ޔުވެންޓަސްގެ ކޯޗަކަށް މި ސީޒަނުގައި ހުރި އަންދްރެއާ ޕިރްލޯ ވަކިކޮށް ތިން އަހަރުގެ އެއްބަސްވުމެއްގެ ދަށުން އަލެގްރީ އެ ޓީމާ ހަވާލުވާން ހުރިހާ ކަމެއް ނިމިފައިވާ ކަމަށް ސްކައި އިޓާލިއާ އިން މިއަދު ވަނީ ރިޕޯޓްކޮށްފަ އެވެ.
ރިޕޯޓުތައް ބުނާ ގޮތުން ރެއާލުން ފުރަތަމަ ހޯދަން މަސައްކަތްކުރީ ޔުވެންޓަސް އާއި އޭސީ މިލާންގެ ކުރީގެ ކޯޗު މެސިމޯ އަލެގްރީ އެވެ. އެެހެން ނަމަވެސް ރެއާލް ހުށެހެޅުމަށް ފުރަގަސްދީ އަލްގޭރީ ވަނީ މިހާރު ޔުވެންޓަސްއާ ގުޅެން ނިންމާފައެވެ. ދިހަ އަހަރު ތެރޭ ފުރަތަމަ ފަހަރަށް ރެއާލުން ހުސްއަތާ ސީޒަން ނިންމާލަން ޖެހުމުން ރެއާލްގެ ކޯޗަކަށް ހުރި އެ ކްލަބްގެ ކުރީގެ ކުޅުންތެރިޔާ ޒިނެދިން ޒިދާން ވަނީ މަގާމުން ވަކިވެފަ އެވެ.
ޕިރްލޯގެ އިރުޝާދުގެ ދަށުން އިޓާލިއަން ސުޕަ ކަޕާއި އިޓާލިއަން ކަޕް ޔުވެންޓަސް އިން ހޯދި އެވެ. ޔުވެންޓަސްގެ ކޯޗު ކަމަށް ޕިރްލޯ ހަމަޖެއްސީ، ލީގު ޗެމްޕިއަންކަން މިދިޔަ ސީޒަންގައި އެ ޓީމަށް ހޯދައިދިން، މައުރީޒިއޯ ސާރީ މަގާމުން ވަކިކުރުމަަށް ފަހު އެވެ. މިއީ ތިން އަހަރުގެ ތެރޭގައި ޔުވެންޓަސް އިން ކޯޗު ބަދަލުކުރާ ތިން ވަނަ ފަހަރެވެ.
އެލެގްރި ވަނީ ޔުވެންޓަސް އަށް ޖެހިޖެހިގެން ފަސް ފަހަރު އިޓާލިއަން ލީގުގެ ޗެމްޕިއަންކަން ހޯދައިދީފަ އެވެ. އަދި ޗެމްޕިއަންސް ލީގުގެ ފައިނަލަށް ދެ ފަހަރު އެ ޓީމު ގެންދިޔަ އެވެ. އިޓާލިއަން ލީގުގެ ޗެމްޕިއަންކަން 2019 ގައި ޔުވެންޓަސް އަށް ހޯދައިދިނުމަށް ފަހު، ކޯޗު ކަމުން އެލެގްރީ އިސްތިއުފާ ދިނީ އަމިއްލައަށެވެ. އޭގެ ފަހުން އެއްވެސް ޓީމަކާ އޭނާ ހަވާލެއް ނުވެ އެވެ. ޕްރިމިއާ ލީގުގެ ކްލަބު ޓޮޓެންހަމް އިން އެލެގްރީ އަށް ގެންދަން މަސައްކަތްކުރި ކަމަށް ރިޕޯޓްތަކުން ބުނެ އެވެ.
އިޓަލީގެ ޗެމްޕިއަންކަން މިދިޔަ ނުވަ އަހަރު ހޯދި ޔުވެންޓަސް މި ސީޒަން ނިންމާލީ ތާވަލްގެ ހަތަރު ވަނައިގަ އެވެ. ހަތަރު ވަނައިގައި ވެސް ޔުވެންޓަސް އަށް ސީޒަން ނިންމާލެވުނީ ލީގުގައި ކުޅުނު ފަހު މެޗުން ވާދަވެރި ނަޕޯލީ މޮޅުނުވުމުންނެވެ.
ކޮމެންޓު ފޮނުވާ