ގާޒާގައި ހުރި ހަމާސް ޖަމާއަތުގެ އަމާޒުތަކަށް އިސްރާއީލުން އަނެއްކާވެސް ބޮން އަޅައިފިއެވެ.
އިސްރާއީލުން މި ދިން ހަމަލާތަކަކީ، ގާޒާއިން އިސްރާއީލުގެ އަވަށްތަކަށް "އަލިފާން ފުއްޕާހަން" ތަކެއް އުދުއްސާލާފައިވާތީ ބަދަލު ހިފުމުގެގޮތުން ދީފައިވާ ހަމަލާތަކެކެވެ.
އިސްރާއީލުގެ އަސްކަރިއްޔާއިން ހާމަކޮށްފައިވާ ގޮތުގައި، ހަމަލާތައް އަމާޒުކޮށްފައިވަނީ ހަމާސްގެ ހަތިޔާރު އުފައްދާ ކާރުޚާނާތަކަށާއި، ރޮކެޓް އުދުއްސާ ލޯންޗަރ ތަކަށެވެ.
ގާޒާއިން މަންޒަރު ދުށް ބައެއް ފަރާތްތަކާ ހަވާލާދީ ބައެއް މީޑިއާތަކުން ރިޕޯޓު ކޮށްފައިވާ ގޮތުގައި އިސްރާއީލުގެ ހަމަލާތައް އަމާޒު ކޮށްފައިވަނީ، ގާޒާ ސްޓްރިޕްގެ އުތުރުގައިވާ ބައެއް އަމާޒުތަކަށެވެ. މިހަމަލާތަކުގައި ލިބުނު ގެއްލުންތަކެއް އަދި އެއްވެސް ފަރާތަކުން ހާމަ ކޮށްފައެއް ނުވެއެވެ.
"މި ހަމަލާތަކަކީ، އިސްރާއީލަށް އަމާޒު ކޮށްފައިވާ "އަލިފާން ފުއްޕާހަން" ތަކުން ދީފައިވާ ހަމަލާތަކުގެ ބަދަލު ހިފުމުގެ ގޮތުން ދީފައިވާ ހަމަލާތަކެއް،" އިސްރާއީލުގެ އަސްކަރިއްޔާއިން ނެރެފައިވާ ބަޔާނެއްގައި ބުނެފައި ވެއެވެ.
އިސްރާއީލުގެ އަލިފާން ނިއްވާ ފަރާތްތަކުން މައުލޫމާތު ދީފައިވާ ގޮތުގައި، ގާޒާއިން އުދުއްސާލާފައިވާ އަލިފާން ފުއްޕާހަންތަކުގެ ސަބަބުން، މި ފަހްތާގެ ހޮނިހިރު އަދި އާދީއްތަ ދުވަހު، އިސްރާއީލުގެ އެޝްކޮލް ސަރަހައްދުގައި ބައެއް ހިސާބުތަކުގައި ވަނީ އަލިފާން ރޯވެފައެވެ.
ފާއިތުވެދުޔަ ހަފްތާގެ ބުރާސްފަތި ދުވަހުވެސް، ގާޒާއިން އުދުއްސާލާފައިވާ އަލިފާން ފުއްޕާހަންތަކުގެ ސަބަބުން އިސްރާއީލުގެ އެޝްކޮލް ސަރަހައްދުގެ ބައެއް ހިސާބުތަކުގައި އަލިފާން ރޯވެފައި ވެއެވެ.
މިހަމަލާތަކުގެ ބަދަލު ހިފުމުގެ ގޮތުން އިސްރާއީލުންވަނީ ހުކުރު ދުވަހު ހެނދުނުވެސް ގާޒާއަށް ބޮން އަޅާފައެވެ. އިސްރާއީލުގެ އަސްކަރިއްޔާއިން ބުނެފައިވަނީ، މިހަމަލާތައްވެސް އަމާޒުކޮށްފައި ވަނީ، ހަމާސްގެ ހަތިޔާރު އުފައްދާ ކާރުޚާނާތަކަށް ކަމަށެވެ.
ފާއިތުވެދިޔަ މޭމަހު، ގާޒާގައި ތިބޭ ހަމާސްގެ ހަގުރާމަވެރިންނާ އަދި އެހެން ޖަމާއަތްތަކުގެ ހަގުރާމަވެރިންނާ އިސްރާއީލުގެ އަސްކަރިއްޔާއާއި ދެމެދު އުފެދުނު ހަމަނުޖެހުންތައް ނިމުމަކަށް އައިސްފައިވަނީ މިސްރުން މެދުވެރިވެގެން ގާއިމް ކުރެވުނު ސުލްހައިގެ އެއްބަސްވުމަކަށް ފަހުއެވެ.
ފަހަކަށް އައިސް އިސްރާއީލަށް އަމާޒުކޮށް ގާޒާއިން ދެމުންދާ ފުއްޕާހަމުގެ ހަމަލާތަކަކީ، ފަލަސްތީނުގެ ކޮން ޖަމާއަތަކުން ދެމުންދާ ހަމަކާތަކެއްކަން ސާފުވެފައެއް ނުވެއެވެ.
މޭމަހު ހިނގި ހަމަ ނުޖެހުންތަކުގައި، ފަލަސްތީނުގެ 260 މީހަކުވަނީ ޝަހީދުވެފައެވެ. މީގެތެރޭގައި ބައެއް ހަގުރާމަވެރިންވެސް ހިމެނެއެވެ. އިސްރާއީލުގެ ރަސްމީ ފަރާތްތަކުން ހާމަކޮށްފައިވާ ގޮތުގައި މި ހަމަނުޖެހުންތަކުގައި އެގައުމުގެ 13 މީހަކު، ގާޒާއިން ދިން ރޮކެޓް ހަމަކާތަކުގައި ވަނީ މަރުވެފައެވެ. މީގެ ތެރޭގައި އިސްރާއީލުގެ ސިފައިންގެ މީހަކުވެސް ހިމެނެއެވެ.
