އެމެރިކާއިން އަފްއާނިސްތާނަށް، މީގެ 20 އަހަރު ކުރިން ދިޔައީ އެގައުމު އާރާސްތުކުރަން ނޫންކަމަށާއި، އެމެރިކާގެ ހަމައެކަނި ބޭނުމަކީ އެގައުމަށް ދެވަނަ ޓެރަރިސްޓު ހަމަލާއެއް އަމާޒުވެގެން ދިޔަ ނުދިނުން ކަމަށް ވިދާޅުވެ، އެެމެރިކާ ސިފައިން އަފްއާނިސްތާނުން ބޭލުމަށް އޭނާ ނިންމެވި ނިންމެވުން އެމެރިކާގެ ރައީސް ޖޯ ބައިޑްން ދިފާޢު ކުރައްވައިފިއެވެ.

އެމެރިކާއިން 20 އަހަރުވަންދެން ފޯރުކޮށްދެމުން އައި އަސްކަރީ އެހީތެރިކަން ހުއްޓުމަކަށް އައުމާއެކު، ތާލިބާނުންވަނީ، އެމެރިކާއިން ތާޢީދުކޮށްގެން އަފްއާނިސްތާނުގައި ވެރިކަން ކުރަމުން އައި ސަރުކާރު، މިހަފްތާގެ އާދީއްތަދުވަހު ވައްޓާލާފައެވެ.

އަދި ކުރު މުއްދަތެއްގެ ތެރޭގައި، އަފްއާނިސްތާނުގައި ތިބި، އެމެރިކާގެ ސިފައިން އެގައުމުން ބޭލުމަށް ރައީސް ޖޯބައިޑްން ނިންމެވި ނިންމެވުމަށް އެތައް ބައެއްގެ ފާޑުކިއުން އަމާޒުވެފައިވާއިރު، އޭނާގެ މި ނިންމެވުމާ ގުޅޭގޮތުން އެމެރިކާގެ ރައްޔިތުންނާ މުޚާތަބްކޮށް ވާހަކަ ދައްކަވަމުން ބައިޑްން ވިދާޅުވެފައިވަނީ، ގައުމެއްގައި ހިގަމުންދާ އަހުލީ ހަގުރާމައެއްގެ މެދުތެރޭގައި، ފުރާނަ ގެއްލިގެންދާން އެމެރިކާ ސިފައިން ދޫކޮށްލުމަކީ އޭނާ ކުރާނެ ކަމެއް ނޫންކަމުގައެވެ.

ތާލިބާނުން، އަފްއާނިސްތާނުގައި އޮތް އެމެރިކާއިން ތާޢީދު ކުރަމުންއައި ސަރުކާރު ވައްޓާލާ، އެގައުމު އެމީހުންގެ ބާރުގެ ދަށަށް އައުމާގުޅިގެން، ބައިޑްން އާންމުންނާ މުޚާތަބުކޮށް ވާހަކަ ދައްކަވާފައި ނުވާތީ އެތައް ޕްރެޝަންއެއް ކުރިމަތި ވެވަޑައިގެންފައި ވަނިކޮށް، ޓީވީ މެދުވެރިކޮށް ވާހަކަ ދައްކަވަމުން ބައިޑްން ވިދާޅުވެފައިވަނީ، އެމެރިކާ ސިފައި އަފްއާނިސްތާނުން ފޭބުމާއެކު، ތާލިބާނުން ކުރިއެރުންތަކެއް ހޯދާނެކަމަށް އެމެރިކާ ސަރުކާރުން ގަބޫލުކުރި ކަމުގައިވި ނަމަވެސް، ތާލިބާނުން އަފްއާނިސްތާނުގެ ސަރުކާރު ބަދަލު ކޮށްފައިވަނީ، ހީކުރިވަރަށްވުރެ އަވަހަށް ކަމަށެވެ.

"އަހަރެން އަދިވެސް މިހުރީ އަހަރެން ނިންމި ނިންމުމުގެ މަތީގައި،" ބައިޑް ވިދާޅުވިއެވެ.

"އަފްއާނިސްތާނުގެ އަސްކަރިއްޔާއިން ކުރިޔަށް ގެންދަން ބޭނުން ނުވާ ހަގުރާމައެއްގެ މެދުގައި ތިބެގެން، އެމެރެރިކާގެ އަސްކަރިއްޔާއިން ހަގުރާމަކޮށް، އެމެރިކާ ސިފައިން އެ ހަގުރާމާގައި މަރުވެދާން އަހަރެން ދޫކޮށެއް ނުލާނަން."

ބައިޑްން ވިދާޅުވި ގޮތުގައި، އެމެރިކާ ސިފައިން އެގައުމުން ފޭބުމާއެކު، ތާލިބާނުންގެ ބާރުގެ ދަށަށް އަފްއާނިސްތާން ގޮސްފައިވަނީ، އެގައުމުގެ ސިފައިންގެ ހިތްވަރެއް ނެތުމާއި، އަދި އެގައުމުގެ ވެރިން ގައުމު ދޫކޮށް ފިއްލަވާ ވަޑައިގަތުމާއި ގުޅިގެންނެވެ.

މިހަފްތާގެ އާދިއއްތަ ދުވަހު، ތާލިބާން ހަގުރާމަވެރިން، އަފްއާނިސްތާންގެ ވެރިރަށް ކާބުލް ވަށާލުމާއެކު، އެގައުމުގެ އޭރުގެ ރައީސް އަޝްރަފް ޢަނީވަނީ، ގައުމު ދޫކުރައްވާ އަވައްޓެރި ތަޖިކިސްތާނަށް ވަޑައިގެންފައެވެ. އަދި އޭނާ ފަހުން ވިދާޅުވެފައިވަނީ، ގައުމު ދޫކުރައްވާ ވަޑައިގެންނެވީ، ވެރިރަށް ކާބުލް ބޮޑު ލޭއޮހޮރުވުމަކުން ސަލާމަތް ކުރުމުގެ ގޮތުން ކަމުގައެވެ.