ކުރިއަށް އޮތް އަލްހާ ޢީދު ދުވަހު ހަވީރު މާލޭގައި ފައިމަހުގައި އުޅޭގޮތަށް ސިޓީ ކައުންސިލުން ހަމަޖައްސައިފި އެވެ.
ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި މޭޔަރު ޑރ. މުހައްމަދު މުއިއްޒު ވިދާޅުވީ، އީދު ދުވަހު 16:00 އިން 20:00 އަށް ހިނގާފައި އުޅޭ ގަޑިއެއް ކަމުގައިކައުންސިލުގެ އިއްޔެގެ ބައްދަލުވުމުގައި ނިންމާފައިވާ ކަމަށެވެ. އަދި މިއުސޫލު މާލެ އާއި ހުޅުމާލެ އަދި ވިލިމާލޭގައި ތަންފީޒު ކުރާނެ ކަމަށްވެސް މުއިއްޒު ވިދާޅުވިއެވެ. މިކަމާ ގުޅިގެން މިހާރު ޓްރެފިކް ޕޮލިހާ މަޝްވަރާ ކުރައްވާފައިވާ ކަމަށް ވެސް މުއިއްޒު ވިދާޅުވިއެވެ.
މާލެ އަކީ ތޮއްޖެހިފައިވާ ތަނަކަށް ވެފައި، ކޯވިޑްގެ ބަލިމަޑުކަމުގެ ތެރޭގައި، އެންމެ ހިތްފަސޭހަ ގޮތަކަށް ޢީދުގެ ކަންކަން ގެންދެވޭނެގޮތެއް ބެލުމަށް ރައްޔިތުންނާ ވެސް މަޝްވަރާ ކުރެވިފައި ވާކަމަށާއި ފައިމަގުގައި އުޅުމަށް ކަނޑައަޅާފައިވާ ވަގުތަކީ އެންމެ ގިނަ ބަޔަކަށް ފެނުނު ވަގުތު ކަމަށްވެސް މޭޔަރު ވިދާޅުވިއެވެ.
އެހެން އަހަރުތަކޭ އެއްގޮތަށް މިއަހަރުވެސް އީދު ދުވަހު ވެހިކަލް ދުއްވުން މަނާ ވަގުތު ކަނޑައެޅި ނަމަވެސް އެމަޖެންސީގައި ބޭނުންކުރާ ވެހިކަލްތަކާއި، އެމްބިއުލާންސް އަދި ސަލާމަތީ ހިދުމަތްތައް ފަދަ ކޮންމެހެން ދުއްވަން ޖެހޭ ވެހިކަލްތަކަށް ހުއްދަ ދޭނެ ކަމަށް މުއިއްޒު ވިދާޅުވިއެވެ.
ސިޓީ ކައުންސިލުން ވަނީ ރައްޔިތުންނަށް އުފާވެރި ވަގުތުކޮޅެއް ހޭދަކޮށްލުމުގެ ފުރުސަތު ފަހިކޮށް ދިނުމަށް ކުރެވޭ މި މަސައްކަތަށް ހުރިހާ ރައްޔިތުން އެއްބާރުލުން ދިނުމަށް އެދިފައެވެ. އަދި ޢީދުގެ އެކިއެކި ކަންކަން ކުރިއަށް ގެންދާއިރުވެސް ކޯވިޑާއި ގުޅިގެން އަޅާފައިވާ ހުރިހާ ފިޔަވަޅުތަކަށް ސަމާލުވުމަށް ވަނީ އިލްތިމާސް ކޮށްފައެވެ.
