ޕްރޮގްރެސިވް ކޯލިޝަންގެ ހާއްސަ ޖަލްސާއެއް އަންނަ ހުކުރު ދުވަހު އޮންނާނެ ކަމަށް އެކޯލިޝަނުން އިއުލާނުކޮށްފިއެވެ.
ޕީޕީއެމް އޮފީހުގައި މިއަދު ނޫސްވެރިންގެ ބައްދަލުވުމުގައި މާލެ ސިޓީ ކައުންސިލްގެ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ވިދާޅުވީ ޖަލްސާއަށް "އައްޑަނަ" ނަން ދިނީ ގައުމުގެ މިނިވަންކަމާއި އިސްތިގުލާލު ގެއްލި، އިސްލާމްދީނަށް ފުރައްސާރަކޮށް، އަދުލު އިންސާފުގެ ތެރެއަށް އަތްބާނާ ފަދަ ކަންތައްތަކާއި ގުޅިގެން ރައްޔިތުންގެ ހުރި ކަންބޮޑުވުންތަކާއި ގުޅުވައިގެން ކަމަށެވެ.
ޖަލްސާގެ ބޭނުމަކީ މި ކަންބޮޑުވުންތައް ސަރުކާރަށް ތިލަކޮށްދިނުން ކަމަށް ވެސް ސުޖާއު ވިދާޅުވި އެވެ. ޖަލްސާގައި ހާއްސަ ކަންތަކެއް ހިނގާނެ ކަމަށް ވެސް ސުޖާއު ވިދާޅުވިއެވެ. ނަމަވެސް އެކަންތައްތަކުގެ ތަފްސީލު ދެއްވާފައެއް ނުވެއެވެ.
ސުޖާއު ވިދާޅުވީ ޖަލްސާ ބޭއްވުމަށް ކާނިވާ ސަރަހައްދު ހޯދުމަށް މިހާރު އެދިފައިވާނެ ކަމަށާއި ކޮވިޑާއި ގުޅިގެން މިހާރު ޖަލްސާތައް ބޭއްވުމަށް ހުރަހެއް ނެތް ކަމަށެވެ. ރާއްޖޭގެ ހުރިހާ ރައްޔިތުންނަށް ޖަލްސާގައި ބައިވެރިވުމަށް ފުރުސަތު އޮތް ކަމަށާއި ނަމަވެސް ކޯލިޝަނަށް ތާއީދު ކުރާ ރަށްރަށުގެ މީހުން މާލެ އަންނަން ބާރު ނާޅާނެ ކަމަށް ވިދާޅުވި އެވެ.
ޖަލްސާގެ މައިގަނޑު މަގްސަދަކީ ރައްޔިތުންނަށް ގުޅުންހުރި މައްސަލަތަކާއި ކަންބޮޑުވުންތައް ސަރުކާރާ ހަމަޔަށް ތިލަކުުރުން ކަމަށް ޝުޖާއު ވިދާޅުވިއެވެ. ކާނިވާ ސަރަހައްދުގައި ބާއްވާ ޖަލްސާ ފަށާނީ ހުކުރު ދުވަހުގެރޭ 20:15 ގައެވެ.
