ގާނޫނުލް އުގޫބާތުގައި ހިމެނޭ ނަފުރަތުގެ އަމަލު ހިންގުމުގެ ބަޔަށް މާއްދާތަކެއް އިތުރު ކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ބިލަށް ސަރުކާރު ކޯލިޝަންގައި ހިމެނޭ ޕާޓީތަކުން ތާއީދު ނުކުރާނަމަ، ކޯލިޝަނުން ވަކިވުމަށް، ރައްޔިތުންގެ މަޖިލީހުގެ ބިލެތްދޫ ދާއިރާގެ އެމްޑީޕީ މެމްބަރު އަހުމަދު ހަލީމް (ދޮންބިލެތް) ދެއްކެވި ވާގަކަތަކަށް އަދާލަތު ޕާޓީގެ އިލްމުވެރިންގެ މަޖިލީހުގެ މެމްމަބަރު ޝައިޚު ޒައިދު ރައްދު ދެއްވައިފިއެވެ.
ސަރުކާރު ހިންގާ މައިޕާޓީ އެމްޑީޕީން، ކޯލިޝަންގެ އެއްވެސް ޕާތީއަކާއި، އަދި އިސްލާމިކް މިނިސްޓްރީއާއި، ގުޅުންހުރި އެއްވެސް އިދާރާއަކާއި މަޝްވަރާ ކުރުމެއްނެތި ހުށަހަޅާފައިވާ މިއިސްލާލާހައި ގުޅިގެން އެމްޑީޕީއަށް ވަނީ ވަރަށް ގިނަބައެއްގެ ފާޑުކިޔުން އަމާޒު ވެފައެވެ. މިބިލާއިމެދު އާންމުންގެ ނުރުހުން އަމާޒުވުމުން ދޮންބިލޭ ވިދާޅުވެފައިވަނީ ސަރުކާރުން ހުށަހަޅާ ބިލްތަކަކީ ކޯލިޝަން ޕާޓީތަކުން ތާއީދު ކުރަންޖެހޭ ބިލްތަކެއްކަމަށެވެ. އެހެން ނޫންކަމަށްވާނަމަ ކޯލިޝަންގައި ދެމިއޮތުމުގެ ބޭނުމެއް ނެތްކަމަށެވެ.
ދޮންބިލޭގެ ވާހަކަތަކާއި ގުޅިގެން ޝައިޚު ޒައިދު ވިދާޅުވީ ސަރުކާރުން ހުށަހެޅިގެން ގޯސްކޮށް އޮތް ބިލަކަށް ތާއީދު ކުރަންޖެހޭ އެއްވެސް ހާލަތެއް ނޯންނާނެކަމަށެވެ. އެފަދަ ބިލްތަކަށް ބުނާނީ ނޫނެކޭ ކަމަށެވެ. އަދި މިއަދު ކޯލިޝަން ޕާޓީތަކުން މިބިލުގައި ހުރި ކަންކަން ރަނގަޅު ކުރަން މަސައްކަތް ފެށުމުން އެކަން ބަލައި ނުގަނެވި، ތާކުންތާކު ނުޖެހޭ ވާހަކަ ދައްކަމީ ދެރަވަރު ކަމެއްކަމެއް ޝައިޚު ޒައިދު ވިދާޅުވިއެވެ.
ސަރުކާރުން ހުށައެޅިޔަސް ބިލު ނުބައިކޮށް އޮތްނަމަ އެ ބިލަކަށް ބުނަން ޖެހޭނީ ނޯ އޭ! ޝައްކެތްވެސް ނެތް! މިބިލުގެ ކަންތައް ގޮސްފައިވަނީ ރަނގަޅަކަށްނޫން! މިހާރު ޕާޓީތަކުން ބާރު އަޅައިގެން މިކަން އިސްލާހު ހުރަން އުޅޭތީ އެކަމާއި ދެރަވެގެންތޯ ތިޔަ މޭރުމުން ވާހަކަ ތިޔަ ދައްކަވަނީ؟ ދެރަވަރު.
– ޝައިޚު ޒައިދު ވިދާޅުވިއެވެ.
ގާނޫނުލް އުގޫބާތުގައި ހިމެނޭ ނަފުރަތުގެ އަމަލު ހިންގުމުގެ ބަޔަށް މާއްދާތަކެއް އިތުރު ކުރުމަށް ސަރުކާރުގެ ފަރާތުން ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން ހުށައެޅުއްވި އަދި “ހިސާން ބިލް” ގެ ގޮތުގައި މަޝްހޫރު ވެފައިވާ ބިލް މަޖިލީހަށް ހުށައެޅީ އަދާލަތު ޕާޓީއާ މަޝްވަރާ ކުރުމަށް ފަހު ކަމަށް ދެކެވޭ ވާހަކަތައް ކޯލިޝަންގައި ހިމެނޭ އަދާލަތު ޕާޓީން ވަނީ ދޮގުކޮށްފައެވެ. އަދި ރައީސް މައުމޫން ނިސްބަތްވާ އެމްއާރުއެމްއިން ވަނީ މިބިލަށް ތާއީދު ނުކުރާކަމަށް ވިދާޅުވެފައެވެ.
މިކަމާއި ގުޅިގެން ދޮންބިލޭ ވިދާޅުވީ ސަރުކާރުގެ ކޯލިޝަންގައިއޮވެ، ސަރުކާރުގެ ފަރާތުން ހުށަހަޅާ ބިލްތަކަކީ ކޯލިޝަންގެ ތާއީދު ލިބިގެން ހުށަހަޅާ ބިލްތަކެއްކަމަށެވެ. އެކަން އޮގޮތަށް ނުވާނަމަ ކޯލިޝަން ތެރޭގައި ތިބުމަކީ ރަނގަޅު ގޮތެއް ނޫންކަމަށެވެ.
ކޯލިޝަންގެ ސަރުކާރުން ހުށަހަޅާ ބިލްތައް ވާނީ ކޯލިޝަންގެ ހުރިހާ ބައިވެރިންގެ ތާއީދު އޮންނަ ބިލަކަށް. ނޫނީ ކޯލިޝަނުން ވަކިވާންވީ ނޫންތޯ.
– ދޮންބިލޭ ހަލީމް ވިދާޅުވިއެވެ.
“ހިސާން ބިލު” ގައިވާ ގޮތުން އާންމު ތަނެއްގައި ވަކި މީހަކީ އިސްލާމްދީނާ ހިލާފަށް އުޅޭ ނުވަތަަ އިސްލާމްދީނާ ދެކޮޅު މީހެއް ކަމަށް ތުހުމަތު ކުރުމާއި އިސްލާމީ އަގީދާއާ ގުޅުވައި މުޖުތަމައުގައި މީހަކާމެދު ނަފްރަތު އުފެއްދުން އުފެއްދުން ކުށަކަށް ހަދަން ވަނީ ހުށަހަޅައިފައެވެ.
ހަމަ އެހެންމެ އާންމުތަނެއްގައި މުސްލިމަކު ކާފަރު ކުރުން ސިފަކުރުން ނުވަތަ ސިފަ ކުރުމުގައި ބައިވެރިވުން ނުވަތަ އާންމު ތަނެއްގައި މުސްލިމަކު ކާފަރެއް ކަމަށް ތުހުމަތު ކުރުން ވެސް ކުށަކަށް ވާނެ އެވެ. ބިލްގައިވާ ގޮތުން މި ހުރިހާ ކުށަކީ ވެސް ޖުނާހުގެ އެއްވަނަ ދަރަޖައިގެ ކުށެކެެވެ. އެ ކުށުގެ އެންމެ ބޮޑު އަދަބަކަށް އަންނާނީ އެއް އަހަރުގެ ޖަލު ހުކުމެކެވެ
މުސްލިމަކު ކާފަރުކޮށް އެ މީހާއާމެދު އަނިޔާވެރި ވުމަށް ހިތްވަރުދީ ނުވަތަ އެކަމުގައި ބައިވެރިވެ އަދި އަނިޔާއަށް ދިނުމަށް ރޭވުމަކީ ޖިނާޔަތުގެ ފަސް ވަނަ ދަރަޖައިގެ ކުށަކަށް ހަދަން ވެސް ބިލުގައި ވަނީ ހިމަނައިފަ އެވެ. އެ ދަރަޖައިގެ ކުށަކަށް އެންމެ ގިނަވެގެން އަންނާނީ ދެ އަހަރު ދުވަހުގެ ޖަލު ހުކުމެވެ.
ކޮމެންޓު ފޮނުވާ