ތިންވަނަ ޑިވިޝަން: ސެމީގެ ފަހު ޖާގަ ބިސް ބުރު ހޯދައިފި

މިހާރު ކުރިޔަށްދާ ތިންވަނަ ޑިވިޝަން ފުޓްބޯޅަ މުބާރާތުގެ ސެމީ ފައިނަލުގެ ފަހު ޖާގަ ބިސް ބުރު ހޯދައިފިއެވެ.

މުބާރާތުގެ ކުއާޓާ ފައިނަލުގެ ފަހު މެޗުގައި ރޭ ބިސް ބުރު ނުކުތީ ކްލަބް ޓީނޭޖް އާއި ދެކޮޅަށެވެ. މި މެޗުގެ ފުރިހަމަ ވަގުތު ހަމަވިއިރު 1-1 އިން ނަތީޖާ އެއްވަރުވެފައި އޮތުމުގެ ސަބަބުން، ނަތީޖާ ނެރުނީ ޕެނަލްޓީ ޖަހައިގެންނެވެ. އެގޮތުން ޕެނަލްޓީ ޖަހައިގެން ބިސް ބުރު މޮޅުވީ 1-3 ގެ ނަތީޖާ އަކުންނެވެ.

މުބާރާތުގެ ކުއާޓާ ފައިނަލުގެ ތިންވަނަ މެޗުގައި އިއްޔެ ހަވީރު ބައްދަލުކުރީ، އެލްޓީ ސްޕޯޓްސް އާއި ލޮރެންޒޯ ސްޕޯޓްސްއެވެ. މި މެޗުގެ ފުރިހަމަ ވަގުތު ހަމަވިއިރު އެއްވެސް ޓީމަކަށް ލަނޑެއް ޖެހިފައި ނުވާތީ ނަތީޖާ ނެރުނީ ޕެނަލްޓީ ޖަހައިގެންނެވެ. އެގޮތުން ޕެނަލްޓީގައި އެލްޓީ ސްޕޯޓްސް ކުލަބުން ލޮރެންޒޯގެ މައްޗަށް ކުރިހޯދީ 3-2 އިންނެވެ.

މި ނަތީޖާއާއެކު މުބާރާތުގެ ސެމީ ފައިނަލުގެ ޖާގަ ހޯދި ޓީމުތަކަކީ، ބުރު ސްޕޯޓްސް ކްލަބް، ކްލަބް 010 އަދި ބިސް ބުރުގެ އިތުރުން އެލްޓީ ސްޕޯޓްސްއެވެ.