މިސްކިތުގެ އިމާމުކަމަށް އެންމެ އައުލާ ވާނީ އެ މިސްކިތަކަށް ކަނޑައަޅާފައިވާ އިމާމަކު ކަމަށް ދީނީ އިލްމުވެރިޔާ ޝައިޚު ޢަލީ ޒައިދު ވިދާޅުވެއްޖެ އެވެ.

ޒައިދު މިހެން ވިދާޅުވެފައި މިވަނީ ދަސްކޮށްދިނުމުގެ ބޭނުމުގައި ވެސް މިސްކިތްތަކުގައި ކުޑަކުދިން ލައްވާ އިމާމްވެ ޖަމާއަތުގައި ނަމާދު ނުކުރުވުމަށް އިސްލާމިކް މިނިސްޓްރީން އިލްތިމާސް ކުރުމާގުޅިގެން ގިނަބަޔަކު ހިތްހަމަ ނުޖެހުން ފާޅުކުރަމުންދާ ދަނޑިވަޅެއްގަ އެވެ. މިނިސްޓްރީން މިގޮތަށް އަންގާފައި ވަނީ ކުޑަކުދިން ލައްވާ އިމާމުވެ ނަމާދުކުރުވާ ކަމުގެ ޝަކުވާތަކެއް މިނިސްޓްރީއަށް ހުށަހެޅުމާއި ގުޅިގެންނެވެ.

މިނިސްޓަރ ވިދާޅުވީ، ބެލެނިވެރިންގެ އިއުތިރާޒެއް ނެތް ނެތްނަމަ ތަރާވީސް ނަމާދު އިމާމުވެކުރަން މީގެ ކުރިން ހުއްދަ ދީފައިވާނެ ކަމަށެވެ. ނަމަވެސް އެއީ އާއްމުކޮށްކުރާ ކަންތައްތަކެއް ނޫން ކަމަށް ވިދާޅުވިއެވެ. އެ ހުއްދަވެސް ދެމުން އައީ އުމުރުން 15 އަހަރުން މަތީގެ ކުދިންނަށެވެ.

މިކަމާގުޅިގެން އަލީ ޒައިދު ކުރެއްވި ޓްވީޓެއްގައި ވިދާޅުވީ އެ މިސްކިތަކަށް އައްޔަންކޮށްފައި ހުންނަ އިމާމުގެ ބަދަލުގައި ޝަރުޢީގޮތުން އޭނާއަށްވުރެ އައުލާ އެހެން ފަރާތެއް ޖަމާޢަތަށް ނާންނަހާ ހިނދަކު އިމާމުވެ ނަމާދުކުރަން ވާނީ އިމާމު މީހާ ކަމަށެވެ.

"އެއީ އެންމެ މަސްލަހަތު ބޮޑު ގޮތަކީ" – ޒައިދު

އެހެން ނަމަވެސް މިސްކިތުގެ ކުރީ ސަފުން ކުޑަކުދިން ބޭލުވުމަކީ ރަނގަޅު ގޮތެއް ނޫން ކަމަށްވެސް ޝައިޚު ޢަލީ ޒައިދު ވިދާޅުވި އެވެ.

Miskithuge imaam kamah enme aulaa vaany e miskithakah kandaelhifaivaa imaamaku! Shauree gothun eynaa ah vure aulaa ehen faraatheh jamaa'athah naannahaa hindhaku imaam ve namaad kuran vaany imaam meehaa! Eiy enme maslahathu bodu gothakee! Kury safun kudhin beyluvun rangalhah noon.

— Ali Zaid (@alizaid1000) July 28, 2021

އެހެން ނަމަވެސް ކުޑަކުދިން އިމާމުވެ ނަމާދު ކުރުމުގެ މައްސަލާގައި ކުރީގެ އިސްލާމިކް މިނިސްޓަރ އަދި ދީނީ ޢިލްމުވެރިޔާ ޑރ. މުހައްމަދު ޝަހީމް ޢަލީ ސަޢީދު ވިދާޅުވީ، ނަމާދުގެ ހުކުމްތައް ދަންނަ ޝަރުއީ ގޮތުން ބާލިޣުވެފައިވާ 13، 15 އަހަރުގެ ކުދިންނަށް އިމާމުވެ ނަމާދު ކުރުމަކީ ދީނި ގޮތުން މައްސަލައެއް އޮތްކަމެއްނޫން ކަމަށެެވެ.

ޝަހީމް ވިދާޅުވީ ކުޑަކުދިން މިސްކިތަށް ލޯބިޖައްސައި، އެކުދިންނަށް މިސްކިތްތަކުން ޖާގަދީ ލޯތްބާއި އިޚުތިރާމު ދިނުމަކީ އެކުދިންނަށް ލިބޭނެ ވަރަށް ބޮޑު އުފަލެއްކަމަށެވެ. މީގެ އިތުރުން ފުރަތަމަ ސަފުގައި ތިބޭ ކުޑަކުދިން ފަހަތަށް ޖެއްސުން ޑރ. ޝަހީމް ވެސް ވަނީ ވަރަށް ބޮޑަށް ކުއްވެރި ކުރައްވައި، އެކަން އެގޮތަށް ނުކުރުމަށް އިލްތިމާސް ކުރައްވާފަ އެވެ.