ފަންނީ މަޤާމުތަކުގައި ތިބޭ މުވައްޒަފުންނަށް މަޤާމުގެ ކުރިއެރުން ދިނުން މެދުކަނޑާލުމާއި ގުޅިގެން ޑޮކްޓަރުންނާއި ނަރުހުން ފާޅުކުރި ކަންބޮޑުވުންތަކަށް ޙައްލެއް ހޯއްދަވައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވައިފިއެވެ.

ޑޮކްޓަރުންނާއި ނަރުހުން ކަންބޮޑުވުން ފާޅުކުރައްވާފައިވަނީ، ފަންނީ އޮނިގަނޑުތަކުގެ ވަޒީފާތަކުގައި ތިބި މީހުންނަށް ޕާފޯމަންސް އެޕްރެއިސަލްއަށް ރިއާޔަތްކޮށް ދޭ ގްރޭޑް ކުރިއެރުން ދިނުން ވަގުތީ ގޮތުން މަޑުޖައްސާލަން ފިނޭންސްގެ ލަފާގެ މަތިން ސިވިލް ސާވިސް ކޮމިޝަން (ސީއެސްސީ) އިން ނިންމުމާއި ގުޅިގެންނެވެ.

ސީއެސްސީގެ އެނިންމުން އަނބުރާ ގެންދިއުމަށް ގޮވާލާ އައިޖީއެމްއެޗްގެ 491 ޑޮކްޓަރުންނާއި ނަރުހުން ވަނީ ޕެޓިޝަނެއްގައި ސޮއިކުރައްވާ ރައީސުލްޖުމްހޫރިއްޔާއަށް ހުށައަޅުއްވާފައެވެ. އަދި އެ މައްސަލާގައި ރައީސް ވަނީ ޑޮކްޓަރުންނާއި ނަރުހުންނާއި މިއަދު ބައްދަލުކުރައްވާފައެވެ.

މިކަމާއި ގުޅިގެން ރައީސް އޮފީހުގެ ތަރުޖަމާން މުޙައްމަދު މަބްރޫކް ޢަޒީޒް ވިދާޅުވެފައިވަނީ، ޕްރޮމޯޝަން ދިނުން މެދުކަނޑާލުމަށް އަންގާފައިވާ އެންގުމަކީ މިދިޔަ އަހަރުގެ މާރިޗު މަހު ހިސާބުގައި ކޯވިޑާއި ގުޅިގެން އެޅި ފިޔަވަޅެއްގެ ގޮތުންނެވެ. ނަމަވެސް އެއީ ވަގުތީ ނިންމެވުމަށްކަމަށް މަބްރޫކް ވިދާޅުވިއެވެ. އަދި ކޯވިޑާއި ގުޅިގެން ދިމާވެފައިވާ މާލީ ދަތިކަން ރަނގަޅުވަމުން އަންނަ މިންވަރަކުން އެކަންކަމަށް ބަދަލު ގެންނަވާނެކަމަށްވެސް މަބްރޫކް ވިދާޅުވިއެވެ.

ޑޮކްޓަރުން ވަނީ، ކޯވިޑްގެ ބަލިމަޑުކަން ރާއްޖެއަށް ކުރިމަތިވުމާއެކު، މާލީ ދަތިތަކާ ހުރެ ޕްރޮމޯޝަން ދިނުން ވަރަށް ބޮޑަށް ލަސްވި ނަމަވެސް ޑޮކްޓަރުން އައީ ހުއްޓާނުލައި މަސައްކަތް ކުރަމުން ކަމަށް ވިދާޅުވެފައެވެ. އަދި ވަޒީފާތަކުގައި ތިބި މީހުންނަށް ޕާފޯމަންސް އެޕްރެއިސަލް އަށް ރިއާޔަތްކޮށް ކޮންމެ ދެ އަހަރަކުން ޕްރޮމޯޝަން ދެމުން އަންނަ ކަމަށާއި އޭގައި މާބޮޑު މުސާރައިގެ ކުރިއެރުމެއްވެސް ނުލިބޭކމަށް ބޮކްޓަރުން ފާޅުކޮށްފައިވާ ކަންބޮޑުވުމުގައިވެއެވެ. މީގެ އިތުރުން މަގާމުގެ ކުރިއެރުން ލިބުމުން މަސައްކަތް ކުރުމަށް ވަރަށް ބޮޑު ހިތްވަރަކަށްވި ނަމަވެސް އެ ބައި ހުއްޓާލުމުން ޑޮކްޓަރުންނާއި ނަރުހުން ވެސް މާޔޫސްވެފައިވާކަމަށްވެސް ބުނެފައިވެއެވެ.

ޑޮކްޓަރުން ވަނީ ސިއްޙީ ދާއިރާގެ މުސާރާގެ އޮނިގަނޑު އޮންނަގޮތުން ބޮޑެތި ގޮންޖެހުންތަކާއި ކުރިމަތިވާކަމަށްވެސް ހާމަކުރައްވާފައެެވެ. ޑޮކްޓަރުންގެ މިކަންބޮޑުވުންތަކާއި ގުޅިގެން، އެކަން ބަލައިގަނެ އެއީ ހައްލުކުރަންޖެހޭ މައްސަލައެއްކަމަށް ރައީސްއަށް ޤަބޫލުފުޅުކުރެއްވޭތީ، ފިނޭންސް މިނިސްޓްރީއާއި ގުޅިގެން އެކަންކަން ހައްލުކޮށްދެއްވާނެކަމުގެ ޔަޤީންކަން ރައީސް ދެއްވާފައިވާކަމަށް ރައީސް އޮފީހުން ވިދާޅުވެއެވެ.

މިގޮތުން އަންނަ އަހަރު މުސާރާއިގެ އޮނިގަނޑަށް އެންމެ އަވަހަށް ބަދަލު ގެންނަވާނީ ސިއްޙީ ދާއިރާއާއި ތަޢުލީމީ ދާއިރާކަމަށް ސަރުކާރުން ހާމަކުރައްވައެވެ. އަދި އެދާއިރާތަކުގައި ހުރި މައްސަލަތައް ހައްލުކުރުމަށް މަސައްކަތްކުރަމުން އަންނަކަމަށްވެސް ސަރުކާރުން ބުންޏެވެ.