އަފްއާނިސްތާނުގައި ތާލިބާނުން ހޯދަމުންދާ ބޮޑެތި ކުރިއެރުންތަކާ ގުޅިގެން،ި، އެމެރިކާއިން އަފްއާނިސްތާނުގައި ކުރި 20 އަހަރުވީ ހަގުރާމާގައި އެމެރިކާ އަދި ނޭޓޯގެ ސިފައިންނަށް އެހީތެރިކަން ފޯރުކޮށްދިން އެތައްހާސް އަފްއާން ރައްޔިތުންނެއް ވައިގެ މަގުން އެގައުމުން ބޭރަށް ގެންދިއުމަށް އެމެރިކާއިން ޚާއްސަ އޮޕްރޭޝަން ފަށައިފިއެވެ.

މި އޮޕަރޭޝަންގެ މަގުސަދަކީ، 20 އަހަރަށްފަހު އެމެރިކާ ސިފައިން އަފްއަނިސްތާން ދޫކޮށް ދިއުމާ ގުޅިގެން ތާލިބާނުން އެގައުމުގައި ބޮޑެތި ކުރިއެރުންތަކެއް ހޯދަމުން ދާތީ، ތާލިބާނުންގެ ފަރާތުން މި މީހުންނަށް ކުރިމަތިވެދާނެ ނުރައްކަލަކުން އެމީހުން ސަލާމަތް ކޮށްދިނުމެވެ.

މި އެންމެންނަކީވެސް، އެމެރިކާ ސިފައިން އަފްއާނިސްތާން ދޫކޮށް ދިއުމާ ގުޅިގެން، އެގައުމުގައި އެމެރިކާސިފައިން ތިބި އިރު، އެކި ގޮތްގޮތުން އެކެރިކާއަށް އެހީތެރިކަން ފޯރުކޮށް ދީފައިވާ މީހުންނެވެ. އަދި މި އެންމެންވެސް ތިބީ އެމީހުންގެ ދިރިއުޅުން އަފްއާނިސްތާން ނޫން އެހެންތަނަކަށް ބަދަލު ކޮށްދިނުމަށް އެމެރިކާއިން ކުރަމުންދާ މަސައްކަތްތަކުގައި، ވިސާ ހަމަޖެހެން ދެން އަފްއާނިސްތާނުގައި މަޑު ކޮށްގެންނެވެ.

އަފްއާނިސްތާނުގައި ހުންނަ އެމެރިކާ އެމްބަސީން ބުނެފައިވާ ގޮތުގައި، އެމެރިކާއިން ވިސާ ދިނުމުގެ މަސައްކަތް މިހާރު ކުރިޔަށްދާ މީހުން، އަފްއާނިސްތާނުން ބޭރަށް ގެންދިއުމަށްޓަކާ ބާއްވާ ފްލައިޓްތައް މި ޖުލައި މަހުގެ ފަހު ހަފްތާގައި ބޭއްވުމަށް ވަނީ ހަމަޖެހިފައެވެ.

"އަފްއާނިސްތާނުގައި ހުންނަ އެމެރިކާ އެމްބަސީން، އޮޕަރޭޝަން "އެލީސް ރެފިއުޖް"އަށް އެހީތެރިކަން ފޯރުކޮށް ދިނުމަށްޓަކާ ސްޓޭޓް ޑިޕާޓްމްނަޓާ އެކީގައި މަސައްކަތް ކުރަމުން ދާނެ،" އަފްއާނިސްތާނުގައި ހުންނަވާ އެމެރިކާގެ އެންމެ އިސްފަރާތް ކަމުގައިވާ އެމްބެސެޑަރ ރޮސް ވިލްސަން ވިދާޅުވިއެވެ.

ތާލިބާނުން އަލުން އަފްއާނިސްތާނުގެ ވެރިރަށް ކާބުލް ހިފާފާނެ ކަމުގެ ހީތަށް ގިނަބަޔަކަށް ބޮޑުވެގެން ގޮސްފައިވަނީ، ކާބުލް ވަށައިގެންވާ ގިނަ ސަރަހައްދު ތަކުގައާއި އަދި އަފްއާން – ޕާކިސްތާނުން ބޯޑަރުގެވެސް މުހިންމު ސަރަހައްދެއް ތާލިބާނުންގެ ބާރުގެ ދަށަށް ފާއިތުވެދިޔަ ހަފްތާގައި ދިއުމާ ގުޅިގެންނެވެ.

އެމެރިކާ ސިފައިން އަފްއާނިސްތާނުގައި ހޭދަކުރި 20 އަހަރު ދުވަހުގެ ތެރޭގައި އެމީހުންނަށް ތަރުޖަމާނުންގެ ގޮތުގައާއި، ކްލާކުންނާއި އަދި ޑްރައިވަރުންގެ ގޮތުގައި، އަދި މި ނޫން ގޮތްގޮތުންވެސް އެމެރިކާއަށް އެހީތެރިކަން ފޯރުކޮށްދިން 200،000 އެއްހާ މީހުންނާއި އެމީހުންގެ އާއިލާތައް މިވަގުތު ތިބީ، އެމެރިކާގެ އެހީގައި، އަފްއާނިސްތާން ނޫން އެހެންތަނެއްގައި ވަޒަންވެރި ވުމަށްޓަކާ ވިސާއަށް އެޕްލައި ކޮށްގެންނެވެ.

އަދިމެރިކާއިން މިހާރުދަނީ، އެމެރިކާ ނުވަތަ އެގައުމުގެ އެހީތެރިކަމުގައި، އަފްއާނިސްތާނުން ނޫން އެހެން ގައުމެއްގައި ވަޒަންވެރި ކުރުވުމުގެ މަސައްކަތް ކުރިޔަށް ގެންދަމުންނެވެ.

އަދި އެމެރިކާގެ ގާނޫނު ހަދާ މަޖިލީހުންދަނީ، މި މީހުންގެ ވިސާގެ ކަންކަން އަވަސް ކުރުމަށާއި، އަފްއާނިސްތާނުން ބޭރަށް ގެންގޮސް، އެމަޖެންސީ ހާލަތުގައި އެހެންތަނެއްގައި ވަޒަންވެރި ކުރުވުމަށް ބޭނުންވާ ގާނޫނު ހެދުމަށް މިހާރު މަސައްކަތް ކުރަމުންނެވެ.

އެމެރިކާގެ ރައީސް ޖޯ ބައިޑްން ވިދާޅުވެފައިވަނީ، އަފްއާނިސްތާނުގައި އެމެރިކާއަށް އެހީތެރިވެދިން ފަރާތްތައް ގިނިކަންޏާ ދޫކޮށް ނުލައްވާނެ ކަމުގައެވެ.