އިސްލާމްދީނުގެ ބުރުސޫރަ ހުތުރުކުރާ މީހުންނަށް ނޫނެކޭ ބުނަން ކެރޭވަރުގެ މުސްލިމު ދަރިންނަށް ގައުމު ބޭނުންވެފައިވާ ކަމަށް މިއަދުގެ އީދު ހުތުބާގައި ބުނެފިއެވެ.
އަޟްޙާ ޢީދުގެ މުނާސަބަތުގައި މިސްކިތްތަކުގައި ކިޔާފައިވާ ޚުޠުބާގައި ވަނީ މިއަދަކީ ޤުރްބާނީގެ ދުވަހެއްކަން ހަނދާން ކޮށްދީފައެވެ. މިއަދަކީ މާތް ﷲ އެކަލޭގެފާނުގެ މައްޗަށް ސަލާމް ލެއްވި އިބްރާހީމުގެފާނާއި، ލޮބުވެތި ދަރިކަލުން އިސްމާޢީލުގެފާނާ ކުރިމަތި ކުރެއްވި ބޮޑު އިމްތިޙާނުން، ފާސްވެ ވަޑައިގަތުމުން، މާތް ﷲ އެ ދެބަފައިކަލުންނަށް، ތަޢުރީފުގެ ބަސް ވަޙީކުރެއްވި ދުވަސްކަން ޚުޠުބާގައި ހަނދާން ކޮށްދީފައިވެއެވެ.
އިބްރާހީމުގެފާނުގެ ޢަދުއްވުން އުޅުނީ، އެކަލޭގެފާނު ދެރަކޮށް، ނިކަމެތިކޮށްލެވޭތޯ ކަމަށާއި އެކަމަކު މާތް ﷲ އެބައިމީހުން އެންމެ ނިކަމެތީންގެ ތެރޭގައި ލެއްވިކަމަށް ޚުޠުބާގައި ވެއެވެ. އިބްރާހީމުގެފާނުގެ މި އިމްތިޙާނުގައި، އެކަލޭގެފާނުގެ ދަރިކަލުން އިސްމާޢީލުގެފާނު ބޮޑު ދައުރެއް އަދާކުރެއްވި ކަމަށާއި އެއީ ﷲގެ އަމުރުފުޅަކަށް ވާތީ، އެކަލޭގެފާނުގެ ބައްޕާފުޅަށް ކިޔަމަންވެވަޑައިގަތް ގޮތް، ދެކުމަށް ޚުޠުބާގައި ގޮވާލެއްވިއެވެ. އެކަލޭގެފާނު މި ދެއްކެވި ކިޔަމަންތެރިކަމުގެ ނަމޫނާ އަކީ، މިއަދުގެ ޒުވާނުންނަށް ލިބިގެންވާ ހެޔޮ ނަމޫނާއެއް ކަމަށް ވެސް ޚުޠުބާގައި ބުނެފައި ވެއެވެ.
އިބްރާހީމްގެފާނު މި އިމްތިޙާނުން ފާސްވެ ވަޑައިގަތުމުން، މާތްﷲ އެކަލޭގެފާނަށް މަތިވެރި ނިޢުމަތްތަކެއް ދެއްވިއެވެ. އިސްމާޢީލުގެފާނުގެ ބަދަލުގައި ޤުރްބާން ކުރައްވާނެ ކަންބަޅިއެއް ފޮނުއްވެވިއެވެ. އެކަލޭގެފާނުގެ މައްޗަށް ސަލާމް ލައްވައި، އެކަލޭގެފާނުގެ ޛިކުރާ، އާޚިރަތާ ހަމައަށް ލެހެއްޓެވިއެވެ. އެކަލޭގެފާނަށް އިތުރު ބޭފުޅުން ދެއްވިއެވެ." ޚުޠުބާގައި ބުނެފައި ވެއެވެ.
– އީދު ޚުތުބާގައި ބުނެފައިވެއެވެ.
މިއަދު ފެންނަމުންދަނީ ފާޅުގައި އިސްލާމްދީނަށް ފުރައްސާރަކޮށް ކީރިތި ގުރުއާނަށް އިހާނެތިކޮށް ހިތަމުންދާ މަންޒަރު ކަމަށާ ނަބިއްޔާއަށް ފުރައްސާރަކޮށް މުސްލިމުންގެ މުގައްދަސް ތަންތަނަށް ވެރިވެ ފޭރިގަންނަމުންދާ މަންޒަރު ކަމަށާ އަދި އިސްލާމީ ގައުމުތަކުގެ އިންތަކުގެ ހުރުމަތް ކަނޑާ މުސްލިމު އިލްމުވެރިންގެ ގަދަރު ވައްޓާލާ އިސްލާމީ ޔުނިވާސިޓީތަކާއި މަތީ ތައުލީމުދޭ މަރުކަޒުތަކުގެ މަންހަޖުތައް ބަދަލުކުރުމަށް ފިއްތުންތައް ކުރިމަތި ކުރުވަމުންދާ މަންޒަރު ކަމަށް ހުތުބާގައި ބުނެފައިވެއެވެ. ސައްތައިން ސައްތަ އިސްލާމީ ގައުމެއް އޮވެގެން ނުވާނެ ކަމަށް ބުނެ އަޑު އުފުލާއިރު މުސްލިމުންގެ ހައްގުތަކަށް އެކު ގޮތްގޮތުން އަރައިގަންނަމުންދާ ކަމަށެވެ.
އީދަކީ އަބާއްޖަވެރި ކަމެއް ނެތް ބާއްޖަވެރި ކަމެކެވެ. އަރާރުމެއް ނެތް އެއްބައިވުމެކެވެ. ރުޅިވެރިކަމެއް ނެތް އެކުވެރި ކަމެކެވެ. ލޯތްބާއި އަޅައިލުން އޮތް އުފާވެރި ދުވަސްތަކެކެވެ. މި ދުވަސްތަކުގައި އެއްބަޔަކު އަނެއް ބަޔަކަށް ހެޔޮ ފޯރުވާށެވެ. އެއް ބަޔަކު އަނެއް ބަޔަކަށް މާފު ކުރާށެވެ. ސަލާމްކޮށް ހިތްތައް ސާފުކުރާށެވެ. ހެޔޮކަންތައް ކުރުމުގައި އެއްބާރުލާށެވެ.
– އީދު ޚުތުބާގައި ބުނެފައިވެއެވެ.
މިއަދު މި ވަނީ އެމީހުންގެ ވަގުތުންނާއި، މުދަލުންނާއި، އީޖާދުތަކުން، އިސްލާމް ދީނަށްޓަކައި ޤުރްބާންވާން ކެރޭ މީހުންނަށް ބޭނުން ވެފައި ކަމަށް ޚުޠުބާގައި ބުނެފައި ވެއެވެ. އަޅުގަނޑުމެންގެ ޢީދަކީ މިނިވަންކަމުގެ ޢީދެއްކަން ހަނދާންކޮށްދީ މި ޢީދު ވާންޖެހޭނީ ނަފްސުތައް ޝަހަވަތްތަކުން މިނިވަން ކޮށްދޭ ޙަސަދަވެރިކަމުންނާއި، ރުޅިވެރިކަމުން ހިތްތައް ޠާހިރުކޮށްދޭ ޢީދަކަށް ކަމަށާއި އަދި ދެބައޮޑުވުމާއި، ނެތިމޮށުމާއި، އާޑަފުރައްސާރަ ކުރުމުން ދޫތައް ރައްކާތެރިކޮށްދޭ ޢީދަކަށް ކަމަށް ވެސް ޚުޠުބާގައި ބުނެފައި ވެއެވެ.
މިއަދު މި ވަނީ އެމީހުންގެ ވަގުތުންނާއި، މުދަލުންނާއި، އީޖާދުތަކުން، އިސްލާމް ދީނަށްޓަކައި ޤުރްބާންވާން ކެރޭ މީހުންނަށް ބޭނުން ވެފައި ކަމަށް ޚުޠުބާގައި ބުނެފައި ވެއެވެ.
