ހުޅުމާލެ ޖަލުގައި 3 (ތިން) އަހަރުގެެ ޖަލު ޙުކުމެއް ތަންފީޒު ކުރަމުންދިޔަ ގދ. ވާދޫ/ ޖަނަވަރީގެ މުޙައްމަދު އަސްލަމް (40 އަހަރު) ނިޔާވުމާއި ގުޅިގެން ޢާއިލާގައި ހުރި ކަންބޮޑުވުންތައް އޮޅުންފިލުވައި، އެކަންކަމަށް ކަމާއިބެހޭ ފަރާތްތަކުން ޖަވާބުދާރީ ކުރުމުގެ މަސައްކަތް އިދިކޮޅު ޕްރޮގްރެސިވް ކޯލިޝަންގެ ޕާލިމަންޓްރީ ގްރޫޕުން ފަށައިފިއެވެ.
ރޭ ގާތްގަނޑަކަށް 6:00 އެހާ އިރު ޔާޑު ސަރަހައްދުގައި އިށީދެގެން އިންދާ ކުއްލިއަކަށް ވެއްޓުމާ ގުޅިގެން ވަނީ އެމަޖެންސީ ހާލަތުގައި ހުޅުމާލެ ހޮސްޕިޓަލަށް ގެންގޮސް، އަދި ހޮސްޕިޓަލުން ބެލުމަށްފަހު އޭނާ ރޭ 20:23 ގައި ނިޔާވެފައިވާ ކަމަށް ކަރެކްޝަނުން ވަނީ ބުނެފައެވެ.
އޭނާ ނިޔާވުމާއި ގުޅިގެން އިދިކޮޅު ޕީޕީއެމްގެ ނާއިބް ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމްއާއި، ހުޅުމާލެ ދާއިރާގެ ކައުންސިލަރު އިބްރާހިމް ޝުޖާވަނީ އާއިލާއާއި ބައްދަލުކޮށް އާއިލާގައި ހުރި ކަންބޮޑުވުންތައް އޮޅުން ފިލުވާފައެވެ. އަދި މިކަމުގައި އާއިލާގައި ހުރި ކަންބޮޑުވުންތަކާއި، އުފެދިފައިވާ ސުވާލުތަކަށް ޖަވާބު ހޯދުމުގެ މަސައްކަތް ޕީޕީއެމްގެ ޕާލިމަންޓްރީ ގްރޫޕުން ފަށާފައިވާކަމަށް ޝުޖާ ވަނީ ބުނެފައެވެ.
ހުޅުމާލެ ޖަލުގައި މިއަދު ނިޔާވި އަސްލަމްގެ އާއިލާގެ ކަންބޮޑުވުންތައް @ProgressPartyMV އިން އަޑު އަހައިފިން.އާއިލާގެ ކަންބޮޑުވުން ތަކަށް ކަމާބެހޭ ހުރިހާ ވުޒާރާ ތަކުން ޖަވާބުދާރީ ކުރުވުމުގެ މަސައްކަތުގައި @ProgressPartyMV ދެމިއޮންނާނެ ކަމުގެ ޔަޤީންކަން އަރުވަން.1/2 pic.twitter.com/4gRwkUyc5U
— Ibrahim Shujau (@IbrahimShujaau) September 13, 2021
ކަރެކްޝަނުން ބުނެފައިވަނީ މުޙައްމަދު އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޛުކުރަމުންދިޔަ މީހެއް ކަމަށެވެ. އަދި ނިޔާވިއިރު އޭނާއަކީ ބޮޑު ބައްޔަކަށް ބޭސްފަރުވާ ކުރަމުންދިޔަ ފަރާތެއް ނޫންކަމަށެވެ. އަސްލަމް ހުޅުމާލެ ހޮސްޕިޓަލަށް ގެންދިއުމާ ގުޅިގެން ކަރެކްޝަނުން ވަނީ ވަގުތުން އެކަން އިންސްޕެކްޓަރ އޮފް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް އަންގާފައެވެ.
