ރައީސް ޔާމީނަށް ދަށު ކޯޓުން ހުކުމްކުރި ބެންޗުގައި ހިމެނޭ ފަނޑިޔާރުންގެ ތެރެއިން އޯޑިއޯތަކެއް ލީކުވެގެން އުޅޭ ފަނޑިޔާރުންނަށް ޖުޑިޝަލް ސާވިސް ކޮމިޝަނުން ސިޔާސީ ނުފޫޒާއި، ބިރު ދައްކަމުންދާކަމަށް އިދިކޮޅު ޕްރޮގްރެސިވް ކޯލިޝަނުން ތުހުމަތު ކޮށްފިއެވެ.
އިދިކޮޅު ޕްރޮގްރެސިވް ކޯލިޝަނުން ނެރުނު ބަޔާނެއްގައި ބުނެފައިވަނީ ރައީސް ޢަބްދުﷲ ޔާމީން ޢަބްދުލްޤައްޔޫމަށް ކްރިމިނަލް ކޯޓުން ކޮށްފައިވާ ޙުކުމަކީ ސަރުކާރުގެ ފަރާތުން ފަނޑިޔާރުންނަށް ވަރަށް ބޮޑަށް ސިޔާސީ ނުފޫޒު ފޯރުވާ ބިރު ދައްކާ ރަހީނުކޮށްގެން ކޮށްފައިވާ ޙުކުމެއް ކަމަށް ފަނޑިޔާރުން އެއްބަސްވާ އޯޑިއޯ އާއި ގުޅިގެން ޖުޑީޝަލް ސަރވިސް ކޮމިޝަނުން ކަން ކުރަމުން ގެންދާ ގޮތާމެދު ކަންބޮޑުވާކަމަށެވެ. އަދި އެ އޯޑިއޯ ތަކަކީ އެއްވެސް އަސްލެއް ނެތް އޯޑިއޯ ތަކެއް ކަމަށް ދެއްކުމަށްޓަކައި އެ ފަނޑިޔާރުންނަށް އިތުރަށް ބިރު ދައްކާ ސިޔާސީ ނުފޫޒު ފޯރުވުމަށް ކުރަމުން ގެންދާ މަސައްކަތް އެންމެ ހަރުކަށި އިބާރާތުން ކުށްވެރި ކުރާކަމަށެވެ.
ލީކުވެފައިވާ އޯޑިއޯ ތަކުން ރައީސް ޢަބްދުﷲ ޔާމީން ޢަބްދުލްޤައްޔުމަށް ކްރިމިނަލް ކޯޓުން ޙުކުމް ކުރި ބެންޗުގައި ހިމެނޭ ފަނޑިޔާރުން ކޮމްޕްރޮމައިޒްވެ އެ ފަނޑިޔާރުންގެ ނަޒާހަތްތެރިކަމާ މެދު ސުވާލު އުފެދޭ ކަންކަން ހިނގާފައިވާ ކަން ވަނީ ފާހަގަވެފައިކަމަށެވެ. ހަމައެއާއެކު އެމަނިކުފާނާއި ދެކޮޅަށް ހެކި ބަސް ދީފައިވާ ބޭފުޅަކުވެސް، އެމަނިކުފާނާއި ދެކޮޅަށް ހެކިބަސް ދީފައިވަނީ ސިޔާސީ ނުފޫޒު ފޯރުވައިގެން ކަމަށް ބުނާ އޯޑިއޯއެއްވެސް ވަނީ ލީކުވެފައިކަމަށެވެ.
ކަން މިހެން އޮތުމާއެކު، ފަނޑިޔާރުންގެ އޯޑިއޯގެ މައްސަލަ ބަލަނީ ކަމަށް ބުނެ، އެ ފަނޑިޔާރުންނަށް އިތުރަށް ބިރު ދައްކާ ރަހީނުކޮށް، ސިޔާސީ ނުފޫޒު ފޯރުވުމަށް ޖުޑީޝަލް ސަރވިސް ކޮމިޝަންގެ މެންބަރުން ހިންގަމުން ގެންދާ ހަޑިމުޑުދާރު ޖަރީމާ މިހާރުން މިހާރަށް ހުއްޓާލާ، އެ ފަނޑިޔާރުންގެ މައްސަލަ ތަޙުޤީޤު ކުރާނަމަ މިނިވަންކަމާއި އިންސާފުވެރިކަމާއެކު ހާމަކަން ބޮޑު ގޮތެއްގައި އެ ތަޙްޤީޤު ހިންގުމަށް އެކޯލިޝަނުން ވަނީ ގޮވާލާފައެވެ.
އަދި އެ ޙުކުމް ކޮށްފައިވާ ފަނޑިޔާރުން އެމަނިކުފާނަށް ޙުކުމްކޮށްފައިވަނީ، އެ ފަނޑިޔާރުންގެ ނަޒާހަތްތެރިކަން ގެއްލިގެން ތިބެކަމަށް އަމިއްލަ އިޢުތިރާފުން އެއްބަސްވެފައިވާތީ، ރައީސް ޢަބްދުﷲ ޔާމީން ޢަބްދުލްޤައްޔޫމަށް ކްރިމިނަލް ކޯޓުން ކޮށްފައިވާ ޙުކުމް މުރާޖަޢާކޮށް، މިހާރުން މިހާރަށް ބާޠިލުކޮށް އެމަނިކުފާނު މިނިވަން ކުރުމަށްވެސް ވަނީ ގޮވާލާފައެވެ.
