ގެއްލިފައިވާ މީހުންނާއި، މަރުތައް ބަލާ ކޮމިޝަނުން ބަލާ މައްސަލަތަކުގައި ސިޔާސީ ވެގެން ނުވާނެކަމަށް ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ނޫސްވެރިޔާ އަހުމަދު ރިޟުވާނު ޢަބުދުﷲ ގެއްލުވާލި މައްސަލާގައި ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ގެއްލިފައިވާ މީހުންނާއި މަރުތައް ބަލާ ކޮމިޝަނަށް މިއަދު ހާޒިރުވުމަށް ވަނީ އަންގާފައެވެ. ރައީސް ޔާމީން މަރު ކޮމިޝަނަށް ހާޒިރުކޮށް ކުރަމުންދާ މަސައްކަތާއި ގުޅިގެން ޑރ.ޝަހީމް ވިދާޅުވީ ރައީސް ޔާމީންއާއި، މަރުތަކާއި އެއްވެސް ގުޅުމެއް ނެތްކަމަށް މީގެކުރިން ހާމަކޮށްފައިވާއިރު، ކުއްލިއަކަށް ރައީސް ޔާމީން ކޮމިޝަނަށް ހާޒިރު ކުރަންޖެހޭ ސަބަބެއް ނުވިސްނޭ ކަމަށެވެ.
މަރު ކޮމިޝަނުން މަސައްކަތް ކުރަންޖެހޭނީ ޕްރޮފެޝަނަލްކޮށް ކަމަށް ޝަހީމް ވިދާޅުވިއެވެ. ރައީސް ޔާމީނަށް ސިޔާސީ ގޮތުން ފިއްތުންތައް ކުރިމަތިކޮށް ޖެއްސުން ކުރުމަކީ ކޮމިޝަނަށް ކުރެވިގެންވާނެ ކަމެއްނޫންކަމަށާއި، އެއީ ދަރަވަރު ކަމެއްކަމަށް ޝަހީމް ވިދާޅުވިއެވެ.
މަރު ކޮމިޝަނުން މީގެ ކުރިން އެންމެހާ ރައްޔިތުންގެ ކުރިމަތީގައި އިޢުލާންކޮށްފަ ވާނެ ރައީސް ޔާމީންނާ މަރުތަކާ އެއްވެސް ގުޅުމެއް ނެތްކަމަށް ތަޙުޤީޤުތަކުން އެނގޭކަމަށް. ޕްރޮފެޝަނަލްކޮށް ކުރަންޖެހޭ ކަންކަން ސިޔާސީ ވެގެންނުވާނެ. ރައީސް ޔާމީނާ ޒާތީ ގޮތުން ދިމާކޮށް ޖެއްސުންކުރުމަކީ ދެރަވަރުކަމެއް.
– ޑރ.ޝަހީމް ވިދާޅުވިއެވެ.
މަރުކޮމިޝަންގެ މެމްބަރަކު ވިދާޅުވީ ރައީސް ޔާމީން ކޮމިޝަނަށް ހާޒިރުވުމަށް ދަންނަވާފައިވަނީ މ.ޝަނިންސްޓަރ އަހުމަދު ރިޞުވާން އަބްދުﷲ ގެއްލުވާލި މައްސަލާގައި ކޮމިޝަނުން ކުރަމުންދާ ތަހުގީގުގައި ސުވާލު ކުރުމަށްކަމަށެވެ. ރައީސް ޔާމީން ހާޒިރު ކުރުމަށް ހަމަޖެހިފައިވަނީ މިއަދު 2 ޖަހާއިރަށް ކަމަށެވެ.
މިނިވަން ނޫހުގެ ނޫސްވެރިޔާ އަޙްމަދު ރިޟްވާން ޢަބްދުﷲ ގެއްލުވާލިތާ 6 އަހަރަށްވުރެ ގިނަ ދުވަސްވެފައިވާއިރު، އެ މަރުގެ މައްސަލައަށް އިންސާފް ހޯދައިދެއްވުމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެކެވެ. ރިޟްވާން ގެއްލުވާލި މައްސަލަ ބޭރުގެ އިންވެސްޓިގޭޓަރެއްގެ އެހީއާއިއެކު ތަޙްޤީގުކުރަމުންދާކަން މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަންނުން ހާމަކުރައްވަފައިވެއެވެ.
ރިޟުވާނު ޢަބްދުﷲ ގެއްލުވާލި މައްސަލަ އާއި ގުޅޭ މައުލޫމާތު އެނގޭ ފަރާތްތަކަށް އެކަން ހިއްސާކުރުމަށް ފުރުޞަތު އެބައޮތްކަމަށްވެސް މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަނުން ފަހުން ވަނީ ވިދާޅުވެފައެވެ.
