ފިނޭންސް މިނިސްޓަރ އިބްރާހިމް އަމީރު ޔޫއޭއީއަށް ކުރައްވަމުން ގެންދަވާ ދަތުރުފުޅަކީ ތަންތަން ރަހުނު ކުރަން ކުރާ ދަތުރެއް ނޫންކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ ދައުލަތުގެ މާލީ ހާލަތު ދަށްވެ، ބޭރުގެ ފަރާތްތަކުން ލޯނު ލިބޭނީ، އަމިއްލަ ގޯތި ގެދޮރު ރަނުހު ކޮށްފައި ނޫންކަމަށާއި، ލޯނު ލިބޭނީ ދަރަނި އަދާކުރުމުގައި ދައުލަތުގެ ގާބިލްކަން ހުރި މިންވަރެއްގެ މައްޗަށް ކަމަށް ވިދާޅުވެ ކުރެއްވި ޓްވީޓާއި ގުޅިގެން ޚަބަރު އޮންލައިނުން ގެނެސްދިން ހަބަރަކަށް ރައްދު ދެއްވަމުންނެވެ. ރައީސް ނަޝީދު ވިދާޅުވީ އެމަނިކުފާނު ސާފުކޮށް ދެއްވާފައިވަނީ ސޮވެރިން ޑެބިޓް އުފައްދާނެ ގޮތް ކަމަށެވެ. އެއްވެސް ހާލެއްގައި މިނިސްޓަރ އަމީރު ވަޑައިގެންނެވީ ތަންތަން ރަހުނު ކުރާކަމަށް ވިދާޅު ނުވާކަމަށެވެ.

އަޅުގަނޑު ދެންނެވީ އަމީރު އެ ވަޑައިގެންނެވީ ތަންތަން ރަހުނު ކުރަން ކުރާކަށް ނޫންކަމަށް. އަޅުގަނޑު ކިޔާދިނީ ސޮވެރިން ޑެބިޓް އުފައްދާނެ ގޮތް.

– ރައީސް ނަޝީދު ވިދާޅުވިއެވެ.

ބޭރުގެ ބައެއް އިންވެސްޓަރުންނާ ބައްދަލު ކުރުމަށް ފިނޭންސް މިނިސްޓަރު އަމީރުގެ އިތުރުން އެ މިނިސްޓްރީގެ ވަފުދެއް  ދުބާއީ އަށް ކުރައްވާ ދަތުރާއި ގުޅިގެން ބައެއް މީޑިއާތަކުގައި ހުރި ބައެއް ވާހަކަތަކަށް ރައްދު ދެއްވަމުން، ރައީސް ނަޝީދުގެ އެލެކްސް އެކައުންޓުން ކުރެއްވި ޓްވީޓެއްގައި ވިދާޅުވީ ދައުލަތަށް ލޯނު ލިބިގެން ދާނީ ގޯތި ގެދޮރު ރަހުނު ކޮށްފައި ނޫން ކަމަށެވެ.

ދައުލަތަށް ދަރަންޏަށް ފައިސާ ހޯދޭނީ އެދައުލަތެއްގެ ކެރިފޯރުންތެރިކަން ހުރި މިންވަރަކުން ކަމަށް ވިދާޅުވެ، ލޯނު ލިބޭނީ އެ ދައުލަތަކަށް އެފައިސާ އަބުރާ ދެއްކޭނެ ގާބިލް ހުރި މިންގަޑަކަށް ބަލާފައިކަމަށް ވެސް ރައީސް ނަޝީދު ވަނީ ވިދާޅުވެފައެވެ.

ރައީސް ނަޝީދަކީ ކުރީގެ ރައީސް ޔާމީންގެ ވެރިކަމުގައިވެސް ޗައިނާއިން ލޯނު ނެގުމުން އެކަމަށް އެންމެ ބޮޑަށް ފާދުވިދާޅުވަމުންދާ ބޭފުޅާއެވެ.

މީ އެއްގޮތަކަށްވެސް ދެކޮޅު ޖެހޭ ވާހަކައެއް ނޫން. ދައުލަތަށް ލޯނު ލިބޭނީ އެ ދައުލަތަކަށް އެފައިސާ އަނބުރާ ދެއްކުމުގެ ޤާބިލްކަން ހުރި މިގަނޑަކަށް ބަލައި. ގޯތި ގެދޮރު ރަހުނު ކޮށްފައެއްނޫން.

– ރައީސް ނަޝީދު ވިދާޅުވެއްފައިވެއެވެ.

ފިނޭންސް މިނިސްޓްރީން ބުނެފައިވަނީ ދައުލަތުގެ މުދަލެއް ރަހުނުކޮށްގެން މިހާތަނަށް ދަރަންޏެއް ނަގާފައި ނުވާނެ ކަމަށާއި ކުރިޔަށްއޮތް ތަނުގައިވެސް އެގޮތަށް ދަރަންޏެއް ނެގުމަށް މިނިސްޓަރް އަމީރު ވިސްނުންފުޅެއް ނުގެންގުޅުއްވާ ކަމަށެވެ. ދައުލަތުގެ މާލީ ޙާލަތާ ގުޅޭ ގޮތުން ހަފުތާއަކު އެއްފަހަރު ފިނޭންސް މިނިސްޓްރީން އާންމުކުރާ ހިސާބުތަކަށް ބަލާއިރު، ޖުލައި މަހުގެ 29 ވަނަ ދުވަހާ ހަމައަށް ދައުލަތަށް އާމްދަނީގެ ގޮތުގައި ލިބިފައިވަނީ 9.9 ބިލިއަން ރުފިޔާއެވެ.

ދަތުރުގެ ބޭނުމަކީ އިޤްތިޞާދީ ގޮތުން، ލިބިފައިވާ ކުރިއެރުން ކިޔައިދިނުން: ފިނޭންސް މިނިސްޓްރީ