ޗައިނާ ފުރުމުގެ ކުރިން ފުރަތަމަ ޕީސީއާރު ގައުމީ ޓީމް ހަދައިފި

ވޯލްޑް ކަޕާއި އޭއެފްސީ އޭޝިއަން ކަޕް ކޮލިފިކޭޝަން މެޗުތަކަށް ޗައިނާއަށް ފުރުމުގެ ކުރިން ގައުމީ ޓީމުން ހަދާ ފުރަތަމަ ޕީސީއާރް ޓެސްޓު ހަދައިފިއެވެ.

މެޗުތަކަށް ތައްޔާރުވުމަށްޓަކައި ޓީމުން މިހާރު ދުބާއީގައި ކޭމްޕް ކުރަމުން އަންނައިރު އެގައުމުގައި 10 ދުވަސް ހޭދަކުރާނެއެވެ. އެއީ ވާދަވެރި މުހިންމު މެޗުތަކަކަށް ދިއުމަށްޓަކައި އެކަށީގެންވާ ތަމްރީނުތަކެއް ހެދުމުގެ ފުރުސަތު ހޯދުމުގެ ގޮތުންނެވެ. މެޗުތަކަށް ފުރުމުގެ ކުރިން ޓީމުން ދެ ފަހަރަށް ޕީސީއާރް ޓެސްޓު ހަދާއިރު ފުރަތަމަ ޓެސްޓު ހަދާފައިވަނީ ބުރާސްފަތި ދުވަހުގެ ވަގުތެއްގައެވެ.

ޓީމުން ދުބާއީގައި ފަރިތަކުރުންތައް ކުރިއަށް ގެންދިއުމަށް ކޭމްޕުކުރީ ރާއްޖޭގައި ކޮވިޑުގެ ހާލަތު އޮތް ގޮތުން ދަނޑުގައި ފަރިތަކުރުންތައް ބޭއްވުމުގެ ފުރުސަތު ނުލިބުމާއި ގުޅިގެންނެވެ. އަދި މެޗުތަކަށް ތައްޔާރުވުމަށް ޓީމުން މި މަހުގެ 13 ވަނަ ދުވަހު މާލޭގައި ހޮޓެލް ޖެންގައިވެސް ކޭމްޕް ކޮށްފައިވާއިރު އެ ހޮޓަލުގެ ބޯލް ރޫމުގައިވެސް ފަރިތަކުރުންތައް ކުރިއަށް ގެންގޮސްފައިވެއެވެ.

ކޮލިފައިންގައި ރާއްޖެ ހިމެނޭ ގްރޫޕް އޭގެ ބާކީ ހުރި މެޗުތައް މި މަހުގެ 30 ވަނަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. ދުބާއީއަށް ޓީމް ފުރާފައިވަނީ މެޗުތަކަށް އެކުލަވާލާފައިވާ 25 ކުޅުންތެރިންގެ ފައިނަލް ސްކޮޑެއް އެކުލަވާލުމަށް ފަހުގައެވެ.

ކޮލިފައިންގައި ރާއްޖެ އަންނަ މަހު ތިނެއްގައި ނުކުންނާނީ ޗައިނާއާ ދެކޮޅަށެވެ. މެޗުތައް ކުޅެނީ ޗައިނާ ސޫޒޯ ސިޓީގައެވެ.