ފުލުފުލުގައި، ބޮމުގެ އިންޒާރާއި، މަރުގެ އިންޒާރުތައް ދެމުންދާއިރުވެސް ސަރުކާރުން މިކަންކަން ސީރިއަސް މައްސަލަތަކެއްގެ ގޮތުގައި ނުނަގާކަމީ ނުހަނު ކަންބޮޑުވާ ކަމެއްކަމަށް ރައްޔިތުންގެ މަޖިލީހުގެ ޖުޑީޗަރީ ކޮމެޓީގެ މުޤައްރިރު މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
ހުޅުމާލޭ ޖަލުގައި 3 އަހަރުގެ ޖަލު ހުކުމެއް ތަންފީޒު ކުރަމުންދިޔަ މުހައްމަދު އަސްލަމް ނިޔާވުމާއި ގުޅިގެން، އެކަން ތަހުގީގްކޮށް ބެލުމަށް ހުށަހެޅު ކުއްލި މައްސަލާގައި ވާހަކަ ދައްކަވަމުން އިންތި ވިދާޅުވީ ނޫރު މިސްކިތަކީ މަރުތަކުގެ ކޮމިޝަންގެ ރިޕޯޓުގައި މިމިސްކިތަކީ ޓެރަރިޒަމްގެ އަމަލުތައް ހިންގުމަށް ބޭނުންކުރާ މިސްކިތެއްކަން ބަޔާންކޮށްފައިވާކަމަށެވެ.
ނޫރު މިސްކިތާއި ގުޅޭގޮތުން މީގެ ކުރިންވެސް ކަންބޮޑުވުން އޮތްއިރު، މިކަމުގައި އެކަށީގެންވާ ފިޔަވަޅުތަކެއް ނޫނީ ބަލަންޖެހޭ ކަންކަން ނުބަލައި ތިއްބައި ބޮމުގެ ހަމަލާގެ އިންޒާރު މިސްކިތަށް ލިބިގެންދިޔަކަމީ ނުހަނު ކަންބޮޑުވާ ކަމެއްކަމަށެވެ. މިކަމަކީ އެއްވެސް ހާލެއްގައި ސީރިއަސްކަން ކުޑަކޮށް ދޫކޮށްލެވޭ ވަރަށްވުރެ ބޮޑު މައްސަލައަކަށްވާއިރު، ސަރުކާރުން މިފަދަ މައްސަލަތަކަށް ދޭންޖެހޭ ސަމާލުކަން ދޭތަން ނުފެންނަ ކަމަށް އިންތި ވިދާޅުވިއެވެ.
އެހެންވީމާ އަޅުގަނޑުގެ ސުވާލަކީ މިމިސްކިތާއިމެދު ސާވޭލަންސެއް ފުލުހުންނާއި، ކަމާއިބެހޭ މުވައްސަސާތަކުން ނުހިންގާތޯތޯ އަނެއްކާވެސް މިވަރުގެ އިންޒާރެއް މި މިސްކިތުގެ ތެރެއިން ދެވޭ ގޮތް މިވީ. މިއީ ހަމަ މިހާ ފަރުވާކުޑަކޮށް ދައުލަތުން، ސަރުކާރުން ނަގަންޖެހޭނެ ކަމެއްތޯ. އަޅުގަނޑުމެންގެ މަޖިލީހުގެ ރައީސް މިވަނީ ބޮމެއް ގޮއްވާލައި އަވަހާރަކޮށްލުމަށް ހަމަލާދީފަ. މިމައްސަލާގައި އަދިވެސް ކުއްލި ނުރައްކަލުގެ ހާލަތެއް އިއުލާން ކުރަން ސަރުކާރުން ނުދެކޭކަމީ، އަޅުގަނޑު ހަމަ އިންތިހާއަށް ކަންބޮޑުވާކަމެއް. ފުލު ފުލުން ހަމަ މަރުގެ އިންޒާރާއި، ބޮންގޮއްވާލާނެކަމުގެ އިންޒާރުދޭކަމީ އަޅުގަނޑު ނުހަނު ކަންބޮޑުވާކަމެއް.
– އިންތި ވިދާޅުވިއެވެ.
އިންތިވަނީ މިފަދަ މަރުގެ މައްސަލަތަކާއި، ބޮމުގެ އިންޒާރުތަކަށް ސަރުކާރުން އިތުރަށް ސަމާލުވާންޖެހޭކަމަށް ދަންނަވާފައެވެ.
އަސްލަމްގެ މަރުގެ މައްސަލާގައި ވާހަކަ ދެއްކެވި ސަރުކާރަށް ނިސްބަތްވާ އެމްޑީޕީގެ މެމްބަރުން ވިދާޅުވީ ޖަލުގައި އަސްލަމް ނިޔާވި ހިސާބުން މަޖިލީހުގެ ހިއުމަންރައިޓްސް ކޮމެޓީން ފާރަވެރިވެ ކޮމިޝަންތަކުން މަސައްކަތް ކުރާގޮތް ބަލަމުންދާކަމަށެވެ. އެގޮތުން އެޗްއާރުސީއެމްއިން ރޭގައިވެސް ދެފަހަރެއްގެ މަތީން ޖަލަށް ޒިޔާރަތްކޮށް، މިހާދިސާގެ މައުލޫމާތު އޮޅުން ފިލުވާފައިވާކަމަށެވެ. އަދި މިކަން ކޮމިޝަނުން ތަހުގީގް ކުރަމުންދާ ގޮތާއި ފުލުހުން މިކަމުގައި އަމަލުކުރާ ގޮތް މަޖިލީހުން ބަލާނެކަމަށެވެ. މަޖިލީހުގައި އެމްޑީޕީގެ ސުޕަ މެޖޯރިޓީ އޮތް ނަމަވެސް ލާއިންސާނީ އަނިޔާތަކަކީ އެމްޑީޕީން ޖާގަދީގެން ދޫކޮށްލާނެ މައްސަލަތަކެއް ނޫންކަމަށް މެމްބަރުން ވަނީ ވިދާޅުވެފައެވެ.
ހުޅުމާލޭ ޖަލުގައި ހުކުމް ތަންފީޒު ކުރަމުން ދަނިކޮށް ރޭ ކުއްލި ގޮތަކަށް ނިޔާވި އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޛުކުރަމުންދިޔަ މީހެކެވެ. އަދި ނިޔާވިއިރު އޭނާއަކީ ބޮޑު ބައްޔަކަށް ބޭސްފަރުވާ ކުރަމުންދިޔަ މީހެއް ނޫންކަމަށް ކަރެކްޝަނުން ބުނެއެވެ.
