މޮޑްރިޗް ރެއާލް އާއެކު ހަދާފައިވާ އެއްބަސްވުން އާކޮށްފި

ކްރޮއޭޝިއާގެ މިޑްފީލްޑަރ ލޫކާ މޮޑްރިޗް ސްޕެއިންގެ ރެއާލް މެޑްރިޑާއެކު ހަދާފައިވާ އެއްބަސްވުން އާކޮށްފިއެވެ.

މޮޑްރިޗް ރެއާލްއާއެކު ހަދާފައިވާ އެއްބަސްވުން އާކުރީ އިތުރު އެއް އަހަރު ދުވަހުގެ މުއްދަތަކަށެވެ. މީގެ ކުރިން މޮޑްރިޗް ރެއާލް އާއެކު ހަދާފައިވާ އެއްބަސްވުން މި ސީޒަނަށް ނިމުމުން ހަމަވާނެއެވެ.

މޮޑްރިޗް ރެއާލް މެޑްރިޑަށް ބަދަލުވީ 2012 ވަނަ އަހަރުއެވެ. އެއީ 30 މިލިއަން ޔޫރޯއަށެވެ. ރެއާލް އަށް ބަދަލުވެ މޮޑްރިޗް ވަނީ އެ ކްލަބުގައި މުހިއްމު ދައުރެއް އަދާކޮށް ގިނަ ކާމިޔާބީތަކެއްވެސް ހޯދާފައެވެ. މި މުއްދަތުގެ ތެރޭގައި ރެއާލްއަށް މޮޑްރިޗް ކުޅެދިން 391 މެޗުގައި އޭނާ ވަނީ 28 ލަނޑު އެ ކްލަބަށް ކާމިޔާބުކޮށްދީފައެވެ.

މޮޑްރިޗް ވަނީ 2018 ވަނަ އަހަރުގެ ފީފާ ވަރލްޑް ކަޕްގެ އެންމެ މޮޅު ކުޅުންތެރިޔާގެ މަޤާމްވެސް ހޯދާފައެވެ. އަދި ޔޫރަޕުގެ މޮޅު ކުޅުންތެރިޔާއާގެ މަގާމާއި، ފީފާއިން ހޮވާ ދަ ބެސްޓް ފީފާ ފުޓްބޯލް އެވޯޑްސް އަދި ފްރާންސް ފުޓްބޯލް މަޖައްލާއިން ދޭ ބަލޮންޑޯ އެވޯޑުވެސް ހޯދާފައެވެ.

އެއާއެކު މޮޑްރިޗް ވެފައިވަނީ އެއް އަހަރު ތެރޭ މި އެވޯޑުތައް ހާސިލުކުރި ފުރަތަމަ ކުޅުންތެރިޔާއަށެވެ. އަދި މޮޑްރިޗަކީ މި ގަރުނުގައި ކްރިސްޓިއާނޯ ރޮނާލްޑޯ އާއި ލިއޮނަލް މެސީ ފިޔަވައި ބަލޮންޑޯ އެވޯޑު ހޯދި ފުރަތަމަ ކުޅުންތެރިޔާއެވެ.