އިދިކޮޅު ޕްރޮގްރެސިވް ކޯލިޝަނުން މިހާރު ކުރިއަށްގެންދާ "މަވެސް ޕީޕީއެމް" ހަރަކާތުގައި ގިނަ އަދަދެއްގެ ބަޔަކު ޕީޕީއެމްއާއި ގުޅެމުންދަނީ މިސަރުކާރާއިމެދު ރައްޔިތުން ކުރާ އުންމީދެއް ނެތުމުން ކަމުގައި އިދިކޮޅު ޕީޕީއެމްގެ ނާއިބް ރައީސް ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
"މަވެސް ޕީޕީއެމް"ގެ ނަމުގައި މުޅި ރާއްޖޭގައި ގެންދާ މިހަރަކާތުގައި ރާއްޖޭގެ އެކި ކަންކޮޅުތަކުން ގިނަ ބަޔަކު ދަނީ ޕީޕީއެމްއާއި ގުޅެމުންނެވެ. މިކަމަށް އިޝާރާތް ކުރައްވާ ޝިޔާމް ވިދާޅުވީ ޕީޕީއެމްއަކީ ރާއްޖޭގެ ރައްޔިތުންނަށް އޮތް އުންމީދުކަން ދިވެހި ހުރިހާ ރައްޔިތުން ގަބޫލުކުރާކަމަށެވެ. ކޮންމެ ދުވަހަކު ޕީޕީއެމްއާއި ގުޅޭ މީހުން އިތުރުވެ ޕާޓީއަށް އޮންނަ ތާއީދު އިތުރުވެގެންދަނީ ރައްޔިތުން މިސަރުކާރާއި ރައީސް ޞާލިހުއާއިމެދު އޮތް އުންމީދު ކެނޑުމުންކަމަށް ޝިޔާމް ވިދާޅުވިއެވެ.
ޕީޕީއެމް، ޕީއެންސީ އަދި ރައީސް ޔާމީން އަށް ރާއްޖޭގެ އެކިކަންކޮޅުތަކުގައި އޮތް ތާއީދު އަންނަނީ ވަރަށް ބޮޑަށް އިތުރުވަމުން. މަވެސް ޕީޕީއެމްގެ ހަރަކާތާއިއެކު ކޮންމެ ދުވަހަކު އެތައް ބަޔަކު އަންނަނީ ޕީޕީއެމްއާއި ގުޅެމުން. ރައީސް ޞާލިހު އާއި ދޭތެރޭ ރައްޔިތުން އިތުރަށް ކުރާނެ އުންމީދެއްނެތް.
– ޝިޔާމް ވިދާޅުވިއެވެ.
Alhamdhu Lillaahi. PPM-PNC adhi Raees Yameen ah Raajjeyge ekikankolhuthakugai oiy thaaeedh annanee varah bodah ithuruvamun. #MavesPPM ge harakaaithakaa eku konme dhuvahaku ethah bayaku annanee PPM aa gulhemun. Raees Solih aa dheytherey rayyithun ithurah kuraane ummeedheh neiy. pic.twitter.com/epWiISBbBQ
— Ahmed Shiyam (@Shiyamaldives) July 27, 2021
ޕީޕީއެމްއިން ބުނެފައިވަނީ މި ކެމްޕޭނުގެ ތެރެއިން އަންނަ އޮގަސްޓް މަހުގެ ނިޔަލަށް ޕާޓީއަށް އިތުރު 10،000 މެމްބަރުން ހަމަކުރުމަކީ އަމާޒެއް ކަމަށެވެ. މެމްބަރުން އިތުރުކުރުމުގެ ކެމްޕޭން މާލޭގެ އިތުރުން އަތޮޅުތަކުގައި ވެސް ކުރިއަށް ދެއެވެ. މީގެ އިތުރުން މި ހަރަކާތަކީ، ރައީސް ޔާމީން މިނިވަންކޮށް 2023 ވަނަ އަހަރުގެ އިންތިހާބުގައި އެމަނިކުފާނު ރިޔާސަތަށް ގެނައުމަށްޓަކައި ކުރާ މައްސައްކަތްތަކަށް އިތުރު ފޯރިޔަކާ ޖޯޝެއް ގެނައުމަށް އަންހެނުންގެ ހަރަކާތުގެ ފަރާތުން އިސްނަގައިގެން ފެށި ހަރަކާތެއް ކަމަށް އެޕާޓީން ބުނެއެވެ.
މީގެ ކުރިންވެސް ޕީޕީއެމުން ވަނީ “މަވެސް ޕީޕީއެމް” ނަމުގައި ޕާޓީ އަށް މެމްބަރުން އިތުރުކުރުމަށް ރާއްޖޭގެ އެކި ކަންކޮޅުތަކުގައި ތަފާތު އެކި ހަރަކާތްތައް ކުރިއަށްގެންގޮސްފަ އެވެ.
2011 ވަނަ އަހަރުގެ އޯގަސްޓް މަހު 17 ވަނަ ދުވަހު އުފެއްދި ޕީޕީއެމްގެ އިލެކްޝަންސް ކޮމިޝަންގެ ދަފްތަރުގައި މިވަގުތު ތިބި މެމްބަރުންގެ ޖުމްލަ އަދަދަކީ 38،020 އެވެ.
ކޮމެންޓު ފޮނުވާ