 4 މިލިއަނަށް އަރާނެކަމަށް ލަފާކުރެވޭކަމަށްވެސް ކުރެންދޫ ކައުންސިލުން ބުންޏެވެ.
ފާއިތުވި ދެ ދުވަހު ކުރެންދޫއަށް އުދަ އަރައި ރަށުގެ ވަރަށް ބޮޑު ސަރަހައްދަކަށް ބޮޑެތި ގެއްލުންތައް ވަނީ ލިބިފައެވެ. އެކަމާއި ގުޅިގެން އާންމު ދިރިއުޅުމަށް ވަނީ ވަރަށް ބޮޑަށް އަސަރު ކޮށްފައެވެ. އުދައިގެ ސަބަބުން އެންމެ ބޮޑު ގެއްލުމެއް ލިބިފައިވަނީ ކުރެންދޫގެ ފަހުރެއް ކަމަށްވާ އެ ރަށުގެ ޓާފް ދަނޑަށެވެ. އެ ދަނޑަށް ވަނީ ވަރަށް ބޮޑެތި ގެއްލުންތަކެއް ލިބިފައެވެ.
ދައުރުވާ ފޮޓޯތަކުން ދަނޑުމައްޗައް ގަލާއި، ވެލި އަދި ކުނި އެޅިފައި ހުރި މަންޒަރު ފެނިގެން ދެއެވެ. އެ ދަނޑު ތަރައްގީކޮށްފައި ވަނީ ރަށުގެ ރައްޔިތުންގެ އެހީއާއި އެކުގައެވެ. ގާތްގަނޑަކަށް ހަތަރު މިލިއަނެއްހާ ރުފިޔާ ރައްޔިތުންގެ ޖީބުން ހަރަދުކުރިއެވެ. މިއީ އެރަށު ރައްޔިިތުން ހިތާމަ ކުރާނެ ކަމެކެވެ. އެހާ ބުރަ، އެހާ ގިނަ ފައިސާ ހަރަދުކޮށްގެން އެތައް ބައެއްގެ އުއްމީދާއި އެތައް ބަައެއްގެ ހުވަފެނީ ދަނޑަށް ލިބިފައި ހުރި ގެއްލުންތަކުންނެވެ.
ކޮމެންޓު ފޮނުވާ