އދ.ގެ ޢާންމު މަޖިލީހުގެ ރައީސްގެ ހައިސިއްޔަތުން ރާއްޖެއަށް ވަޑައިގަތުމަށް ޢަބްދުﷲ ޝަހިދަށް، ރައީސް އިބްރާހީމް މުޙައްމަދު ޞާލިޙް ދެއްވި ދައުވަތަށް ޕީއެންސީގެ ނާއިބު ރައީސް އަދި މާލެ ސިޓީ ކައުންސިލް މެންބަރު އިބްރާހީމް ޝުޖާޢު ފާޑުވިދާޅުވެއްޖެއެވެ.
އދ.ގެ ޢާންމު މަޖިލީހުގެ ރިޔާސަތޔ ބަލަހައްޓަވމުން ގެންދަވާ ރާއްޖޭގެ ފޮރިން މިނިސްޓަރ ޢަބްދުﷲ ޝާހިދައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އދ.ގެ މައި އިދާރާގައި ބައްދަލުކުރައްވާފައެވެ. އަދި ދެބޭފުޅުންގެ ބައްދަލުވުމުގައި ރައީސުލްޖުމްހުރިއްޔާ ވަނީ ޢަބްދުﷲ ޝާހިދު އ.ދ. ގެ 76 ވަނަ ޢާންމު މަޖިލީހުގެ ރައީސްކަމަށް ހޮވިވަޑައިގަތުމާ ގުޅިގެން މަރުޙަބާ ވިދާޅުވެ، އެމަނިކުފާނުގެ އުންމީދީ ރިޔާސަތުގައިވާ "ފައިވް ރޭސް އޮފް ހޯޕް" ގެ ކަންކަން ހާސިލުކުރެއްވުމުގައި ކާމިޔާބީއަށް އެދިވަޑައިގެންފައެވެ. ރައީސުލްޖުމްހޫރިއްޔާ ވަނީ އ.ދ.ގެ ޢާންމު މަޖިލީހުގެ ރައީސްގެ ހައިސިއްޔަތުން ރާއްޖެއަށް ދަތުރުފުޅެއް ކުރެއްވުމަށް ދަޢުވަތުދެއްވާފައެވެ.
މިކަމަށް ފާޑުވިދާޅުވެ ޝުޖާޢު ވިދާޅުވީ، ރާއްޖޭގެ ޚާރިޖީ ވަޒީރު، ރާއްޖެ ވަޑައިގަތުމަށް ރާއްޖޭގެ ރައީސުލްޖުމްހޫރިއްޔާ ރަސްމީ ދަޢުވަތު އެެރުވުން ވެގެން ދިޔައީ ޤަރުނުގެ ޖޯކަކަށްކަމަށެވެ. ޚާރިޖީ ވަޒީރަށް އދ ގެ މަޤާމު ލިބުނީ ރައްޔިތުންގެ ޓެކްސް ފައިސާއިން ބޮޑު ޚަރަދެއް ކޮށްގެންކަމަށާއި، ބުއްދި ހަމަޖެހޭ ކަންކަން ކުރުމަށް ޝުޖާޢު ވަނީ ގޮވާލައްވާފައެވެ.
ރާއްޖޭގެ ޚާރިޖީ ވަޒީރަށް ރާއްޖޭގެ ރައީސުލްޖުމްހޫރިއްޔާ ރާއްޖެ ވަޑައިގަތުމަށް ރަސްމީ ދަޢުވަތު އެެރުވުން ވެގެން މިދިޔައީ ޤަރުނުގެ ޖޯކަކަށް.ޚާރިޖީ ވަޒީރަށް އދ ގެ މަޤާމު ލިބުނީ ރައްޔިތުންގެ ޓެކްސް ފައިސާއިން ބޮޑު ޚަރަދެއް ކޮށްގެން.ބުއްދި ހަމަޖެހޭ ކަންކަން ކޮށްބަލަ.#ވަޓްއަޖޯކް
— Ibrahim Shujau (@IbrahimShujaau) September 21, 2021
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އ.ދ. ގެ ޢާންމު މަޖިލީހުގެ 76 ވަނަ ބައްދަލުވުމުގެ ޙަވާސާގައި އ.ދ.ގެ ޢާންމު މަޖިލީހުގެ ރައީސް ޢަބްދުﷲ ޝާހިދާ ބައްދަލުރައްވާ ދެއްކެވި ވާހަކަފުޅުގައި ވަނީ، ޢަބްދުﷲ ޝާހިދު ރާއްޖޭގެ ޚާރިޖީ ސިޔާސަތު ތަންފީޒުކުރުމުގައި ހޯއްދަވާފައިވާ ކާމިޔާބީ ފާހަގަކުރައްވައި ޝުކުރުއަދާކުރައްވާފައެވެ. އަދި، ޢަބްދުﷲ ޝާހިދު ވަނީ މި ކާމިޔާބީގެ ފަހަތުގައި ރާއްޖޭގެ ޚާރިޖިއްޔާގައި މަސައްކަތްކުރައްވާ ބޭފުޅުންގެ ޤާބިލްކަމާއި ފަންނުވެރިކަން މުހިންމު ދައުރެއް އަދާކުރާކަމުގައި ވިދާޅުވެފައެވެ.
އ.ދ.ގެ ޢާންމު މަޖިލީހުގެ ރައީސް ވަނީ އެމަނިކުފާނު އެ މަޤާމަށް ކުރިމަތިލުމާ ހަމައިން ފެށިގެންވެސް އެމަނިކުފާނަށް ކުރެއްވި އިތުބާރާއި ދެއްވި އެއްބާރުލެއްވުމަށްޓަކައި ރައީސުލްޖުމްހޫރިއްޔާއަށް ޝުކުރުއަދާކުރައްވާފައެވެ. އަދި، ދިވެހި ދަރިޔަކަށްވެ އ.ދ.ގެ ޢާންމު މަޖިލީހުގެ ރައީސްގެ މަޤާމުގައި ހުންނެވުމަށް ފުރުޞަތު ލިބުމަކީ އެމަނިކުފާނަށް ލިބުނު ޝަރަފެއްކަމަށާއި، ރާއްޖޭގެ ޚާރިޖީ ސިޔާސަތު ބިނާވަނީ ބޭރު ޤައުމުތަކާއެކު މިހާރު އޮންނަ ގުޅުންތައް ދެމެހެއްޓުމާއެކު އާ ގުޅުންތައް ޤާއިމު ކުރުމަށްކަމުގައި ޢަބްދުﷲ ޝާހިދު ވިދާޅުވިއެވެ. މީގެ އިތުރުން ވެސް ޢަބްދުﷲ ޝާހިދު ވިދާޅުވިގޮތުގައި އ.ދ. ގެ 76 ވަނަ ޢާންމު މަޖިލީހުގެ ރައީސްގެ މަޤާމު އެމަނިކުފާނަށް ކާމިޔާބުކުރެއްވުމުން ރަމްޒުކޮށްދެނީ ބައިނަލްއަޤްވާމީ މައިދާނުގައި ރާއްޖޭގެ ޚާރިޖީ ސިޔާސަތު ބަލައިގަނެފައިވާކަމެވެ.
