އަފްއާނިސްތާންގެ އާއިލާއެއް އެގައުމު ދޫކޮށް، އެމެރިކާގެ އަސްކަރީ މަތިންދާ ބޯޓުގައި ދަތުރު ކުރަމުން ދަނިކޮށް، ދުނިޔެއަށް އުފަންވި އަންހެން ކުއްޖާއަށް، ދަތުރު ކުރަމުންދިޔަ އެއަރކްރާފްޓުގެ ނަމުގެ ކޯޑު ބޭނުން ކޮށްގެން ނަން ދީފައިވާކަން އެމެރިކާގެ އަސްކަރިއްޔާއިން ހާމަ ކޮށްފިއެވެ.
މިގޮތުން މި އަންހެން ކުއްޖާއަށް ދީފައިވާ ނަމަކީ، "ރީޗް" “Reach”މި ނަމެވެ.
އެމެރިކާގެ އަސްކަރީ މަތިންދާ ބޯޓުގައި މިހަފްތާގެ ހޮނިހިރު ދުވަހު، ޖަރުމަނު ވިލާތުގެ އަސްކަރީ ބޭސްއަކަށް ދަތުރު ކުރަމުން ދަނިކޮށް، އަންހެންމީހާ ވިހާފައިވަނީ ބޯޓު މަތީގައި، އެހެންނަމަވެސް، ބޯޓު ޖަރުމަނުވިލާތުގެ އަސްކަރީ ބޭސްއަށް ޖެއްސިތަނާ ކަހަލަ ގޮތަކަށެވެ.
މިގޮތުން ބޯޓު އަސްކަރީ ބޭސްއަށް ތިރި ކުރުމާއެކު، އަސްކަރީ ސިއްޙީ އެހީތެރިންގެ އެހީތެރިކަމާއެކު، އަންހެން މީހާ ވިހާފައިވަނީ، މި އަސްކަރީ މަތިންދާ ބޯޓުގެ ކާގޯ އޭރިއާގެ ތެރޭގައެވެ. އަދި އެއައްފަހު އަންހެން މީހާއާއި، އަންހެން ކުއްޖާވެސް ވަނީ ކައިރި ހޮސްޕިޓަލަކަށް ގެންދެވިފައެވެ.
އެމެރިކާގެ އަސްކަރިއްޔާގައި ބޭނުންކުރާ ހުރިހާ މަތިންދާ ބޯޓުތަކަކީވެސް، އެހެން އެއަރ ކްރާފްތަކާއި އަދި ކޮންޓޯލް ޓަވަރުތަކާއި މުޢާމަލާތު ކުރުމަށްޓަކާ ވަކި ކޯޑެއް ދެވިފައިވާ ބޯޓުތަކެވެ. މިގޮތުން އަސްކަރިއްޔާގެ މުދާ އުފުލާ ބޯޓު ތަކުގެތެރެއިން C-17 މަރުކާގެ ބޯޓުތަކަށް ދީފައިވާ ކޯޑު ނަމަކީ "ރީޗް" “Reach”އެވެ. އަދި މި ކޯޑު ނަމުގެ ފަހަތައް ވަކި ނަންބަރެއް އިތުރުކުރެވިފައި ވެއެވެ.
މިގޮތުން، ބޯޓުމަތީގައި ވިހެ އަންހެން މީހާގެ އާއިލާ ސަލާމަތްތެރިކަމާ އެކީ، ޖަރުމަނުވިލާތުގެ އަސްކަރީ ބޭސްއަށް ގެންދިޔަ އަސްކަރިއްޔާގެ ކާގޯ އުފުލާ މަތިންދާ ބޯޑަށް ދީފައިވާ ކޯޑު ނަމަކީ، Reach 828 އެވެ. އަދި އެމެރިކާގެ ޔޫރަޕިއަން ކޮމާންޑުގެ އިސްވެރިޔާ ޖެނެރަލް ޓޮޑް ވޯލްޓަރސް ވިދާޅުވެފައިވާ ގޮތުގައި، އަލަށް ވިހެއި މި ދަރިފުޅުގެ ދެމަފިރިން ދަރިފުޅަށް ދޭން ބޭނުންވި ނަމަކީ މިނަން ކަމުގައެވެ.
ވޯލްޓާސް ވިދާޅުވި ގޮތުގައި ރީޗްއާއި އައިލާ އަދި އަފްއާނިސްތާނުގެ އެހެން ރެފިއުޖީންވެސް މިހާރު ދަތުރު ކުރަމުންދަނީ އެމެރިކާއަށް ކަމުގައެވެ.
އޮގްސްޓު މަހުގެ 20 ވަނަ ދުވަހުގެ ފަހުން ޔޫރަޕްގައި ހުންނެ އެމެރިކާ ބޭސްތަ މެދުވެރިކޮށް ދަތުރު ކޮށްފައިވާ އަފައާނިސްތާނުގެ 700 ރެފިއުޖީންގެ ތެރެއިން ސިއްޙީ އެހީތެރިކަން ބޭނުންވެފައިވަނީ އެންމެ 100 އެއްހާ މީހުންނަށެވެ.
އަދި މި ސަތޭކަ މީހުންގެ ތެރެއިން އެޑްމިޓް ކޮށްގެން ފަރުވާ ދޭން ޖެހިފައިވަނީ 25 މީހުންނަށެވެ. ވޯލްޓާރސް ވިދާޅުވި ގޮތުގައި، ޖަރުމަނުވިލާތުގެ ރަމްސްޓެއިންއަށް ދަތުރު ކުރިފަހުން އިތުރު ދެމީހަކު ވިހާފައިވާ ކަމުގައެވެ.
