ރާއްޖޭގައި ކޯވިޑްގެ ހާލަތު ނިއު ނޯމަލް ހާލަތަކަށް ގެނެވިފައިވީނަމަވެސް، ދުނިޔޭގެ އެކި ޤައުމުތަކުން ފެންނަމުންދާ ކޯވިޑްގެ އާ ވޭރިއަންޓުތައް ރާއްޖެއަށް އައިސްފާނެކަމަށް ބަލައި ސަމާލުވާންޖެހޭ ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ދިރާސީ އާއަހަރުގެ ކިޔެވުން ފެށުމާއި ގުޅިގެން މިއަދު ހުޅުމާލޭ ރެހެންދި ސްކޫލުގައި ބޭއްވި ޚާއްސަ އެސެމްބްލީގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވީ ކޯވިޑާއި ދެކޮޅަށް ރާއްޖެއިން ކުރި މަސައްކަތުން ބޮޑު ކާމިޔާބީތަކެއް ލިބިފައިވީނަމަވެސް، ކޯވިޑްގެ ނުރައްކާ އަދިވެސް ކުޑަނުވާކަމަށެވެ. ދުނިޔޭގެ ގިނަ ޤައުމުތަކެއް މިވަގުތުވެސް ދަތި ހާލުގައި އޮތްއިރު، ބަލީގެ އާ ވޭރިއަންޓުތައް ފެންނަމުންދާކަމަށެވެ. މިކަންކަމަކީ ރާއްޖެއިން ނުހަނު ބޮޑަށް ސަމާލުވެ ތިބެންޖެހޭ ކަމެއްކަމަށް ރައީސުލްޖުމްހޫރިއްޔާ ވިދާޅުވިއެވެ.
މިހާރުވެސް ބައެއް ޤައުމުތަކުގައި، ކޯވިޑް ޖައްސާ ވައިރަހުގެ ތަފާތު ބާވަތްތައް ފެތުރެމުން އެބަދޭ. އެހެންކަމުން، އައު ޢާންމު ޙާލަތަކަށް އަޅުގަނޑުމެންނަށް އާދެވިފައިވިޔަސް، ކޯވިޑް-19ގެ ނުރައްކާތެރިކަން މުޅިން ފިލައިގެންދިޔައީ ކަމަށް ޤަބޫލުކޮށްގެން އަދި ނުވާނެ. ކޯވިޑް ޖައްސާ ވައިރަހުގެ ނުރައްކާތެރި ބާވަތްތައް އަދިވެސް ރާއްޖެއަށް އަތުވެދާނެ ކަމަށް، އަޅުގަނޑުމެން އަބަދުވެސް ސަމާލުވާންޖެހޭނެ.
– ރައީސް ޞާލިހު ވިދާޅުވިއެވެ.
އެމަނިކުފާނު ވިދާޅުވީ ކޯވިޑުން ރައްކާތެރިވުމަށް ދުނިޔޭގެ ގިނަ ގައުމުތަކަށް ވެކްސިންގެ އެންމެ ޑޯޒްއެއްވެސް ނުޖެހި ތިބި މީހުން ގިނަކަމަށެވެ. ނަމަވެސް ﷲގެ ތަނަވަސް ރަހުމަތާއިއެކު ރާއްޖޭގައި ދިރިއުޅޭ ހުރިހާ ރައްޔިތުންނަށް ބޭނުންވާވަރަށް މިހާރު ކޯވިޑް ވެކްސިން ލިބިފައިވާކަމީ ރާއްޖެއަށް ލިބިފައިވާ ވަރަށްބޮޑު ނަސީބެއްކަމަށެވެ. މިހާލަތުގައި ރާއްޖޭގައި ދިރިއުޅޭ ހުރިހާ ރައްޔިތުންވެސް ވެކްސިން ޖެހުމަށް އަވަސްވެ، ރައްކާތެރިކަމުގެ ފިޔަވަޅު އެޅުމަށް ރައީސްވަނީ އިލްތިމާސް ކުރައްވާފައެވެ.
އެހެންކަމުން، އަޅުގަނޑުމެން މިއަދު ގަދައަޅައި މަސައްކަތް ކުރަންވީ، ކޯވިޑް ކޮންޓްރޯލް ކުރުމުގައި، މި ލިބުނު ކުރިއެރުން އެގޮތުގައި ދަމަހައްޓަން. އަޅުގަނޑުމެންގެ ސްކޫލްތަކުގެ ކިޔެވުން ކުރިއަށްދާއިރުވެސް، ކޯވިޑުން ރައްކާތެރިވުމުގެ ފިޔަވަޅުތަކަށް، ޓީޗަރުންނާއި ދަރިވަރުންނާއި ބެލެނިވެރިންވެސް ފުރިހަމައަށް ޢަމަލުކުރެއްވުން ވަރަށް މުހިންމު. ސަރުކާރު އޮފީސްތަކާއި އަމިއްލަ އޮފީސްތައްވެސް، ޢާންމު އުޞޫލުން ހުޅުވައިގެން ޚިދުމަތްދޭއިރު، އޮފީސްތަކުގެ މުވައްޒަފުންވެސް، އަދި ޚިދުމަތް ހޯއްދަވާ ބޭފުޅުންވެސް، ކޯވިޑުން ރައްކާތެރިވުމުގެ ފިޔަވަޅުތަކަށް ފުރިހަމައަށް ޢަމަލުކުރެއްވުމަކީ ވަރަށް މުހިންމު ކަމެއް.
– ރައީސް ވިދާޅުވިއެވެ.
މިހާލަތުގައިވެސް ސަރުކާރުގެ އޮފީސްތަކާއި، އާންމު ޚިދުމަތްދޭ ތަންތަނުން ޚިދުމަތް ދެމުންދިޔަ ކަމުގައިވީނަމަވެސް ކޯވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކާއި، ގައިޑްލައިންތަކާއި އެއްގޮތަކަށް އަމަލުތައް ބެހެއްޓުމަކީ ވަރަށް މުހިންމު ކަމެއްކަމަށް ރައީސް ވިދާޅުވިއެވެ. މިލިބުނު ފުރުސަތުގައި އެންމެންގެވެސް އަޒުމަކަށްވާންވީ މިގޮތުގައި ކުރިއަށް ދިއުމަށްކަމަށް ރައީސް ވިދާޅުވިއެވެ.
ރައީސް ވަނީ ދިރާސީ އާއަހަރުގެ ކިޔެވުން ފެށުމުން ތައުލީމީ ދާއިރާއިންވެސް ކޯވިޑުން ރައްކާތެރިވުމަށް ޚާއްސަ އަހައްމިއްޔަތު ކަމެއް ދެއްވުމަށް އެދިވަޑައިގެންފައެވެ. އެގޮތުން ސްކޫލުތަކުގައި ބަލިމަޑުކަމުން ސަމާލަތްވުމަށް އަޅަންޖެހޭ އެންމެހައި ފިޔަވަޅުތައް އަޅައި، ރައްކާތެރި މާހައުލެއްގައި ކިޔަވައި ދިނުމަށް އެމަނިކުފާނު ވަނީ އިލްތިމާސް ކުރައްވާފައެވެ.
އައު ޢާންމު ޙާލަތާއެކު އަޅުގަނޑުމެންނަށް ކުރިއަށްދެވޭނީ، ސަރުކާރުން މިހާރު ފަށާފައިވާ ކޯވިޑް ވެކްސިން ޖެހުމުގެ ޕްރޮގްރާމަށް ހުރިހާ ބޭފުޅުންވެސް އެއްބާރުލުން ދެއްވައި، ވެކްސިންގެ ދެ ޑޯޒް ފުރިހަމަކުރައްވައިގެން. އިރާދަކުރެއްވިއްޔާ، މިއަދު މި ފެށުނު ދިރާސީ އަހަރާއެކު، ޓީޗަރުންނަށް ވެކްސިން ޖެހުމުގެ ޕްރޮގްރާމަށް އިތުރު ހަލުވިކަމެއް ލިބިގެންދާނެ ކަމަށް އަޅުގަނޑު އުންމީދު ކުރަން.
– ރައީސް ވިދާޅުވިއެވެ.
ރައީސުލްޖުމްހޫރިއްޔާ ވަނީ އައު ޢާންމު ޙާލަތާއެކު ކުރިއަށް ދިޔުމުގައި ސަރުކާރުން މިހާރު ފަށާފައިވާ ކޮވިޑް ވެކްސިން ޖެހުމުގެ ޕްރޮގްރާމަށް ހުރިހާ އެންމެންގެ އެއްބާރުލުން ބޭނުންވާކަމުގައި ވިދާޅުވެފައެވެ. އަދި، އުމުރުން 12 އަހަރާއި 17 އަހަރާ ދެމެދުގެ ހުރިހާ ކުދިންނަށް، ކޮވިޑް ވެކްސިން ޖެހުމުގެ ޚާއްޞަ ޕްރޮގްރާމެއް ވަރަށް އަވަހަށް ފެށުމަށް ތައްޔާރުވަމުން އަންނަކަމަށާއި، ސަރުކާރުގެ މިހާރުގެ އަމާޒަކީ މި މަސް ނިމުމުގެ ކުރިން، ހުރިހާ ކުދިންނަށްވެސް ކޮވިޑް ވެކްސިންގެ ފުރަތަމަ ޑޯޒް ޖަހައި ނިންމުން ކަމުގައި އެމަނިކުފާނު ވިދާޅުވިއެވެ.
