އެމެރިކާގެ ޖާސީސީ އިދާރާ ސީއައިއޭގެ ޑިރެކްޓަރ ވިލިއަމް ބާރންސް އާއި ތާލިބާންގެ ލީޑަރ އަބުދުލް ޢަނީ ބަރަދަރު އަފްއަނިސްތާންގެ ވެރިރަށް ކާބުލްގައި ސިއްރިޔާތުގައި ބައްދަލު ކޮށްފައިވާކަމަށް، ނަން ހާމަކުރަން ބޭނުންނުވާ އެމެރިކާގެ އޮފިޝަލަކާއި ހަވާލާދީ ވޮޝިންގޓަން ޕޯސްޓުންނާއި އެސޯޝިއޭޓް ޕްރެސްއިން ރިޕޯޓު ކޮށްފިއެވެ.
ސީއައިއޭގެ ވެރިޔާއާއި ތާލިބާންގެ ލީޑަރު ސިއްރިޔާތުގައި ބައްދަލު ބައްދަލު ކޮށްފައިވަނީ، ކާބުލްގެ އެއަރޕޯޓުގައި، އެމެރިކާއިން އެމެރިކާއާއި އަދި އަފްއާނިސްތާނުގެ އެތައްހާސް ރައްޔިތުންނެއް ގައުމުން ބޭރަށް ގެންދިއުމަށްޓަކާ އެމެރިކާ ސިފައިން ހިންގަމުންދާ ޚާއްސަ އޮޕްރޭޝަން މެދުނުކެޑި ކުރިޔަށް ދަމުން ދަނިކޮށެވެ.
އެމެރިކާގެ ޕެންޓަގަންއިން މައުލޫމާތު ދީފައިވާ ގޮތުގައި، ފާއިތުވި 24 ގަޑިއިރުގެ ތެރޭގައި، އަފްއާނިސްތާނުގެ 16،000 ރައްޔިތުންވަނީ، އެގައުމުން ބޭރަށް ގެންދެވިަފއެވެ. އެމެރިކާއިން މަސައްކަތް ކުރަމުންދަނީ، ތާލިބާނުން ކަޑައަޅާފައި "ރަތް ރޮނގު"، އޮގަސްޓުމަހުގެ 31ގެ ކުރިން، ގައުމުން ބޭރަށް ގެންދަންޖެހޭ ހުރިހާ މީހުން އެގައުމުން ބޭރަށް ގެންގޮސް ނިންމުމަށެވެ.
އެހެންނަމަވެސް ދުނިޔޭގެ އެތައް ގައުމަކުން ގެންދަނީ، އެމެރިކާގެ ރައީސަށް، އެގައުމުން ކަޑައަޅާފައިވާ މި ތާރީޚު އިތުރަށް ދިގު ދަންމާލުމަށް ވަރަށް ބޮޑަށް ޕްރެޝަރ ކުރަމުންނެވެ. އަދި ބެލެވޭގޮތުގައި، ކުރިޔަށް އޮތް G7 ވާޗުއަލް ސަމިޓުގައި އިނގިރޭސިވިލާތުން، މި ތާރީޚު އިތުރަށް ދިގު ދަންމާލުމަށް އެމެރިކާގެ ކިބައިން އެދޭނެއެވެ.
އެމެރިކާގެ ދިފާޢީ ވުޒާރާ، ޕެންޓަގަންއިން ބުނެފައިވަނީ، އެގައުމުން އަދިވެސް ހުރިހާ ތައްޔާރީތަކެއްވެސް ވަމުން ދަނީ، އަފްއާނިސްތާނުގައި ތިބި އެމެރިކާގެ ހުރިހާ ސިފައިންވެސް އޮގަސްޓުމަހުގެ 31ވަނަ ދުވަހުގެ ކުރިން އެގައުމުން ބާލާ މުޅިން އެކީ ނިންމުމަށް ކަމުގައެވެ.
ތާލިބާން ޖަމާއަތުގެ ބާރުގެދަށަށް އަފްއާނިސްތާން ގޮސްފައިވާއިރު، އަފްއާނިސްތާނުގައި ތިބި އެމެރިކާގެ ރައްޔިތުންނާއި އަދި އެމެރިކާއިން ދޫކޮށްފައިވާ ޚާއްސަ ވިސާގެ ދަށުން، އަފްއާނިސްތާނުން ބޭރަށް ގެންދިއުމަށް އެމެރިކާއިން ވައުދުވެފައިވާ އެތައް ހާސް އަފްއާނިސްތާން ރައްޔިތުން އެގައުމުން ބޭރަށް ގެންދިއުމަށް، ކާބުލްގެ އެއަރޕޯޓުގައި އެތައް ހާސް އެމެރިކާ ސިފައިންދަނީ ހަރަކާތްތެރި ވަމުންނެވެ.
